SportPress.kz قازاقستان سپورت جاڭالىقتارى
حالىقارالىق فۋتبول فەدەراتسياسى (فيفا) بەينەقايتالاۋ ەرەجەسىن وزگەرتۋ جونىندە ۇسىنىس جاسادى. بۇل جاتتىقتىرۋشىلاردىڭ داۋلى ساتتەر بويىنشا بەينەجازبانى كورۋدى تالاپ ەتۋىنە مۇمكىندىك بەرەدى، دەپ حابارلادى قازاقپارات.
FIFA پرەزيدەنتى دجانني ينفانتينو مۇنداي ۇسىنىستى 2024 جىلدىڭ 17 مامىرىندا تايلاندتىڭ استاناسى — بانگكوك قالاسىندا وتكەن FIFA-نىڭ 74-كونگرەسىندە ءبىلدىردى.
ەگەر جاڭاشىل جوبا ءساتتى جۇزەگە اسسا، جاڭا ەرەجە الەم بويىنشا ەنگىزىلەتىن بولادى. كەيىنگى جىلداردا فۋتبول ماماندارى ويىنعا بايلانىستى جاڭاشىلدىققا كوڭىل ءبولىپ كەلەدى. بۇل باعىتتا ونداعان جىلدار بويى ەشقانداي وزگەرىس جاسالماعان ەدى.
فەدەراتسيا كوكتەمنەن باستاپ بەينەقايتالاۋدىڭ جاڭا جۇيەسىنە قاتىستى ەرەجەلەردى جاسوسپىرىمدەر اراسىنداعى تۋرنيرلەردە سىناقتان وتكىزە باستادى. كوماندالاردىڭ باس باپكەرلەرى ويىن بارىسىندا ەكى مارتە بەينەقايتالاۋ بويىنشا تورەشىگە ۇسىنىس بىلدىرە الادى.
ءاربىر جاتتىقتىرۋشى ماتچ كەزىندە ەكى مارتە بەينەقايتالاۋدى كورۋ جونىندە تالاپ ەتە الادى. باس تورەشىنىڭ شەشىمى قاتە بولعان جاعدايدا ويىنشىلار باپكەرگە ول جونىندە ۇسىنىسىن ايتادى. ەگەر تورەشى ناقتى ساتتەر بويىنشا ءوزىنىڭ ءبىرىنشى شەشىمىنە وزگەرىس ەنگىزگەن جاعدايدا وندا باپكەردىڭ ماتچ بارىسىنداعى ەكى مارتە بەينەقايتالاۋ كورۋ جونىندە تالاپ قويۋ مۇمكىندىگى ساقتالىپ قالادى، — دەدى دجانني ينفانتينو.
فەدەراتسيا كوكتەمدە ءبىرشاما پىكىرتالاسقا تۇسكەن تاعى ءبىر جاڭاشىل جوبانى سىناقتان وتكىزۋدى باستاپ كەتتى. جاقىن ارادا فۋتبولدا ويىننان تىس قالۋ نەمەسە وفسايد جاعدايى بويىنشا ەرەجە وزگەرۋى مۇمكىن.
جاڭا ەرەجەگە سايكەس، ەگەر شابۋىلداۋشىنىڭ بۇكىل دەنەسى قورعاۋشىدان الدا تۇرسا، وفسايد ەرەجەسى قولدانىلادى. قازىرگى ۋاقىتتا ويىننان تىس قالۋ جاعدايى ەگەر شابۋىلشى قورعاۋشىدان ءبىر ميلليمەترگە وزىپ كەتسە دە بەلگىلەنەدى. ەندى جاڭا ەرەجە نەگىزىندە دەنەنىڭ گول سوعۋعا بولاتىن بولىگىنە عانا قاتىستى قولدانىلادى. سوندىقتان ول بويىنشا ەرەجەدە قول الىنىپ تاستالادى.
«ارسەنالدىڭ» بۇرىنعى باس جاتتىقتىرۋشىسى ارسەن ۆەنگەر كلۋبتان قىزمەتتەن كەتكەننەن كەيىن FIFA-نىڭ فۋتبولدى دامىتۋ دەپارتامەنتىنە باسشىلىققا تاعايىندالدى. ول بىرنەشە جىلدان بەرى وفسايد ەرەجەسىن وزگەرتۋ بويىنشا وڭ ناتيجەگە قول جەتكىزىپ كەلەدى. وفسايدتىڭ قايتا قارالعان انىقتاماسى شابۋىلداۋشى ويىنشىلارعا ايتارلىقتاي پايدا اكەلەدى.
ۆەنگەردىڭ ۇسىنىسى قاراپايىم، «ەگەر ءسىزدىڭ مۇرنىڭىز وفسايدتا بولسا، وندا ءسىزدىڭ بۇكىل دەنە وفسايدتا» دەگەن ۇعىمدى جوققا شىعارادى.
ول ەگەر گول سوعۋى مۇمكىن دەنەنىڭ ءبىر بولىگى سوڭعى قورعاۋشىنىڭ سىزىعىندا نەمەسە ارتىندا بولسا، فۋتبولشى ويىننان تىس قالمايدى دەگەن جاڭا موديفيكاتسيانى ۇسىنادى. فۋتبولشىنىڭ بۇكىل دەنەسى دوپ پەن ەكىنشى قارسىلاسقا قاراعاندا قارسىلاستىڭ قاقپا سىزىعىنا جاقىن بولسا ويىننان تىس قالدى دەپ ەسەپتەلەدى.
وفسايد بويىنشا جاڭا ەرەجە 2025 جىلدىڭ اقپان ايىندا رەسمي تۇردە قابىلدانۋى مۇمكىن. بۇل جاعدايدا FIFA جاڭارتىلعان ەرەجەنى 2025-26 ماۋسىمنان باستاپ جوعارى ليگالارعا جانە سول ۋاقىتتاعى الەم چەمپيوناتىنا ەنگىزۋگە ۇسىنا الادى.
