باقتيەر زاينۋتدينوۆ تۇركيا كۋبوگىن جەڭىپ الدى (ۆيدەو)

فۋتبولدان قازاقستان ۇلتتىق قۇراما كومانداسى مەن ىستانبۇل قالاسىنىڭ «بەشيكتاش» كلۋبىنىڭ ويىنشىسى باقتيەر زاينۋتدينوۆ تۇركياداعى العاشقى جەتىستىگىنە جەتتى.

«بەشتيكتاش» تۇركيا كۋبوگىنىڭ فينالىندا ترابزون قالاسىنىڭ «ترابزونسپور» كلۋبىن  3:2 ەسەبىمەن جەڭىپ، ەل كۋبوگىنىڭ يەگەرى اتاندى. ءسويتىپ، ىستانبۇلدىڭ كومانداسى وسى جەڭىستىڭ ارقاسىندا ەۋروپا ليگاسىنىڭ پلەي-وفف كەزەڭىنە جولداما الدى.

بۇل ماتچتا باقتيەر زاينۋتدينوۆ جاراقاتىنا بايلانىستى ويناعان جوق. ول قوسالقى قۇرامدا قالىپ، الاڭعا شىقپادى.

ويىندا ءبىرىنشى بولىپ ەسەپتى قوناقتار اشتى. 13-مينۋتتا پول ونۋاچۋ «ترابزونسپوردى» العا شىعاردى. ودان كەيىن ءبىرىنشى تايمعا قوسىلعان ۋاقىتتا راشيد گەززال پەنالتيدەن ەسەپتى تەڭەستىردى.

ەكىنشى تايمدا «ترابزونسپوردىڭ» ويىنشىسى دجەكسون مۋلەكا 54-مينۋتتا الاڭ يەلەرىنىڭ قاقپاسىنا گول سالىپ، تابلوداعى ەسەپتى وزگەرتتى. ال ويىننىڭ نەگىزگى ۋاقىت اياقتالۋعا ءبىر مينۋت قالعاندا نيكولاس پەپە ەسەپتى تەڭەستىرىپ، كومانداسىن جەڭىلىستەن امان الىپ قالدى.

ماتچتا جەڭىس گولىن كومانداسىنا ويىننىڭ نەگىزگى ۋاقىتىنا قوسىلعان 4-مينۋتتا ءالي ءال-مواتاسەمبەللا سىيلادى.

ول ايىپدوپ الاڭىنىڭ سىرتىنان دوپتى قاقپانىڭ سول جاق بۇرىشىنا تەۋىپ، نىسانانى ءدال كوزدەدى.

داستان كەنجالين،

استانا

 

View this post on Instagram

 

A post shared by Bakhtiyor Zainutdinov (@bateka_11)