قازاقستان تەننيسشىلەرى «رولان گارروس» ءتۋرنيرىن جەڭىسپەن باستادى

فرانتسيانىڭ اشىق بىرىنشىلىگى – «رولان گارروس» تۋرنيرىندە ەلىمىزدىڭ تاعى ءۇش تەننيسشى ەكىنشى اينالىمعا شىقتى، دەپ حابارلادى قازاقستان تەننيس فەدەراتسياسى.

الەمنىڭ 17-راكەتكاسى الەكساندر بۋبليك دۇنيەجۇزىلىك رەيتينگىدە 112-ورىندا تۇرعان فرانتسيالىق گرەگۋار باررەرمەن ويناپ، ونى 6:4، 7:5، 6:3 ەسەبىمەن جەڭدى.

ونىڭ ەندىگى كەلەسى قارسىلاسى — الەمنىڭ 41-راكەتكاسى، گەرمانيالىق يان-لەننارد شترۋفف.

يۋليا پۋتينتسەۆا رەيتينگىدە وزىنەن ءتورت ساتى جوعارى تۇرعان امەريكالىق، 2017 جىلعى اقش چەمپيونى سلوان ستيۆەنسپەن ويناپ، قارسىلاسىنان 6:1، 6:2 ەسەبىمەن باسىم ءتۇستى.

وسىعان دەيىن قارسىلاستار ءوزارا جەتى رەت كەزدەسىپ، سونىڭ تورتەۋىندە پۋتينتسەۆا جەڭگەن ەدى. بىراق بىلتىر فرانتسيانىڭ اشىق چەمپيوناتىنىڭ ءۇشىنشى اينالىمىندا ستيۆەنس وتانداسىمىزدان ايلاسىن اسىرعان بولاتىن.

بۇل جولى پۋتينتسەۆا ايقىن باسىمدىقپەن جەڭدى.

ەندى ول ءۇشىنشى اينالىمعا شىعۋ ءۇشىن رەيتينگىدە 139-ساتىداعى يسپانيالىق پاۋلا بادوسامەن وينايدى.

ەلەنا رىباكينا ءبىرىنشى كەزەڭدە بەلگيالىق گريتت ميننەنەن باسىم ءتۇستى.

وسىعان دەيىن قارسىلاستار ءوزارا ەكى رەت كەزدەسىپ، رىباكينا جەڭگەن ەدى.

بۇل جولى ەلەنا 6:2، 6:3 ەسەبىمەن جەڭىسكە جەتتى.

رىباكينانىڭ كەلەسى اينالىمداعى قارسىلاسى — الەمنىڭ 50-راكەتكاسى نيدەرلاندتىق ارانتا رۋس.

ەلەنا رىباكينا بيىل گرۋنتتا 10 ويىن وتكىزىپ، سونىڭ 9-دا جەڭىسكە جەتتى.

بۇعان دەيىن «رولان گارروس» تۋرنيرىندە الەكساندر شەۆچەنكو العاشقى جەڭىسىنە جەتكەن ەدى. ول

3 ساعات 16 مينۋتقا سوزىلعان تارتىستى ويىندا اسلان كاراتسەۆتى (82 اتر) 6:4، 4:6، 1:6، 6:1، 6:4 ەسەبىمەن جەڭىپ، فرانتسيا اشىق چەمپيوناتىنىڭ ەكىنشى اينالىمىنا شىققان بولاتىن. الەكساندر شەۆچەنكونىڭ كەلەسى قارسىلاسى — فرانتسۋز تەننيسشىسى كورەنتەن مۋتە (79 اتر).

ميحايل كۋكۋشكين بولسا ءتۋرنيردىڭ ىرىكتەۋ ساتىسىندا جاقسى ويناپ، ءبىرىنشى اينالىمدا ماجارستاننىڭ وكىلى فابيان ماروجاننان 2:6، 2:6، 3:6 ەسەبىمەن جەڭىلىپ قالدى.