يرينا يۋنۋسمەتوۆا وليمپيادانىڭ جولداماسىن جەڭىپ الدى

بۇگىن حالىقارالىق نىسانا كوزدەۋ (ISSF) فەدەراتسياسى بارلىق الەم كۋبوگىنىڭ كەزەڭىنەن كەيىن وليمپيالىق رەيتينگىن جاڭارتتى. سونىڭ ناتيجەسىندە يرينا يۋنۋسمەتوۆا وليمپيادانىڭ ليتسەنزياسىن جەڭىپ الدى، دەپ حابارلادى تۋريزم جانە سپورت مينيسترلىگىنىڭ سپورتتى دامىتۋ ديرەكتسياسى.

ۇلتتىق قۇراما سپورتشىسى قايتا ۇلەستىرۋ كەزەڭىندە 10 مەتردەن تاپانشامەن نىسانا كوزدەۋدە جولداماعا يەلىك ەتتى.

بۇل — ەلىمىزدىڭ سپورتتىق اتۋ فەدەراتسياسىنىڭ ەنشىسىندەگى توعىزىنشى ليتسەنزيا. وسىعان دەيىن يسلام ساتپاەۆ، كونستانتين مالينوۆسكي، الەكساندرا لە، ارينا التۋحوۆا، نيكيتا چيريۋكين (نىسانا كوزدەۋ)، اسەم ورىنباي، ەدۋارد ەششەنكو مەن ماريا دميتريەنكو (ستەند اتۋ) وليمپياداعا جولدامانى يەلەنگەن.

اسەم ورىنباي مەن يرينا يۋنۋسمەتوۆانىڭ ليتسەنزياسى جەكە سپورتشىنىڭ وزىنە تيەسىلى. قالعانى فەدەراتسياعا بەرىلگەن كۆوتا.

ال جالپى، قازاقستان ەنشىسىندەگى جولدامانىڭ سانى 67-گە جەتتى.