ۇوك وليمپيادادا تۋ ۇستاعان سپورتشىلاردىڭ كيىمىن مۋزەيگە تابىس ەتتى

قازاقستان ۇلتتىق وليمپيادا كوميتەتى 2020 جىلعى وليمپييالىق ويىنداردا تۋ ۇستاۋشىلار كيگەن كوستيۋمدى  ۇلتتىق مۋزەيءدىڭ قورىنا تابىس ەتتى، دەپ حابارلادى Olympic.kz. 

بۇل — حالىقارالىق وليمپيادا كۇنىن اتاپ ءوتۋ اياسىنداعى العاشقى ءىس-شارا. ۇلتتىق وليمپيادا كوميتەتى بىرەگەي كيىم ۇلگىسىن مۋزەيدىڭ كوللەكتسياسىنا  تاپسىردى.

كيىم ۇلگىسىمەن توكيو وليمپياداسىنىڭ اشىلۋ سالتاناتىندا وليمپيالىق ويىندار مەن بوكستان الەم چەمپيوناتىنىڭ جۇلدەگەرى قامشىبەك قوڭقاباەۆ پەن ەلىمىزدەگى ەڭ تانىمال سپورتشى، جەڭىل اتلەتيكادان وليمپيادا چەمپيونى ولگا رىپاكوۆا قازاقستان قۇراماسىن الىپ شىققان بولاتىن.

استاناداعى ءىس-شاراعا ولگا رىپاكوۆا قاتىستى.

بۇل شاراعا قاتىسۋ مەن ءۇشىن ۇلكەن مارتەبە. توكيو وليمپياداسىندا قازاقستاننىڭ كوك تۋىن كوتەرىپ شىعۋ ماقتانىش قانا ەمەس، ۇلكەن جاۋاپكەرشىلىك ەدى. سەبەبى، بۇكىل ەلدىڭ بەت-بەينەسى بولعاندىقتان، ءبارىنىڭ نازارى بىزگە اۋدى.

ءبىزدىڭ كوستيۋمدەرىمىز توكيو ويىندارىندا ۇلكەن قىزىعۋشىلىق تۋعىزدى. ءبىزدىڭ كيىم ۇلگىمىزدىڭ ادەمىلىگى مەن كوركەمدىگى وزگە ەل وكىلدەرى مەن اتلەتتەرىن ءتانتى ەتتى.

تۋ ۇستاۋشىلاردىڭ كوستيۋمى قولمەن كەستەلەنگەن بىرەگەي ديزاينىمەن عانا ەمەس، تەرەڭ ماعىناسىمەن دە ەرەكشەلەندى. ءاربىر ورنەكتىڭ وزىندىك ءمانى بار. ەندى بۇل كوستيۋمدەردىڭ قازاقستان ۇلتتىق مۋزەيىنىڭ قورىنا وتكەنى قۋانتىپ وتىر. ويتكەنى، مۋزەيگە كەلگەن ءاربىر ادام ءبىزدىڭ ەلدىڭ وليمپياداعا قاتىسۋ تاريحىمەن تانىسا الادى.

حالىقارالىق وليمپيادا كۇنىنىڭ قارساڭىندا وسكەلەڭ ۇرپاقتى وليمپيادالىق سپورتتىق قوزعالىسقا مەيىلىنشە كوبىرەك تارتۋدىڭ ماڭىزدىلىعى زور، — دەدى رىپاكوۆا.

ۇلتتىق مۋزەي ديرەكتورىنىڭ عىلىمي جۇمىستار جونىندەگى ورىنباسارى اقمارال يبراەۆا سپورتشىلاردىڭ جەتىستىگىن ايتتى.

بۇگىن ۇلتتىق مۋزەي قورىنا ءبىزدىڭ ەلىمىزدە الەمدىك ارەنادا تانىتقان سپورتشىلار، وليمپيالىق ويىنداردىڭ جۇلدەگەرلەرى ولگا رىپاكوۆا مەن قامشىبەك قوڭقاباەۆتىڭ كيىم ۇلگىسى تابىس ەتىلدى. ەلىمىزدە وسىنداي مىقتى سپورتشىلار مەن عاجاپ تۇلعالاردىڭ بارىنا ماقتانامىز. ۇلتتىق مۋزەي قورى ۇلتتىق ناقىشتاعى تاماشا تۋىندىلارمەن  تولىقتى، — دەدى ول.

تۋ ۇستاۋشىلاردىڭ كوستيۋمدەرى ارنايى ۇوك-تىڭ تاپسىرىسى ارقىلى تىگىلگەن ءارى ايرىقشا ۇلگىسىمەن ەرەكشەلەنەدى.

كيىمدى تىگۋ جۇمىسىنا ءابىلحان قاستەەۆ اتىنداعى مەملەكەتتىك ونەر مۇراجايىنىڭ ماماندارى اتسالىسسا، بەزەندىرۋ جانە تىگۋ جۇمىستارىنا بەلگىلى الماتىلىق مودەلەر ۆيولەتتا يۆانوۆا تارتىلدى.

2022 جىلعى وليمپيالىق ويىنداردىڭ تۋ ۇستاۋشىلارى ابزال اجىعاليەۆ پەن ەكاتەرينا ايدوۆانىڭ كيىم ۇلگىسىن قازاقستان ۇوك لوزانناداعى وليمپيادالىق مۋزەيگە تابىس ەتكەن بولاتىن.