UOK Olımpıadada tý ustaǵan sportshylardyń kıimin mýzeıge tabys etti

Qazaqstan Ulttyq Olımpıada komıteti 2020 jylǵy Olımpııalyq oıyndarda tý ustaýshylar kıgen kostıýmdi  Ulttyq mýzeıdiń qoryna tabys etti, dep habarlady Olympic.kz. 

Bul — Halyqaralyq Olımpıada kúnin atap ótý aıasyndaǵy alǵashqy is-shara. Ulttyq Olımpıada komıteti biregeı kıim úlgisin mýzeıdiń kollekııasyna  tapsyrdy.

Kıim úlgisimen Tokıo Olımpıadasynyń ashylý saltanatynda Olımpııalyq oıyndar men bokstan álem chempıonatynyń júldegeri Qamshybek Qońqabaev pen elimizdegi eń tanymal sportshy, jeńil atletıkadan Olımpıada chempıony Olga Rypakova Qazaqstan quramasyn alyp shyqqan bolatyn.

Astanadaǵy is-sharaǵa Olga Rypakova qatysty.

Bul sharaǵa qatysý men úshin úlken mártebe. Tokıo Olımpıadasynda Qazaqstannyń kók týyn kóterip shyǵý maqtanysh qana emes, úlken jaýapkershilik edi. Sebebi, búkil eldiń bet-beınesi bolǵandyqtan, báriniń nazary bizge aýdy.

Bizdiń kostıýmderimiz Tokıo oıyndarynda úlken qyzyǵýshylyq týǵyzdy. Bizdiń kıim úlgimizdiń ádemiligi men kórkemdigi ózge el ókilderi men atletterin tánti etti.

Tý ustaýshylardyń kostıými qolmen kestelengen biregeı dızaınymen ǵana emes, tereń maǵynasymen de erekshelendi. Árbir órnektiń ózindik máni bar. Endi bul kostıýmderdiń Qazaqstan Ulttyq mýzeıiniń qoryna ótkeni qýantyp otyr. О́ıtkeni, mýzeıge kelgen árbir adam bizdiń eldiń Olımpıadaǵa qatysý tarıhymen tanysa alady.

Halyqaralyq Olımpıada kúniniń qarsańynda óskeleń urpaqty olımpıadalyq sporttyq qozǵalysqa meıilinshe kóbirek tartýdyń mańyzdylyǵy zor, — dedi Rypakova.

Ulttyq mýzeı dırektorynyń ǵylymı jumystar jónindegi orynbasary Aqmaral Ibraeva sportshylardyń jetistigin aıtty.

Búgin Ulttyq mýzeı qoryna bizdiń elimizde álemdik arenada tanytqan sportshylar, Olımpııalyq oıyndardyń júldegerleri Olga Rypakova men Qamshybek Qońqabaevtyń kıim úlgisi tabys etildi. Elimizde osyndaı myqty sportshylar men ǵajap tulǵalardyń baryna maqtanamyz. Ulttyq mýzeı qory ulttyq naqyshtaǵy tamasha týyndylarmen  tolyqty, — dedi ol.

Tý ustaýshylardyń kostıýmderi arnaıy UOK-tyń tapsyrysy arqyly tigilgen ári aıryqsha úlgisimen erekshelenedi.

Kıimdi tigý jumysyna Ábilhan Qasteev atyndaǵy Memlekettik óner murajaıynyń mamandary atsalyssa, bezendirý jáne tigý jumystaryna belgili almatylyq modeler Vıoletta Ivanova tartyldy.

2022 jylǵy Olımpııalyq oıyndardyń tý ustaýshylary Abzal Ájiǵalıev pen Ekaterına Aıdovanyń kıim úlgisin Qazaqstan UOK Lozannadaǵy Olımpıadalyq mýzeıge tabys etken bolatyn.