قازاق بالالارى فۋتبولدان Dragan Mance Cup ءتۋرنيرىنىڭ قولا جۇلدەگەرى اتاندى

شىمكەنت قالاسىنىڭ ەكى فۋتبول اكادەمياسىنىڭ – «ورداباسى» فۋتبول كلۋبى مەن «وڭتۇستىك» اكادەمياسىنىڭ تاربيەلەنۋشىلەرى العاش رەت 11-17 ماۋسىم ارالىعىندا سەربيانىڭ استاناسى – بەلگراد قالاسىندا وتكەن Dragan Mance Cup بالالارعا ارنالعان حالىقارالىق تۋرنيرگە قاتىسىپ، قولا جۇلدەنى جەڭىپ الدى، دەپ حابارلادى قازاقستان رەسپۋبليكاسىنىڭ سەربيا رەسپۋبليكاسىنداعى ەلشىلىگى.

بۇل تۋرنيرگە ەۋروپانىڭ 16 ەلىنەن 288 كوماندا قاتىستى.

«ورداباسى» فۋتبول كلۋبى اكادەمياسىنىڭ فۋتبولشىلارى U12 جاس ساناتىندا ءۇشىنشى ورىن الىپ، جارتىلاي فينالدا گرەكيا كومانداسىنا جەڭىلۋگە ءماجبۇر بولدى. بالالار جەڭىلسە دە جاقسى ويىن ورنەگىن كورسەتتى. ودان كەيىن جاس فۋتبولشىلار سەربيا فۋتبولىنىڭ فلاگماندارى مەن ەۋروپا كۋبوكتارىنا ءجيى قاتىساتىن – «تسرۆەنا زۆەزدا» مەن «پارتيزان» كلۋبتارىنىڭ ستاديوندارىنا باردى.

بۇل تۋرنير جىل سايىن بەلگرادتا بۇرىنعى يۋگوسلاۆيا ەلىنىڭ اتاقتى فۋتبولشىسى، ۇلتى سەرب دراگان مانزەنى ەسكە الۋ ماقساتىندا وتەدى. ول كوزى تىرىسىندە «پارتيزان» كلۋبى مەن يۋگوسلاۆيا قۇراماسىندا ويناعان.  حالىقارالىق تۋرنير سونىڭ اتىمەن Dragan Mance Cup دەپ اتالادى.

بيىل ەلىمىزدىڭ اتىنان جارىسقا «ورداباسى» فۋتبول كلۋبى مەن «وڭتۇستىك» اكادەمياسىنىڭ تاربيەلەنۋشىلەرى قاتىستى. كوماندانىڭ تۋرنيرگە قاتىسۋى سەربيالىق فۋتبول فۋنكتسيونەرلەرى ۆلاديمير رىبيچ پەن گوران ستانوەۆيچتىڭ ارقاسىندا مۇمكىن بولدى.

«وڭتۇستىك» پەن «ورداباسى» كلۋبتارىنىڭ بالالار كوماندالارى حورۆاتيانىڭ زادار قالاسىندا ءوتىپ جاتقان Dalmatinko Cup حالىقارالىق تۋرنيرىنە قاتىسقان بولاتىن. بىلتىر وعان ەلىمىزدەن  «تۇران-2013»، «اقتوبە-2013»، «استانا-2012»، «اقجايىق-2012» مەن «وقجەتپەس-2012» سياقتى 5 كوماندا قاتىسىپ، وتانداستارىمىز العاش رەت كۇمىس مەدال جەڭىپ الدى.