SportPress.kz Qazaqstan sport jańalyqtary
Shymkent qalasynyń eki fýtbol akademııasynyń – «Ordabasy» fýtbol klýby men «Ońtústik» akademııasynyń tárbıelenýshileri alǵash ret 11-17 maýsym aralyǵynda Serbııanyń astanasy – Belgrad qalasynda ótken Dragan Mance Cup balalarǵa arnalǵan halyqaralyq týrnırge qatysyp, qola júldeni jeńip aldy, dep habarlady Qazaqstan Respýblıkasynyń Serbııa Respýblıkasyndaǵy elshiligi.
Bul týrnırge Eýropanyń 16 elinen 288 komanda qatysty.
«Ordabasy» fýtbol klýby akademııasynyń fýtbolshylary U12 jas sanatynda úshinshi oryn alyp, jartylaı fınalda Grekııa komandasyna jeńilýge májbúr boldy. Balalar jeńilse de jaqsy oıyn órnegin kórsetti. Odan keıin jas fýtbolshylar Serbııa fýtbolynyń flagmandary men Eýropa kýboktaryna jıi qatysatyn – «rvena Zvezda» men «Partızan» klýbtarynyń stadıondaryna bardy.
Bul týrnır jyl saıyn Belgradta burynǵy Iýgoslavııa eliniń ataqty fýtbolshysy, ulty serb Dragan Manzeni eske alý maqsatynda ótedi. Ol kózi tirisinde «Partızan» klýby men Iýgoslavııa quramasynda oınaǵan. Halyqaralyq týrnır sonyń atymen Dragan Mance Cup dep atalady.
Bıyl elimizdiń atynan jarysqa «Ordabasy» fýtbol klýby men «Ońtústik» akademııasynyń tárbıelenýshileri qatysty. Komandanyń týrnırge qatysýy serbııalyq fýtbol fýnkıonerleri Vladımır Rybıch pen Goran Stanoevıchtiń arqasynda múmkin boldy.
«Ońtústik» pen «Ordabasy» klýbtarynyń balalar komandalary Horvatııanyń Zadar qalasynda ótip jatqan Dalmatinko Cup halyqaralyq týrnırine qatysqan bolatyn. Byltyr oǵan elimizden «Turan-2013», «Aqtóbe-2013», «Astana-2012», «Aqjaıyq-2012» men «Oqjetpes-2012» sııaqty 5 komanda qatysyp, otandastarymyz alǵash ret kúmis medal jeńip aldy.
