ءامىر زاكىروۆ پەن ءامىر مايمۇراتوۆ وليمپياداعا جولداما الدى

ماجارستاننىڭ بۋداپەشت قالاسىندا  برەيكينگ، سپورتتىق قۇزعا ورمەلەۋ، سكەيتبوردينگ پەن BMX-فريستايلدان ليتسەنزيالىق ءتۋرنيردىڭ ەكىنشى سەرياسى ءوز مارەسىنە جەتتى، دەپ حابارلادى تۋريزم جانە سپورت مينيسترلىگىنىڭ سپورتتى دامىتۋ ديرەكتسياسى.

جەكەلەي سىندا برەيكينگتەن ەل نامىسىن قورعاعان ءامىر زاكىروۆ فينالدا نيدەرلاند وكىلى لي ۆينسكە ەسە جىبەرىپ (2:1)، كۇمىس مەدال الىپ، وليمپيادانىڭ جولداماسىن جەڭىپ الدى.  ال ءۇشىنشى ورىنعا حونگ تەن (وڭتۇستىك كورەيا) يە بولدى. قازىر ەكى ىرىكتەۋ كەزەڭىنىڭ قورىتىندىسى بويىنشا ءامىر زاكىروۆتىڭ ەنشىسىندە 71 ۇپاي بار. ول بۇعان دەيىن قىتايدىڭ شانحاي قالاسىندا وتكەن تۋرنيردە 15-ورىندى يەلەنگەن بولاتىن.

سونداي-اق، سپورتتىق قۇزعا ورمەلەۋدەن «جىلدامدىق» ساناتىندا ونەر كورسەتكەن ءامىر مايمۇراتوۆ فينالدا قىتايلىق قارسىلاسىنان (4.90 سەكۋند) ارتتا قالىپ، ەكىنشى ورىنمەن قاتار، وليمپيادانىڭ ليتسەنزياسىن الدى. تاعى ءبىر تاجىريبەلى وتانداسىمىز ريشات حايبۋللين 6-ورىننان كورىنسە، ايەلدەر اراسىندا تامارا ۇلجاباەۆا 16-ساتىعا تۇراقتادى. بۇل باعدارلامادا 20 ەلدەن 64 سپورتشى باق سىنادى.

مەن جارىستا بارلىق قارسىلاستارىمدى جەڭىپ، سوڭىنا كەلگەندە ءسۇرىندىم. ىشتەي وكىنىش بار. الايدا بۇل مەن الار جەڭىستىڭ سوڭى ەمەس. الداعى ۋاقىتتا جاتتىعۋىمدى نىقتاپ، كوك تۋىمىزدى جەلبىرەتەمىن. وليمپياداداعى ەڭ باستى قارسىلاستارىمنىڭ ءبىرى -امەريكالىق سامۋەل ۆاتسون مەن يندونەزيالىق ۆەددريك لەوناردو. بىراق، وزىمە سەنىمدىمىن، قاتەلىگىمدى قايتالامايمىن، — دەدى ءامىر مايمۇراتوۆ.

قۇزعا ورمەلەۋ سپورتى وليمپيادانىڭ باعدارلاماسىنا 2021 جىلى جاپونيانىڭ توكيو قالاسىندا وتكەن ويىنداردا ەنگىزىلدى.

توكيو وليمپياداسىندا العاش رەت ريشات حايبۋللين جولداما الىپ، الەمنىڭ 19 سپورتشىسىمەن سىنعا ءتۇستى. ول كەزدە تەك ەرلەر جانە ايەلدەر كوپسايىستان (3 جاتتىعۋدىڭ قورىتىندىسى) جۇلدەگە تالاستى.

پاريج وليمپياداسىندا قۇزعا ورمەلەۋ سپورتىنىڭ باعدارلاماسى وزگەرىسكە ۇشىراپ، مەدال سانى ءتورت جۇلدەگە كوبەيدى.

بوۋلدەرينگتەن ەرلەر مەن ايەلدەردىڭ ارقايسى 20 سپورتشىدان، جىلدامدىقتان جارىسقا ەرلەر مەن ايەلدەردىڭ ارقايسىسى 14 سپورتشىدان باق سىنايدى.

ءامىر مايمۇراتوۆ ءدال وسى جىلدامدىق سايىسى بويىنشا ۇزدىك 14 سپورتشىنىڭ قاتارىنا ەنىپ وتىر. ول 2012 جىلى يراندا جىلدامدىقتان جاستار اراسىندا جالاۋى جەلبىرەگەن ازيا چەمپيوناتىن جەڭىپ السا، 2017 جىلى قىتايدا ازيا كۋبوگىنىڭ يەگەرى بولدى. ال كەلەسى جىلى تايلاندتا ازيا كۋبوگىنىڭ قولا جۇلدەگەرى اتاندى.

سپورتشىنى رينات حايبۋللين مەن كلارا سلۋتسكايا جاتتىقتىرادى. بۇل ەكەۋى قازاقستان اتىنان 1997 جىلى العاش رەت گيمالاي ەكسپەديتسياسىنا قاتىسقان بولاتىن.