ءشامىل دوسبول  گرەك-ريم كۇرەسىنەن ازيا چەمپيونى اتاندى

كۇرەس تۇرلەرىنەن يوردانيانىڭ استاناسى – اممان قالاسىندا ءوتىپ جاتقان 17 جانە 23 جاسقا دەيىنگى سپورتشىلار اراسىنداعى ازيا چەمپيوناتىندا قازاقستان بالۋاندارى جاقسى ناتيجە كورسەتىپ جاتىر.

گرەك-ريم كۇرەسىنەن 60 كەلى سالماقتا بەلدەسكەن ءشامىل دوسبول ەكى دۇركىن ازيا چەمپيونى اتاندى. ول 17 جاسقا دەيىنگى سپورتشىلارمەن بەلدەسىپ،  قىتاي مەن ءۇندىستان بالۋاندارىن جەڭىپ، فينالدا وزبەكستاننىڭ وكىلىمەن تەڭ ءتۇستى. الايدا، سوڭعى ناتيجەلى ءادىستى جاساعاندىقتان، جەڭىس قازاق سپورتشىسىنا بەرىلدى.

ودان باسقا، 92 كەلىدەگى ادىلەت تويشى كۇمىس مەدال يەلەنسە، نۇرداۋلەت قۇمار ۇلى (45 كگ) مەن ەدىگە تولەۋتاەۆ (51 كگ) قولاعا جۇلدەگە يە بولدى.

المات كەبىسپاەۆ جاتتىقتىراتىن گرەك-ريم كۇرەسىنەن U-17 قۇراماسى جالپىكوماندالىق ەسەپتە 3-ورىن يەلەندى.

داستان كەنجالين،

استانا