كوڭىلگە مەدەۋ، جانعا دەمەۋ بولعان جارىس

نەگىزى، دەنساۋلىقتىڭ قادىرىن تەك اۋىرعاندا  عانا ءبىلىپ جاتامىز. ءيا، ول ءبىزدىڭ پەندە بولعان سوڭ باسقا تۇسپەي ەشنارسەنىڭ قادىرىن بىلمەي جاتاتىن كەمشىلىگىمىز بولسا كەرەك. دەگەنمەندە «اۋرۋ ايتىپ كەلمەيدى»، دەگەن قاناتتى ءسوز بار.

ارامىزدا قانشاما ءتۇرلى كەسەلدەرگە دۋشار بولعان مەيىرىمدى، قايىرىمدى، جانى تازا اسىل جاندار جۇرگەنىن كورەمىز. كورەمىز دە اللاعا تاۋبە كەلتىرۋدى ۇمىتپايمىز. حاديستە: «ناعىز كۇشتى – جاۋىرىنى جەرگە تيمەگەن، قارسىلاسىن كۇرەسىپ جىققان ەمەس، تۇلا – بويىن اشۋ-ىزا، قايعى-مۇڭ كەرنەگەندە، ءوزىن-ءوزى سابىرعا شاقىرا بىلگەن ادام»، دەگەن ءسوز بار. ءتۇرلى دەرتتەرمەن اۋىرىپ، كوز جانارى كورۋدەن، قۇلاعى ەستۋدەن ايىرىلىپ قالعان مۇگەدەك جانداردىڭ، اۋرۋعا بويسىنىپ جەڭىلىپ ىرقىنا كونبەي، كەرىسىنشە قارسى تۇرىپ ءومىر سۇرۋگە دەگەن قۇلشىنىستارىن سابىردى تۋ ەتىپ سپورت ارقىلى جارقىن كورسەتكەن ەرلىكتەرىنە قاراپ  ريزا بولاسىڭ. ويتكەنى، اۋرۋدى كۇرەسە بىلگەندە عانا جەڭە الامىز. سوندىقتان دەنساۋلىقتى جاقسارتۋدا سپورتتىڭ بەرەر پايداسى وراسان.

جاقىندا الماتى ماڭىنداعى وتەگەن كەنتىندە كورۋ، ەستۋ قابىلەتى تومەن جاندار اراسىندا بادمينتوننان  قازاقستان كۋبوگى ءۇشىن رەسپۋبليكالىق جارىس بولىپ ءوتتى.

ايتۋلى باسەكەگە الماتى قالاسى، جەتىسۋ، قاراعاندى، قوستاناي، بقو جانە ماڭعىستاۋ وبلىستارىنان كوماندالار كەلىپ قاتىسىپ، جەڭىس جولىندا بارىنشا كۇش سىناستى.  نەگىزى، باس جۇلدەنى جەڭىپ الۋ ارينە، العا قويعان ماقساتتىڭ ءبىرى شىعار، دەسەك تە زاعيپ جانداردىڭ اۋەلگى  ارمانى دەنساۋلىق ەكەنى بارشاعا بەلگىلى. «دەنى ساۋدىڭ جانى ساۋ»، دەگەن بار.

جارىس الاڭدارىندا كادۋىلگى ءتورت مۇشەسى تۇگەل جانداي ويىن شەبەرلىگىن كورسەتكەن جانداردىڭ ومىرگە، سپورتقا دەگەن قۇلشىنىستارىن كورىپ ەرەكشە كۇيدە قالدىق. سونىمەن جالپى كوماندالىق ءبىرىنشى ورىندى الماتى قالاسى، كۇمىس جۇلدەنى الماتى وبلىسى، قولا جۇلدەنى قوستاناي وبلىسىنىڭ كوماندالارى يەلەندى.

جارىستاعى ءار ءتۇرلى دارەجەدەگى جاتتىعۋلاردىڭ جەكەلەي سىندارىندا د.ەسبەرگەنوۆ، ا.ايدارقىزى، ۆ.كوۆالسكي جانە جۇپتىق ونەر كورسەتۋدە اقمولدانوۆا، ايدارقىزى مەن ۆولكوۆ پەن  اقمولدانوۆالار جارىس جەڭىمپازى اتاندى.

سپورتتىڭ ءبىر قۇدىرەتى، وسىنداي جارىستار ارقىلى قاتىسۋشىلار دوس تاۋىپ، ارا-قاتىناستارىن جاقسارتا تۇسەتىنى بەلگىلى. جارىس اياقتالعان سوڭ سپورتشىلار ءبىر-بىرلەرىمەن جادىراعان كوڭىل-كۇيمەن قيماي قوشتاسىپ جاتقاندارىن كوزىمىز شالدى.  ومىرلەرىنە ءۇمىت سىيلاعان وسىنداي جارىستار ايتۋلى جاندار ءۇشىن ۇلكەن ءبىر مەرەكە ىسپەتتەس.

اقىن ورداباي ۇلى،

الماتى