Kóńilge medeý, janǵa demeý bolǵan jarys

Negizi, densaýlyqtyń qadirin tek aýyrǵanda  ǵana bilip jatamyz. Iá, ol bizdiń pende bolǵan soń basqa túspeı eshnárseniń qadirin bilmeı jatatyn kemshiligimiz bolsa kerek. Degenmende «Aýrý aıtyp kelmeıdi», degen qanatty sóz bar.

Aramyzda qanshama túrli keselderge dýshar bolǵan meıirimdi, qaıyrymdy, jany taza asyl jandar júrgenin kóremiz. Kóremiz de Allaǵa táýbe keltirýdi umytpaımyz. Hadıste: «Naǵyz kúshti – jaýyryny jerge tımegen, qarsylasyn kúresip jyqqan emes, tula – boıyn ashý-yza, qaıǵy-muń kernegende, ózin-ózi sabyrǵa shaqyra bilgen adam», degen sóz bar. Túrli derttermen aýyryp, kóz janary kórýden, qulaǵy estýden aıyrylyp qalǵan múgedek jandardyń, aýrýǵa boısynyp jeńilip yrqyna kónbeı, kerisinshe qarsy turyp ómir súrýge degen qulshynystaryn sabyrdy tý etip sport arqyly jarqyn kórsetken erlikterine qarap  rıza bolasyń. О́ıtkeni, aýrýdy kúrese bilgende ǵana jeńe alamyz. Sondyqtan densaýlyqty jaqsartýda sporttyń berer paıdasy orasan.

Jaqynda Almaty mańyndaǵy О́tegen kentinde kórý, estý qabileti tómen jandar arasynda badmıntonnan  Qazaqstan kýbogy úshin respýblıkalyq jarys bolyp ótti.

Aıtýly básekege Almaty qalasy, Jetisý, Qaraǵandy, Qostanaı, BQO jáne Mańǵystaý oblystarynan komandalar kelip qatysyp, jeńis jolynda barynsha kúsh synasty.  Negizi, bas júldeni jeńip alý árıne, alǵa qoıǵan maqsattyń biri shyǵar, desek te zaǵıp jandardyń áýelgi  armany densaýlyq ekeni barshaǵa belgili. «Deni saýdyń jany saý», degen bar.

Jarys alańdarynda kádýilgi tórt múshesi túgel jandaı oıyn sheberligin kórsetken jandardyń ómirge, sportqa degen qulshynystaryn kórip erekshe kúıde qaldyq. Sonymen jalpy komandalyq birinshi oryndy Almaty qalasy, kúmis júldeni Almaty oblysy, qola júldeni Qostanaı oblysynyń komandalary ıelendi.

Jarystaǵy ár túrli dárejedegi jattyǵýlardyń jekeleı syndarynda D.Esbergenov, A.Aıdarqyzy, V.Kovalskıı jáne juptyq óner kórsetýde Aqmoldanova, Aıdarqyzy men Volkov pen  Aqmoldanovalar jarys jeńimpazy atandy.

Sporttyń bir qudireti, osyndaı jarystar arqyly qatysýshylar dos taýyp, ara-qatynastaryn jaqsarta túsetini belgili. Jarys aıaqtalǵan soń sportshylar bir-birlerimen jadyraǵan kóńil-kúımen qımaı qoshtasyp jatqandaryn kózimiz shaldy.  О́mirlerine úmit syılaǵan osyndaı jarystar aıtýly jandar úshin úlken bir mereke ispettes.

Aqyn ORDABAIULY,

ALMATY