SportPress.kz Qazaqstan sport jańalyqtary
Aýyldaǵy qara domalaq balalardyń sportqa degen qumarlyǵy qanshalyqty ekenin jaqsy bilemiz. Aýyl qazaqtyń altyn besigi, kúre tamyry bolsa, sol tunyqtan túlep ushyp jatqan talanttardyń sheberligin shyńdaı túsý jolynda óńirlerde jarystardyń jıi ótýiniń mańyzy zor.
Táýelsizdik kúnine oraı elimizdiń ár aımaǵynda kóptegen alaman jarystar, izgilikti sharalar uıymdastyrlyp jatty. Solardyń biri Jetisý oblysy, Kerbulaq aýdany, Qyzyljar aýylynda bolyp ótti. Erkin kúresten 2011-2012 jáne 2013-2014 jylǵy kishi jasópirimder arasynda ótken oblystyq týrnır aýyl sportynyń janashyry, Kerbulaq aýdanynyń azamaty, Qusaıynov Sembek Táýkeshulynyń júldesine arnalǵan edi.
El prezıdenti Qasym-Jomart Kemeluly Toqaevtyń salıqaly saıasaty jemisin berip, qazirgi tańda eldegi aýyl sportyna zor kóńil bólinip keledi. Respýblıkanyń aýyl-aımaqtarynda sport keshenderi men sport mektepteri salynyp aýyl jastarynyń sportqa qyzyǵýshylyǵy arta tústi. Qanshama jyldar boıy tozyǵy jetip turalap qalǵan mádenı oshaqtar men sport alańdarynyń boıyna qan júgirip, aýyl halqy eńsesin kótere bastady. Osyǵan táýbe degen artyq bolmas. Osyndaı el sportynyń alǵan berekeli baǵytyna aýyldaǵy aýzyn ashsa júregi kórinetin, elim, jerim degen sport janashyrlarynyń qosyp jatqan úlesi de sheksiz. Solardyń biri biregeıi Qyzyljar aýylynyń týmasy Sembek Táýkeshuly Qusaıynov. «Aýylyńnan alǵyr shyqsa,atyń ozady, Aýylyńnan jaman shyqsa eliń tozady», degen eken babalarymyz. Aýylynyń qamyn jep, janamyn degen balaǵa ot berip, shabamyn degenge jigitke at-bergen ardaqty azamat Sembek Táýkeshulynyń qanashama jyldar boıy aýylǵa sińirgen eńbegi esh ketpeı, el aýzynda yqylaspen aıtylyp keledi eken. Joqtan bardy jasap, aýyl talanttarynnyń qanatyn qataıtyp bıikke ushýyna qamqorlyǵyn aıamaı júrgen, aýyl sportynyń janashyrynyń atyna arnalǵan bul jekpe-jekke Jetisý oblysynyń barlyq aýdandary men qatar Taldyqorǵandaǵy J.Úshkempirov atyndaǵy sporttaǵy daryndy balalarǵa arnalǵan mektep-ınternat, Saryózektegi Balalar men jasópirimder sport mektebi, Alakól aýdany, Lepsi aýylyndaǵy Sporttaǵy daryndy balalarǵa arnalǵan mektep-ınternattan 300 jýyq jasóspirim balýandar kelip jeńis úshin bozkilemde baryn saldy.
Balýandar aýyl ishinde ashylyp otyrǵan sý jańa sport keshenindegi kúres zalynda beldesti. Jańa zaman úlgisimen boı kótergen aıtýly ǵalamat sport orny Ánýar Nasanbekov, Beıbit Túmenbaev, Birjan Shakırov, Amanjol Asýbaev pen Tasqyn Kýrneev syndy aýyldyń sportqa janashyr jandarynyń bilek qosyp, birlese jasaǵan jumystaryń jemisi bolsa kerek. Tórteý túgel bolsa tóbedegi keledi degen osy emes pe.
Sembek Táýkeshuly Qusaıynovtyń júldesine arnalǵan Jetisý oblystyq týrnıriniń ashylýy da joǵary deńgeıde jalaýyn kóterdi. Qyzyljar aýylynyń aqsaqaldar alǵasynyń tóraǵasy Baıan Syrlybaev aqsaqal jalyndy jas bota balýandarǵa aqbatasyn bergenenen keıin, elimizdiń ánurany oınalyp, tartysty jekpe-jekter bastalyp ketti. «Jaqsy kelse qoı egiz týady», dep jatady demekeshi, Qyzyljar aýylyna ákimi bolyp jańadan saılanǵan Asylan Erlanuly kelgeli beri aıaǵy qut boldy dep aýyl halqy jaqsylyqa jorıdy eken. Mine, han saraıyndaı kúres zaly salynyp, aýylda medıınalyq ambýlatorııanyń qurylysy bitip el saýlyǵy jaqsara túsipti. Yntymaq-uıymynan degen, biri bas, biri qol, biri qanat bolǵan aýyldyń aýzyn ashsa júregi kórinetin, aqjúrek, aqkóńil abzal azamattarynyń arqasynda sport qumar balalarǵa endi záýlim kúres zaly ashylyp qut ústine qut qonyp otyr. Sonymen jańadan tusaýy kesilgen kúres zalyn ishinde ótken dúbirli oblystyq jarysta jeńis úshin kúnuzaq ter tókken balýandardyń arasynan topjaryp tuǵyrǵa kóterilgenderi laıyqty marapattaryn aldy. Topjarǵan daryndy jas balýandardyń arasynan Nurıslam Satymbaı, Ibragım Imataı, Temirlan Saǵynaev synda oblystyq jáne respýblıkalyq jarystarda júldeli bolyp júrgen saıdyń tasyndaı sańylaq balýandardyń kúresine aýyl kórermenderi qyzyǵy tamashalap, qol soǵyp úlken áser aldy.
«Kúıkentedyń kúıin bilgen-suńqar etedi», demekshi, talantty balaǵa baryn salyp jattyqtyryp, qanatyn kamdap jatqan aýyl-aımaqtardaǵy bapkerlerdiń de eńbegi orasan ekenin bilemiz. Sondyqtan da bapkerler jalaqysyn kóbeıtip, nátıje bergenderine kólemdi syıaqy úzbeı berilip otyrsa artyq bolmas edi. Osy Qyzyljarǵa kelgen saparda qanshama jyldar boıy bapker bolyp, tańdap alǵan mamandyǵynyń jemisin kórip kelgen Ánýar Nysanbaev syndy azamatty ekiniń bir maqtanyshpen aıtatyna kýá boldyq. Aýyldyń alǵysyn ǵana alatyn aýyl bapkeriniń kóptegen muzbalaq, tanymal balýandardy tárbıelep shyǵarǵandyǵyn estip bildik. Jemisin úzbeı beretin máýeli jemis aǵashy sekildi azamattyń izgi isine ábden tánti boldyq. «Oraǵyń ótkir bolsa qaryń talmaıdy», demekshi, daryny boıynda týlap turǵan aýyldyń jalyndy jas balýandarynyń kúresi kóz qýantady. Jaqsylyq Úshkempirov, Dáýlet Turlyhanov, Ábilseıit Aıhanov, Amanjol Buǵybaev, Asqantaı Imanqulov sekildi ataqty apaıtós balýandardyń barlyǵy da aýyldan shyqqan dep maqtana aıtamyz. Sol ata býyn qulager balýandardyń izin basqan osy balaqaılardyń arasynan erteń álem, olımpıda jeńimpazdaryna shyǵatynana senim zor. Oǵan keshe ǵana Parıj olımpıdasanynda jeńiske jetken altyn alqaly baýyrymyz Eldos Smetov pen kúmisti oljalap kelgen Demeý Jadyraevtardy aıtsa jetip jatyr emes pe. Sondyqtan da bota balýandarymyzdyń arasynan ata býyn, aǵa býyn juldyzdy balýandardyń izbasarlary kóptep shyǵatyny senim zor. Aýyl sportynyń janashyry, Kerbulaq aýdanynyń azamaty, Qusaıynov Sembek Táýkeshulynyń arnalǵan alaman báseke máresine jetip baýlandar úlken ásermen úılerine attandy. Bul jarysty uıymdastyrýshylar alla buıyrtyp jatsa aldaǵy jyly dástúrlik qylyp, respýblıkalyq deńgeıge kóterýdi maqsat etip otyr eken. Aýyl talanttarynyń tomaǵasyn túrip, erkin kúreske qyzyǵýshylyqtaryn arttyýǵa úles qosar taǵy bir dúbirli jarys dúnıege kelip otyr. Olaı bolsa aldynan jarylqasyn deımiz.
Aqyn ORDABAIULY,
ALMATY
