جەڭىسىمەن جەلپىنتكەن جاستار

قازىرگى كەزدە ەلىمىزدە كەنجەلەپ كەلە جاتقان سپورت تۇرلەرىنىڭ ىشىندە ەڭسەسىن بيىك ۇستاپ تۇرعان ءبىر سپورت ءتۇرى بولاتىن بولسا ول مەيبۋاكان گودزيۋرۋ كاراتە-دو ەكەنىن ايتۋعا بولادى. وسى سپورت تۇرىندە جاتتىعاتىن قاراكوز جاستارىمىزدىڭ كوپشىلىگى بۇگىندە  الەم جارىستارىندا  توپجارا باستادى.

گودزيۋرۋ مەيبۋكان كاراتە تۇرىندە كىرپىش، اعاش سەكىلدى قاتتى زاتتاردى ساۋساقتاردىڭ  ۇشىمەن سىندىرۋ سەكىلدى جاتتىعۋلارى بار. بۇل ارينە،  كوپ جاتتىعىپ، شىنىققاننىڭ ناتيجەسىندە جاسايتىن «تامشاۆاري» اتتى   كۇردەلى  جاتتىعۋ ەكەنى بەلگىلى. وسىنداي قيىن ادىستەردى كەرەگىنە ءتيىمدى قولدانۋ حاس شەبەردىڭ عانا قولىنان كەلەتىن شارۋا. نەگىزى وسى ءبىر جاراقاتى الۋ جاعىنان الدا تۇرعان سپورت ءتۇرى بولسا دا باتىر ەلدىڭ ۇرپاعى قازاق بالالارى وتە قۇشتارلىقپەن اينالىسىپ كەلەدى. بۇل سپورت تۇرىندە شەكەتۋ جوق. اينالىسقاندارعا جاس شاماسى شەكتەلگەن بە؟ نەگىزى گودزيۋرۋ مەيبۋكان كاراتە سپورتىنا قىزىعىپ كەلۋشىلەردىڭ اراسىندا نەبىر تاۋسوعار الىپ دەنەلى جاستار كەلگەنىمەن، بۇل سپورتتىڭ قۇپياسىن تۇسىنبەگەندىكتەن تاستاپ كەتىپ جاتادى ەكەن. اسىرەسە، كىرپىش سىندىرۋ سەكىلدى جاتتىعۋلارعا كەلگەندە، ساعى سىنىپ قولدارىن اۋىرتىپ، كەتىپ قالاتىندار كوپتەپ تابىلىپ جاتادى. ال، باستى قۇپياسى دەنەنى قاتايتۋ، دۇرىس تىنىس الۋ ادىستەرىنە كوپ كوڭىل ءبولۋ ەكەندىگىن ءمان بەرە بەرمەيدى. سوندىقتان ايتۋلى سپورتتىڭ مايىن ءىشىپ جىلىگىن شاققان مامان باپكەرلەر، قاتتى زاتتاردى سىندىرۋعا كەلگەندە، مىندەتتى تۇردە تىنىس الۋ جۇيەسىنە اسا ءمان بەرۋ كەرەكتىگىن ەسكەرتەدى.

سوڭعى جىلدارى سپورتتىڭ وسى ءتۇرى ەلىمىزدە قارقىندى دامىپ كەلەدى. ءيا، سۇيىكتى سپورت تۇرىنە جان تانىمەن بەرىلىپ، سايا تاپقان كەيبىر ارقالى ازماتتاردىڭ ارقاسىندا ول قازاق جەرىندە دە قاناتىن كەڭىنەن جايا باستادى. سونداي ءبىر جاننىڭ ءبىرى، قازاقستان رەسپۋبليكاسى مەيبۋكان گودزيۋريۋ كاراتە-دو اسسوتسياتسياسىنىڭ پرەزيدەنتى، قارا بەلبەۋ 4 دان يەگەرى نۇرلان كەرىمبەكوۆتى ايتساق بولادى. نۇرلاننىڭ ارمانى الەمنىڭ ءار تۇكپىرىندە وسى سپورتتان وتەتىن بايراقتى باسەكەلەردە كوك تۋىمىزدى جەڭىس تۇعىرىنان جەلبىرەتۋ ەكەن. ەلىم دەيتىن ەر بولماسا، ەرىم دەيتىن ەل قايدان  بولسىن دەگەندەي، ەلىم دەپ، ەلەۋلى ەڭبەگىمەن العىسقا بولەنە باستاعان نۇرلان كەرىمبەكوۆتەي ەر تۇلعالى، ءوز تاڭداعان سپورتىنا جاناشىر جانداردىڭ ارقاسىندا  كەنجەلەپ بولسا  دا كەلىپ قوسىلعان، گودزيۋرۋ مەيبۋكان كاراتە-دو ءتۇرى، قازىردىڭ وزىندە ايتارلىقتاي تابىستارعا قول جەتكىزە باستادى.

ونىڭ ايعاقتارى جەتەرلىك دەسەك سونىڭ ءبىرى جۋىردا ودەسسادا وتكەن ەۋروپا كۋبوگى بولىپ سانالادى.

ۋكراينادا جالاۋىن جەلبىرەتكەن  گودزيۋريۋ كاراتە –دو  دان الەم كۋبوگى ءۇشىن 15 مەملەكەتتىڭ  قاتىسۋىمەن ءدۇبىرلى جارىس ءوتىپ، قازاقستاندىق ءجاسوپىرىم شەبەرلەر 13 التىن، 8 كۇمىس، 5 قولا مەدالداردى جەڭىپ الىپ، جالپى كوماندالىق 2 ورىندى يەلەنىپ كەلدى. قازاقستان قۇراماسى الدىنا تەك الاڭ يەلەرى ۋكراينالىقتاردى عانا جىبەرىپ العان ەكەن. جوعارى دەڭگەيدە  ۇيىمداستىرىلعان بۇل تۋرنيردە مەيبۋكان گودزيۋريۋ كاراتە-دو اسسوتسياتسياسىنىڭ پرەزيدەنتى،  نۇرلان كەرىمباەۆ باستاپ بارعان جالىندى جاس قازاقتىڭ قايسار ۇل-قىزدارى تاماشا كورسەتكەن ونەرلەرىمەن كورەرمەندەردىڭ كوڭىل تورىنەن ورىن الىپتى. قازاقستاندىق جاس تالانتتار كاتا، كوبۋدو، شوبۋ كۋميتە، يريكۋمي دزيۋ، يريكۋمي گو جاتتىعۋلارى بويىنشا سىنعا ءتۇسىپ،  جەڭىس تۇعىرىن ەشكىممەن بولىسپەۋ ءۇشىن جانكەشتى جەكپە-جەكتەرىن وتكىزگەن ەكەن. ناتيجەسىندە ايبارلى دا ايبىندا  الاشتىڭ جاس ۇلاندارى جەڭىس تۇعىرىنىڭ بارلىق ساتىسىنان كورىنىپ، ەلىمىزدىڭ ابىرويىن اسقاتاتىپ قايتتى. ەندىگى ماقسات الەم جارىسىندا وسى جەتكەن جەتىستىكتى قايتالاۋ. ەندەشە جىگەرلى جاستارىمىزعا ساتتىلىك تىلەيمىز.

اقىن ورداباي ۇلى 

الماتى