جىلدىڭ ۇزدىكتەرى توردەن كورىندى

استانادا تۋريزم جانە سپورت مينيسترلىگىنىڭ ۇيىمداستىرۋىمەن جىل سايىنعى «ۇزدىك-2024» سىيلىعىنىڭ جەڭىمپازدارىن ماراپاتتاۋ ءىس-شاراسى بولدى، دەپ حابارلادى تسم.

سالتاناتتى جيىنعا پارلامەنتتىڭ دەپۋتاتتارى، وليمپيادا چەمپيوندارى مەن جۇلدەگەرلەرى، الەم چەمپيوندارى مەن مەداليستەرى، حالىقارالىق جارىستاردىڭ جەڭىمپازدارى مەن جۇلدەگەرلەرى، سپورت جۋرناليستەرى قاتىستى.

تۋريزم جانە سپورت ءمينيسترى ەربول مىرزابوسىنوۆ 2024 جىل وتاندىق سپورت ءۇشىن ەرەكشە جىل بولعانىن اتاپ ءوتتى. قازاقستان سپورتشىلارى بيىل حالىقارالىق ءىرى جارىستاردا تابىستى ناتيجە كورسەتسە، ەلىمىزدە ءىرى جارىستار ۇيىمداستىرىلدى.

بيىلعى جىلدىڭ باستى دوداسى پاريج وليمپياداسى مەن پاراليمپيادا بولدى. ءبىزدىڭ قۇراما تاريحي جەتىستىكتەرگە جەتتى. دزيۋدوشى ەلدوس سمەتوۆ وليمپيادا چەمپيونى اتاندى. بۇل – تاۋەلسىز قازاقستان تاريحىندا دزيۋدودان بۇيىرعان العاشقى التىن مەدال. گيمناستيكادان العاش رەت وليمپيادا مەدالىن جەڭىپ الدىق. ول جۇلدە ناريمان قۇربانوۆقا بۇيىردى. داۆيد دەگتيارەۆ پارا-پاۋەرليفتينگتەن ەكى دۇركىن پاراليمپيادا چەمپيونى اتاندى. پارا-دزيۋدوشى اقمارال ناۋاتبەك وليمپيادا شىڭىن باعىندىردى، – دەدى مينيستر.

سونىمەن قاتار بيىل استانادا V دۇنيەجۇزىلىك كوشپەندىلەر ويىنى ۇيىمداستىرىلدى. كوشپەندىلەر دوداسىنا 89 ەلدىڭ سپورتشىلارى قاتىستى. قازاقستان قۇراماسى جالپىكوماندالىق ەسەپتە توپ جاردى.

مەملەكەت باسشىسى قاسىم-جومارت كەمەل ۇلى توقاەۆتىڭ قولداۋىمەن سپورت سالاسىندا وڭ وزگەرىستەر باستالدى. كەلەسى جىلى وتاندىق سپورتشىلاردى بىرنەشە دودا كۇتىپ تۇر. 2025 جىلدىڭ اقپان ايىندا سپورتشىلارىمىز قىتايدىڭ حاربين قالاسىندا وتەتىن قىسقى ازيا ويىندارىنا قاتىسىپ، قىسقى وليمپيادا ليتسەنزياسى ءۇشىن سىنعا تۇسەدى. تاريح قويناۋىنا ەنىپ بارا جاتقان 2024 جىلى سپورتشىلارىمىز جامان ناتيجە كورسەتكەن جوق، جاڭا جىلدان ودان دا ۇلكەن جەڭىستەر كۇتەمىز، – دەدى ەربول مىرزابوسىنوۆ.

جىل قورىتىندىسى بويىنشا «ۇزدىك» دەپ تانىلعاندار:

🔹 ەلدوس سمەتوۆ، داۆيد دەگتيارەۆ – «جىلدىڭ ۇزدىك سپورتشىسى»;

🔹 عالىمجان جىلگەلديەۆ، يۋري كولەسنيكوۆ – «جىلدىڭ ۇزدىك جاتتىقتىرۋشىسى»;

🔹 گرەك-ريم، ەركىن جانە ايەلدەر كۇرەسى فەدەراتسياسى – «جىلدىڭ ۇزدىك اككرەديتتەلگەن سپورت فەدەراتسياسى»;

🔹قۋانىشبەك ەسەكەەۆ، قازاقستان دزيۋدو فەدەراتسياسىنىڭ پرەزيدەنتى – «جىلدىڭ ۇزدىك اككرەديتتەلگەن سپورت فەدەراتسياسىنىڭ پرەزيدەنتى»;

🔹ەركەبۇلان ءىلياسوۆ، «جامبى اتۋ فەدەراتسياسى» رقب پرەزيدەنتى – «ۇزدىك سپورت مەتسەناتى»;

🔹Kaz Minerals — «ۇزدىك سپورت مەتسەناتى»;

🔹عيزات تۇسىپاەۆ – «جىلدىڭ ۇزدىك اۋىل جاتتىقتىرۋشىسى»;

🔹ەرلان تاسبولاتوۆ – «اۋىلدىق جەردەگى ۇزدىك دەنە شىنىقتىرۋ جانە سپورت ادىسكەرى»;

🔹دارحان شاريعاتوۆ – «اۋىلدىق جەردەگى ۇزدىك دەنە شىنىقتىرۋ جانە سپورت نۇسقاۋشىسى»;

🔹ماقات اۋداندىق مادەنيەت، تىلدەردى دامىتۋ، دەنە شىنىقتىرۋ جانە سپورت ءبولىمى – «اۋداندىق ۇزدىك دەنە شىنىقتىرۋ جانە سپورت ءبولىمى»;

🔹الماتى قالاسىنداعى «جوعارى سپورت شەبەرلىگى مەكتەبى» – «جىلدىڭ ۇزدىك سپورت ۇيىمى»;

🔹جامبىل وبلىسى اكىمدىگىنىڭ دەنە شىنىقتىرۋ جانە سپورت باسقارماسى – «ۇزدىك سپورتتىق ءوڭىر»;

🔹يليا ميزەرنىح – «جاس جانە جاسوسپىرىمدەر قۇرامىنداعى سپورتشى»;

🔹سەرگەي سەرگەەۆ – «جىلدىڭ ۇزدىك بالالار جاتتىقتىرۋشىسى»;

🔹نادەجدا كيم – «دەنە شىنىقتىرۋ جانە سپورت سالاسىنداعى ۇزدىك مامان»;

🔹اقمارال ناۋاتبەك – «سپورتتا ۇزدىك سەرپىن»;

🔹جاندوس ايتباي ۇلى («حابار» تەلەارناسى)، قۋانىش نۇردانبەك ۇلى («Egemen Qazaqstan» گازەتى)، نازەركە سۇلتانبەك («Sport+» سايتى) – سەيداحمەت بەردىقۇلوۆ اتىنداعى سىيلىقتىڭ لاۋرەاتتارى.

بيىل سەيداحمەت بەردىقۇلوۆ اتىنداعى   سىيلىقتىڭ لاۋرەاتى بولىپ،  ۇزدىكتەر قاتارىنان كورىنگەنىمىزگە قۋانىشتىمىن. بايقاۋعا «Egemen Qazaqstan» گازەتىندە جاريالانعان ماقالامىزدى ۇسىنىپ، جۇلدەلى بولدىق. بيىكتەن كورىنۋىمىزگە ۇجىمنىڭ سەبى مول. قولداعان بارلىق ارىپتەستەرىمە العىس ايتامىن، — دەدى قۋانىش نۇردانبەك ۇلى.