SportPress.kz قازاقستان سپورت جاڭالىقتارى
مەملەكەت باسشىسى قاسىم-جومارت توقاەۆ كۇرەستىڭ حالىقارالىق سپورت ارەناسىنداعى ەلىمىزدىڭ بەدەلىن نىعايتۋدا ايتارلىقتاي رولگە يە ەكەنىن ايتتى. سونىمەن قاتار الەمدىك تۋرنيرلەردە تابىستى ونەر كورسەتىپ جۇرگەن وتاندىق بالۋانداردىڭ جەتىستىكتەرىن جوعارى باعالادى، دەپ حابارلادى اقوردا.
مەملەكەت باسشىسى قازاقستاننىڭ حالىقارالىق كۇرەس فەدەراتسياسىمەن ستراتەگيالىق ىنتىماقتاستىقتى ودان ءارى ارتتىرۋعا نيەتتى ەكەنىن مالىمدەدى. قاسىم-جومارت توقاەۆتىڭ ايتۋىنشا، ينفراقۇرىلىمدى جەتىلدىرۋ، دايارلىقتىڭ وزىق ادىستەرىن ەنگىزۋ جانە ەلىمىزدە حالىقارالىق تۋرنيرلەردى وتكىزۋ وسى سپورت ءتۇرىنىڭ تانىمالدىلىعى مەن باسەكەگە قابىلەتتىلىگىن ەسەلەۋگە ىقپال ەتەدى.
نەناد لالوۆيچ قوناقجايلىق تانىتقانى ءۇشىن قاسىم-جومارت توقاەۆقا ريزاشىلىعىن ءبىلدىرىپ، ىقپالداستىقتى جالعاستىرۋعا دايىن ەكەنىن جەتكىزدى. ول قازاقستاندى فەدەراتسيانىڭ ماڭىزدى سەرىكتەسى دەپ اتاپ ءوتىپ، ءبىزدىڭ ۇلتتىق كۇرەس مەكتەبىنىڭ زور تابىستارىنا توقتالدى. نەناد ءلالوۆيچتىڭ ايتۋىنشا، قازاقستاندىقتاردىڭ دەنى ساۋ ۇلت قالىپتاستىرۋعا ۇمتىلىسى سپورت پەن باسقا دا سالالاردا جوعارى ناتيجەگە قول جەتكىزۋگە سەپتىگىن تيگىزەدى.
كەزدەسۋدە قازاقستاننىڭ الەمدىك سپورت قوعامداستىعىنداعى بەدەلىن نىعايتۋ جانە باسىمدىققا يە سپورت ءتۇرى رەتىندە كۇرەستى ودان ءارى ىلگەرىلەتۋ پەرسپەكتيۆاسى تالقىلاندى.
كەزدەسۋ سوڭىندا مەملەكەت باسشىسى قازاقستانداعى كۇرەستى دامىتۋعا قوسقان ۇلەسى ءۇشىن حالىقارالىق كۇرەس فەدەراتسياسىنىڭ پرەزيدەنتىن II دارەجەلى «دوستىق» وردەنىمەن ماراپاتتادى.
