كاراتەدەن ەل قۇراماسى ءتورت التىن مەدال الدى

ءباا-ءنىڭ فۋدجەيرا قالاسىندا جاستار اراسىنداعى ا سەرياسىنىڭ 2025 جىلداعى العاشقى ءتۋرنيرى اياقتالدى، دەپ حابارلادى قازاقستان كاراتە فەدەراتسياسىنىڭ ءباسپاسوز قىزمەتى.

بۇل سىندا قازاقستان سپورتشىلارى 11 مەدالمەن (4 التىن، 7 قولا) جالپى ەسەپتە 4-ساتىعا جايعاستى. كوش باسىندا رەسەي، ودان كەيىن يران مەن مىسىر كومانداسى.

العاشقى التىن جۇلدەنى كۋميتە باعدارلاماسىندا دىنمۇحاممەد ايداربەك (U16-17) 55 كگ دەيىنگى سالماقتا توپ جارىپ، قورجىنعا سالدى. ول 2023 جىلى وسى فۋدجەيراداعى جارىستا ءۇشىنشى ورىن العان.

وسىدان كەيىن 14-15 جاس ساناتىندا نۇراسىل نۇرسەيىت (-52 كگ) پەن سۇڭقار قانيبەك (-70 كگ) جەڭىمپاز اتاندى. ول اسا تارتىستى وتكەن فينالدا ماكسيم ۆيەچكانوۆتى (ۋكراينا)، سۇڭقار حورۆاتيا وكىلىن تىزە بۇكتىردى. ال شەشۋشى جارىس كۇنى اياۋلىم تىلەكتەس (-47 كگ) بارلىق 6 جەكپە-جەكتە قارسىلاسىن جەڭىپ، مىقتى ەكەنىن كورسەتتى.

قولا مەدال جەڭىپ الىپ، ۇزدىك ۇشتىكتى كىرگەن سپورتشىلارىمىزدىڭ ءتىزىمى:

U21 جاس ساناتى — اقنيەت شەريزات (-55 كگ)

U16-17 جاس ساناتى — گۇلنۇر قويشىباي (-59 كگ);

U14-15 جاس ساناتى — امير كەڭەسباي (-52 كگ)، رۋسلان ەركىن (-57 كگ)، باتىر ءادىل (-57 كگ);

U12-13 جاس ساناتى — ارنۇر مۇرات (-45 كگ) پەن ينسار احماديەۆ (-50 كگ);

ايتا كەتەيىك، فۋدجەيراداعى تۋرنيرگە 87 مەملەكەتتەن 2400-گە جۋىق سپورتشى جينالدى. قازاقستاننان بيىل بارلىعى 140 كاراتەشى سىنعا ءتۇستى. جاستار اراسىنداعى سەريانىڭ كەلەسى كەزەڭى گۆادالاحارا قالاسىندا (يسپانيا) بولادى.