Karateden el quramasy tórt altyn medal aldy

BAÁ-niń Fýdjeıra qalasynda jastar arasyndaǵy A serııasynyń 2025 jyldaǵy alǵashqy týrnıri aıaqtaldy, dep habarlady Qazaqstan karate federaııasynyń baspasóz qyzmeti.

Bul synda Qazaqstan sportshylary 11 medalmen (4 altyn, 7 qola) jalpy esepte 4-satyǵa jaıǵasty. Kósh basynda Reseı, odan keıin Iran men Mysyr komandasy.

Alǵashqy altyn júldeni kýmıte baǵdarlamasynda Dinmuhammed Aıdarbek (U16-17) 55 kg deıingi salmaqta top jaryp, qorjynǵa saldy. Ol 2023 jyly osy Fýdjeıradaǵy jarysta úshinshi oryn alǵan.

Osydan keıin 14-15 jas sanatynda Nurasyl Nurseıit (-52 kg) pen Suńqar Qanıbek (-70 kg) jeńimpaz atandy. Ol asa tartysty ótken fınalda Maksım Vıechkanovty (Ýkraına), Suńqar Horvatııa ókilin tize búktirdi. Al sheshýshi jarys kúni Aıaýlym Tilektes (-47 kg) barlyq 6 jekpe-jekte qarsylasyn jeńip, myqty ekenin kórsetti.

Qola medal jeńip alyp, úzdik úshtikti kirgen sportshylarymyzdyń tizimi:

U21 jas sanaty — Aqnıet Sherızat (-55 kg)

U16-17 jas sanaty — Gúlnur Qoıshybaı (-59 kg);

U14-15 jas sanaty — Amır Keńesbaı (-52 kg), Rýslan Erkin (-57 kg), Batyr Ádil (-57 kg);

U12-13 jas sanaty — Arnur Murat (-45 kg) pen Insar Ahmadıev (-50 kg);

Aıta keteıik, Fýdjeıradaǵy týrnırge 87 memleketten 2400-ge jýyq sportshy jınaldy. Qazaqstannan bıyl barlyǵy 140 karateshi synǵa tústi. Jastar arasyndaǵy serııanyń kelesi kezeńi Gvadalahara qalasynda (Ispanııa) bolady.