بۇل ويىنعا «ءۇش» دەگەن باعا قويامىز!

ماروچكين سەكىلدى شارشاپ قالعان كونە ويىنشىلارمەن جاڭا كوماندا قۇرامىن دەگەن اليەۆتىڭ ويىن تۇسىنبەدىك. نۇرالى ءالىپ تە كوپ قاتەلىك جىبەردى. دوپتى ارىپتەسىنە دۇرىس بەرە المايدى. سوسىن ول قورعاۋشى ەمەس پە؟! اۋزىن اشىپ اي قاراپ، جۇلدىز ساناپ جۇرگەندە جەلدەي جىلدام زۋىلداعان قارسىلاستارى جىلدام ءوتىپ كەتىپ جاتىر.

ۆوروگوۆسكي، چەسنوكوۆ، تاپالوۆتاردى ات مىنگىزىپ، زەينەتكە شىعارىپ سالسا بولار ەدى. اتتەڭ داستان ساتپاەۆ، عالىمجان كەنجەبەكتەردى سارى مايداي ساقتاماي ءبىرىنشى تايمنان باستاپ شىعارماعانى تاعى تۇسىنىكسىز. ولار جاس قوي 90 مينۋت تالماي جۇگىرىپ بەرەر ەدى. ابات ايىمبەتوۆ تە ءوزىن كورسەتە المادى. اسحات تاعىبەرگەن دە قيىس تەۋىپ، دەر كەزىندە اشىلا بىلمەيدى. جىلدامدىعى دا شابان. ءيا باقتيار زاينۋدينوۆتىڭ ورنى ويسىراپ تۇرعانى انىق. بىراق مىنانداي كارى-قۇرتاڭ ويىنشىلارمەن سول باياعى بايعوجانىڭ تاياعى بولىپ قالعان سياقتى كورىندى.

قىسقاسى مەن ءالي اليەۆ ءبىر جاڭا تاكتيكا، جاڭا ويىنشىلارمەن سەرپىلىس اكەلە مە، فۋتبولىمىزدىڭ بويىنا قان جۇگىرتە مە دەپ ويلاعان ەدىم. ولاي بولىپ شىقپاعانى وكىنتەدى. قايرات نۇرداۋلەتوۆ، اسقار قوجابەرگەنوۆ سەكىلدى جانى قازاق، ءتىلى قازاق، نامىستى تاجىربيەلى ماماندار كەلسە دەپ ارمانداپ ەدىم. وكىنىشكە وراي، سول لوريالاردىڭ تانىس تامىرلارى فۋتبول شارۋاشىلىعىن باسقارىپ وتىرعان سياقتى. «اتتەگەن-اي دەگەن سايىن اقىل كىرەدى»، دەگەن بولار ما قالاي؟ سوسىن ءبىزدىڭ ويىنشىلاردىڭ باستى قاتەلىگى اسىرەسە، قورعاۋشىلاردىڭ ارتتا جالعىز تۇرىپ الداسۋى ول نەسى؟ اينالايىن-اۋ العا اسىرىپ تەبە سالسا نە كەتەدى.

قاقپاشىمىز زارۋتسكي ءبىر گولدى الداپ ءوتىپ تەبەمىن دەپ قاقپاسىنا جىبەرىپ الا جازدادى. ولاي الداۋ، تەحنيكا وندا قايدان بولسىن. قاۋىپتى ەكەنىن بىلە تۇرا سونداي ەسسىز قادامعا بارىپ جاتىر. تۇسىنبەيمىن، بۇل قاقپاشىنى قايدان قازىپ العان؟ ءوزىمىزدىڭ سەيسەندى قويسا نە بولار ەدى؟ ونىڭ مىنا قاقپاشىدان قاي جەرى كەم؟ جاۋاپتان سۇراق كوپ ويىن بولدى. وتە ءساتسىز باستاما. تاكتيكا دۇرىس قۇرىلماعان. ارتتا جاتىپ الىپ قارىمتا شابۋىلدى قاۋجايتىن ءجونسىز ءبىر تاكتيكانى قالاپ الىپتى. ونىڭ ۇستىنە قاقپانى قورىقپاي ەنتەلەپ بارىپ كوزدەپ سوعاتىن ويىنشىنى كورمەدىم. ماعان تەك ساتپاەۆ پەن جۋكوۆتىڭ ءسال بەلسەندىلگى ۇنادى. سۇيسىنە قاراي المايتىن سۇرەڭسىز ويىن بولدى. قالعاندارىنا «ءۇش» ءتىپتى ەكى دەگەن باعا قويار ەدىم. قايران قازاعىم-اي قاشان فۋتبول جونگە كەلەدى ەكەن؟

اقىن ورداباي ۇلى،

الماتى