Bul oıynǵa «Úsh» degen baǵa qoıamyz!

Marochkın sekildi sharshap qalǵan kóne oıynshylarmen jańa komanda quramyn degen Álıevtiń oıyn túsinbedik. Nuraly Álip te kóp qatelik jiberdi. Dopty áriptesine durys bere almaıdy. Sosyn ol qorǵaýshy emes pe?! Aýzyn ashyp aı qarap, juldyz sanap júrgende jeldeı jyldam zýyldaǵan qarsylastary jyldam ótip ketip jatyr.

Vorogovskıı, Chesnokov, Tapalovtardy at mingizip, zeınetke shyǵaryp salsa bolar edi. Átteń Dastan Sátpaev, Ǵalymjan Kenjebekterdi sary maıdaı saqtamaı birinshi taımnan bastap shyǵarmaǵany taǵy túsiniksiz. Olar jas qoı 90 mınýt talmaı júgirip berer edi. Abat Aıymbetov te ózin kórsete almady. Ashat Taǵybergen de qıys teýip, der kezinde ashyla bilmeıdi. Jyldamdyǵy da shaban. Iá Baqtııar Zaınýdınovtyń orny oısyrap turǵany anyq. Biraq mynandaı kári-qurtań oıynshylarmen sol baıaǵy Baıǵojanyń taıaǵy bolyp qalǵan sııaqty kórindi.

Qysqasy men Álı Álıev bir jańa taktıka, jańa oıynshylarmen serpilis ákele me, fýtbolymyzdyń boıyna qan júgirte me dep oılaǵan edim. Olaı bolyp shyqpaǵany ókintedi. Qaırat Nurdáýletov, Asqar Qojabergenov sekildi jany qazaq, tili qazaq, namysty tájirbıeli mamandar kelse dep armandap edim. О́kinishke oraı, sol Lorııalardyń tanys tamyrlary fýtbol sharýashylyǵyn basqaryp otyrǵan sııaqty. «Áttegen-aı degen saıyn aqyl kiredi», degen bolar ma qalaı? Sosyn bizdiń oıynshylardyń basty qateligi ásirese, qorǵaýshylardyń artta jalǵyz turyp aldasýy ol nesi? Aınalaıyn-aý alǵa asyryp tebe salsa ne ketedi.

Qaqpashymyz Zarýkıı bir goldy aldap ótip tebemin dep qaqpasyna jiberip ala jazdady. Olaı aldaý, tehnıka onda qaıdan bolsyn. Qaýipti ekenin bile tura sondaı essiz qadamǵa baryp jatyr. Túsinbeımin, bul qaqpashyny qaıdan qazyp alǵan? О́zimizdiń Seısendi qoısa ne bolar edi? Onyń myna qaqpashydan qaı jeri kem? Jaýaptan suraq kóp oıyn boldy. О́te sátsiz bastama. Taktıka durys qurylmaǵan. Artta jatyp alyp qarymta shabýyldy qaýjaıtyn jónsiz bir taktıkany qalap alypty. Onyń ústine qaqpany qoryqpaı entelep baryp kózdep soǵatyn oıynshyny kórmedim. Maǵan tek Sátpaev pen Jýkovtyń sál belsendilgi unady. Súısine qaraı almaıtyn súreńsiz oıyn boldy. Qalǵandaryna «úsh» tipti eki degen baǵa qoıar edim. Qaıran qazaǵym-aı qashan fýtbol jónge keledi eken?

Aqyn ORDABAIULY,

ALMATY