Otandasymyz AQSh-ta top jardy

AQSh-tyń Los-Andjeles qalasynda ótken halyqaralyq taekvondo jarysynda Ádilet Bazarbaev altyn medal jeńip aldy.

17 mamyrda AQSh-tyń Los-Andjeles qalasynda ornalasqan Industry Hills Expo Center-de «International Taekwondo Fest 2025» týrnıri boldy. Bul jarysqa álemniń ár túkpirinen kelgen 300-den asa sportshy qatysyp, ózara myqtyny anyqtady.

Oǵan Qazaqstan atynan qatysqan Ádilet Bazarbaev erekshe kózge túsip, 63 kg salmaq dárejesinde altyn medal jeńip aldy. Ol úsh birdeı qarsylasyn jeńip, sheberligi men myqty daıyndyqtyń naqty úlgisin kórsetti.

Alǵashqy jekpe-jekte Taha Khozema KHAMBATI-men kezdesip, senimdi túrde jeńiske jetti.

Ekinshi aınalymda Stanley LOPEZ-pen tartysty kezdesýde basymdyq tanytty.

Fınalda Alden RYU-men bolǵan sheshýshi jekpe-jekte jeńisti julyp alyp, birinshi oryndy qanjyǵasyna baılady.

Ádilettiń bul jeńisi — tek onyń jeke jetistigi ǵana emes, sonymen qatar qazaq taekvondosynyń halyqaralyq arenadaǵy bedelin arttyratyn mańyzdy qadam. Onyń tabandylyǵy men sportqa degen jaýapkershiligi jas býynǵa úlgi bolary sózsiz.

2025 jylǵy International Taekwondo Festival (ITF) — AQSh-taǵy eń bedeldi jáne aýqymdy taekvondo jarystarynyń biri. Bul festıval tek sporttyq jarys qana emes, sonymen qatar halyqaralyq mádenı almasý men dostyqty nyǵaıtatyn mańyzdy platforma.

Festıvalge álemniń túkpir-túkpirinen kelgen sportshylar men komandalar qatysady. Meksıka ulttyq quramasynyń múshesi Damıan Vılla bul jarysty «álemdik deńgeıdegi sportshylarmen básekelesýge múmkindik beretin erekshe is-shara» dep sıpattaıdy.

 

Nurshahrızada SALIMOVA,

TARAZ