بۇل دۇنيە بەس كۇندىك جالعان ەكەن

بەلگىلى جۋرناليست دياس احمەتشارىپ فانيدەن باقيعا اتتاندى دەگەن قايعىلى حابار تارادى.

ول 20 جاسىنان بەرى قازاق سپورتىنا، ونىڭ ىشىندە قازاق سپورت جۋرناليستيكاسىنا اتاپ ايتارلىقتاي ەڭبەك ەتتى. دياس سوۆەتقالي ۇلى ەڭبەك جولىن 1997 جىلى قازاق راديوسىنىڭ رەپورتەرى بولىپ باستاعان ەدى. ۇزاق ۋاقىت Qazaqstan تەلەارناسى مەن Khabar اگەنتتىگىندە سپورت ءجۋرناليسى بولىپ جۇمىس ىستەدى.

ودان كەيىن Qazsport مەملەكەتتىك تەلەارناسىنىڭ ديرەكتورى بولدى. وسى قىزمەتتەن كەيىن Insport تەلەارناسىنىڭ باس رەداكتورى قىزمەتىن اتقاردى.

2003-2007 جىلدارى تۋريزم جانە سپورت ىستەرى اگەنتتىگىنىڭ ءباسپاسوز قىزمەتىنىڭ باسشىسى، ءباسپاسوز حاتشىسى بولسا، 2010 — 2012 جىلدارى «استانا-سك» كورپوراتيۆتىك قورىنىڭ قوعاممەن بايلانىس دەپارتامەنتىنىڭ ديرەكتورى (سپورتتى قولداۋ قورى) بولىپ قىزمەت ەتتى.

2012-2013 جىلدارى سپورت جانە دەنە شىنىقتىرۋ ىستەرى اگەنتتىگى توراعاسىنىڭ كەڭەسشىسى بولدى.

دياس احمەتشارىپ وليمپيادا جانە ازيا ويىندارىنىڭ، الەم چەمپيوناتتارىنىڭ سپورت شولۋشىسى جانە قازاقستان رەسپۋبليكاسى ۇلتتىق قۇراماسىنىڭ ءباسپاسوز اتتاشەسى جۇمىسىن دا ىستەدى.

بىلتىر تۋريزم جانە سپورت ءمينيسترىنىڭ قوعاممەن بايلانىس جانە باق جونىندەگى كەڭەسشىسى قىزمەتتەرىن اتقارعان. وسى جەردە جۇمىس ىستەي ءجۇرىپ، ول پاريج وليمپياداسىنا دايىندىق شتابىندا دا ۇلتتىق قۇرامانىڭ ءتورت جىلدا ءبىر اينالىپ كەلەتىن ءدۇبىرلى دوداعا دايىندىعى ماسەلەسىمەن دە اينالىستى. ءسويتىپ، كوپتەگەن جارىستار مەن سپورتتىق ءىس-شارالاردىڭ جاقسى وتۋىنە زور ۇلەس قوسىپ، ءوز ءىسىنىڭ ناعىز مامانى ەكەنىن كورسەتىپ ءجۇردى.

SportPress.kz اقپاراتتىق-ساراپتامالىق سپورت سايتى ارىپتەسىمىز دياس سوۆەتقالي ۇلى احمەتشارىپتىڭ مەزگىلسىز قازاسىنا بايلانىستى مارقۇمنىڭ اتا-اناسىنا، زايىبىنا، بالالارىنا، تۋعان-تۋىستارى مەن باسقا دا  جاقىندارىنا قايعىرىپ كوڭىل ايتادى.

مارقۇمنىڭ جانازا نامازى 24 مامىردا ساعات 10:30-دا استانا قالاسىنداعى رەسپۋبليكالىق باس مەشىتتىڭ جانازا الاڭىندا بولادى (ماڭگىلىك ەل داڭعىلى، 65).

اسى ساعات 11:00-دە جانە ساعات 13:00-دە Palazzo Di Astana مەيرامحاناسىندا بەرىلەدى (سىعاناق كوشەسى، 38).