SportPress.kz Qazaqstan sport jańalyqtary
Belgili jýrnalıst Dıas Ahmetshárip fánıden baqıǵa attandy degen qaıǵyly habar tarady.
Ol 20 jasynan beri qazaq sportyna, onyń ishinde qazaq sport jýrnalıstıkasyna atap aıtarlyqtaı eńbek etti. Dıas Sovetqalıuly eńbek jolyn 1997 jyly Qazaq radıosynyń reporteri bolyp bastaǵan edi. Uzaq ýaqyt Qazaqstan telearnasy men Khabar agenttiginde sport jýrnalısi bolyp jumys istedi.
Odan keıin Qazsport memlekettik telearnasynyń dırektory boldy. Osy qyzmetten keıin Insport telearnasynyń bas redaktory qyzmetin atqardy.
2003-2007 jyldary Týrızm jáne sport isteri agenttiginiń baspasóz qyzmetiniń basshysy, baspasóz hatshysy bolsa, 2010 — 2012 jyldary «Astana-SK» korporatıvtik qorynyń qoǵammen baılanys departamentiniń dırektory (Sportty qoldaý qory) bolyp qyzmet etti.
2012-2013 jyldary Sport jáne dene shynyqtyrý isteri agenttigi tóraǵasynyń keńesshisi boldy.
Dıas Ahmetshárip Olımpıada jáne Azııa oıyndarynyń, álem chempıonattarynyń sport sholýshysy jáne Qazaqstan Respýblıkasy ulttyq quramasynyń baspasóz attashesi jumysyn da istedi.
Byltyr Týrızm jáne sport mınıstriniń qoǵammen baılanys jáne BAQ jónindegi keńesshisi qyzmetterin atqarǵan. Osy jerde jumys isteı júrip, ol Parıj Olımpıadasyna daıyndyq shtabynda da ulttyq quramanyń tórt jylda bir aınalyp keletin dúbirli dodaǵa daıyndyǵy máselesimen de aınalysty. Sóıtip, kóptegen jarystar men sporttyq is-sharalardyń jaqsy ótýine zor úles qosyp, óz isiniń naǵyz mamany ekenin kórsetip júrdi.
SportPress.kz aqparattyq-saraptamalyq sport saıty áriptesimiz Dıas Sovetqalıuly Ahmetsháriptiń mezgilsiz qazasyna baılanysty marqumnyń ata-anasyna, zaıybyna, balalaryna, týǵan-týystary men basqa da jaqyndaryna qaıǵyryp kóńil aıtady.
Marqumnyń janaza namazy 24 mamyrda saǵat 10:30-da Astana qalasyndaǵy Respýblıkalyq Bas meshittiń janaza alańynda bolady (Máńgilik el dańǵyly, 65).
Asy saǵat 11:00-de jáne saǵat 13:00-de Palazzo Di Astana meıramhanasynda beriledi (Syǵanaq kóshesi, 38).
