SportPress.kz قازاقستان سپورت جاڭالىقتارى
قازاقستان قۇراماسىنىڭ باس جاتتىقتىرۋشىسى ءالي اليەۆ بەلارۋس قۇراماسىمەن جولداستىق ماتچ قارساڭىنداعى ءباسپاسوز ءماسليحاتىن وتكىزدى. ول تىلشىلەردىڭ الداعى ويىن مەن كوماندا جايلى ساۋالدارىنا جاۋاپ بەردى، دەپ حابارلادى قازاقستان فۋتبول فەدەراتسياسى.
– مىنە، ۇلتتىق قۇرامانىڭ باسى قوسىلاتىن ءسات كەلىپ جەتتى. بۇل – ەل بولىپ تىلەۋلەس بولاتىن ءسات. جىگىتتەر دايىن، ءبارى ويىندى كۇتىپ وتىر. بەلارۋس پەن سولتۇستىك ماكەدونيانىڭ ستيلدەرى ۇقساس. ەكەۋى دە ءۇش ورتالىق قورعاۋشىمەن وينايدى. سوندىقتان بىزگە وتە قولايلى سپاررينگ-سەرىكتەس تاڭدالدى. قۇرامىندا قازاقستان پرەمەر-ليگاسىندا ويناپ جۇرگەن تانىس فۋتبولشىلار بار. جالپى، كوماندا دايىن.
قۇرامادا ءبىراز كادرلىق ماسەلە بار. رومان اسرانقۇلوۆتىڭ وتباسىندا قايعىلى جاعداي بولىپ، مينسككە ۇشا المادى. سونىمەن قاتار الىبەك قاسىمدا جەڭىل جاراقات بار. دەگەنمەن، بۇل – ءومىر، العا جىلجۋ كەرەك. جالپى كوڭىل كۇي جاقسى، بارلىعى دايىن. فيزيكالىق تۇرعىدان ءبارى ءوز بابىندا.
– سوڭعى كۇندەرى جاراقاتتار سالدارىنان بىرنەشە ويىنشى قاتاردان شىعىپ قالدى. ونىڭ ىشىندە ايبار جاقسىلىقوۆ تا بار. قۇرامادا تازا شابۋىلشىلاردىڭ جەتىسپەۋشىلىگى بايقالادى. سوڭعى ساتتە باسقا ەشكىمدى شاقىرعىڭىز كەلمەدى مە؟
– ايباردىڭ پنەۆمونياسى بولدى. سول سەبەپتى ۇيىنە قايتتى. كەيىن ءبىز رامازان كارىموۆتى شاقىردىق. بىراق مەديتسينالىق تەكسەرىستەن كەيىن بەل جاراقاتى انىقتالدى. ومىرتاەۆقا كەلسەك، ءبىز ونى بۇرىننان باقىلاپ كەلەمىز. شاقىرعىمىز كەلدى. الايدا ءدال قازىر ءبىزدىڭ ويىن جۇيەمىزگە سايكەس كەلەتىن فۋتبولشىلار قاجەت. سوندىقتان ماكسيم سامورودوۆ، اليار مۇحاممەد پەن داستان ساتپاەۆقا سەنىم ارتادى. ولار شابۋىلدى جاڭا فورماتتا وربىتەدى. ءبىز بار رەسۋرستارمەن جۇمىس ىستەيمىز.
– رامازان ورازوۆتىڭ قۇراماعا شاقىرىلماۋى كلۋبتاعى ويىن تاجىريبەسىنىڭ ازدىعىمەن بايلانىستى ما؟
– تاعى دا قايتالايمىن: قۇرامانىڭ قورىتىندى تىزىمىنە ەنبەگەن بارلىق ويىنشىمەن سويلەستىم. رامازانمەن دە تىلدەستىم. ول ويىن تاجىريبەسى بولماعاندىقتان قۇراماعا ەنبەگەنىن تۇسىنەدى. شەشىمدى دۇرىس قابىلداعانىمىزدى مويىندادى. دەگەنمەن، رامازانداي تاجىريبەلى، جوعارى قارقىندا ويناي الاتىن ويىنشىلار بىزگە كەرەك. ەندى ول تەك كلۋب اۋىستىرىپ، الاڭدا كوبىرەك ۋاقىت وتكىزۋى ءتيىس.
– داستان ساتپاەۆتى جاستار قۇراماسىنا جىبەرۋ تۋرالى شەشىمدى نەگە قابىلدادىڭىز؟
– جاس فۋتبولشىعا كوبىرەك جارىس تاجىريبەسى مەن حالىقارالىق ويىندار كەرەك. قانشا دايىندالساڭ دا، جاتتىعۋدا جاراقات الۋىڭ مۇمكىن. ونى جاستار قۇراماسىنا جىبەرۋ شەشىمىن ءبىز تەحنيكالىق ديرەكتورمەن جانە ۇلتتىق قۇرامالار جەتەكشىسىمەن اقىلداسىپ قابىلدادىق. جاستار قۇراماسىنىڭ ناتيجەسى دە ۇلتتىق قۇراما سياقتى باسىمدىققا يە. بىزدە ناقتى ستراتەگيا بار: ول الدىمەن ناتيجە، ودان كەيىن فۋتبولشىلاردىڭ، كوماندانىڭ جانە جاتتىقتىرۋشىلار شتابىنىڭ دامۋى. داستان ساتپاەۆ سولتۇستىك ماكەدونيامەن ماتچتىڭ الدىندا «استانا ارەنادا» وينايدى. سول ارقىلى اتموسفەرانى سەزىنەدى. ءبىز ول جاستار قۇراماسىندا العاشقى گولىن سوعادى دەپ ۇمىتتەنەمىز. كەيىن بەلارۋسپەن ويىننان سوڭ ۇلتتىق قۇرامعا قوسىلادى. ءيا، جاراقات الۋ قاۋپى بار. بىراق ونسىز ءبىز وعان قاجەتتى تاكتيكالىق جانە پسيحولوگيالىق جۇكتەمەنى بەرە المايمىز.
– بەلارۋسپەن سىرت الاڭدا ماتچ وتكىزۋ قانشالىقتى قاجەت بولدى؟ ويىنشىلار شارشاپ قالادى دەپ قورىقپايسىز با؟
– ارينە، ءوز جەرىمىزدە، ۋاقىت بەلدەۋىن اۋىستىرماي، كۇردەلى لوگيستيكاسىز ويناعىمىز كەلەر ەدى. بىراق بۇل – ۋەفا بەلگىلەگەن شارتتار. ءبىز ءوزىمىزدى تەكسەرەمىز، ويىنشىلارىمىزدى دا سىنايمىز. ۇلتتىق قۇراما بارلىق باعىتتا دامۋى كەرەك. گەوگرافيالىق ورنالاسۋىمىز قيىندىق تۋعىزاتىنى انىق، بىراق بۇل – ءبىزدىڭ شىندىعىمىز. ولار ءۇشىن دە وڭاي بولمايدى. مىسالى، ماكەدونيا الدىمەن بەلگيامەن ويناپ، كەيىن بىزگە ۇشادى. مەنىڭ ويىمشا، ءبىز كەز كەلگەن جاعدايعا دايىنبىز. قۇداي قالاسا، جاراقاتسىز وتەدى دەپ سەنەمىن.
– وسى ىرىكتەۋدە قۇرامانىڭ الدىنا قانداي ماقساتتار قويىلعان؟
– كوماندانىڭ جاعدايى مەن مىندەتتەرى تۋرالى باستاپقىدا-اق ايتتىق. ەڭ باستىسى – ەل ءۇشىن سىنعا ءتۇسۋ. بۇل كلۋب ەمەس، جەكەمەنشىك جوبا دا ەمەس. بۇل – ۇلتتىق قۇراما. ءار شاقىرىلعان ويىنشى ەل ءۇشىن جانىن سالۋعا دايىن بولۋى كەرەك. ەكىنشى مىندەت – بارىنشا كوپ ۇپاي جيناۋ. بۇكىل ەلدىڭ ارمانى – ۇلكەن تۋرنيرگە جولداما الۋ. ءبىز توپتاعى قارسىلاستاردىڭ دەڭگەيىن، اسىرەسە ۋەلسپەن وتكەن ويىننان كەيىن، جاقسى تۇسىنەمىز. بىراق قاجەت كۇن مەن ۋاقىتتا جينالىپ، موتيۆاتسيامەن شىقساق – ءبارى مۇمكىن. العاشقى ويىن – ماكەدونيامەن. سول ماتچ ءبىز ءۇشىن باستى سىناق بولادى.
– ورازوۆتىڭ ويىن تاجىريبەسى جوق ەكەنىن ايتىپ ءوتتىڭىز. بىراق قۇرامدا ءدال سونداي جاعدايداعى بىستروۆ بار. بۇنى قالاي تۇسىندىرەسىز؟
– قۇرامعا مۇقيات قاراپ وتىرعانىڭىز ءۇشىن راقمەت. ورازوۆ پەن بىستروۆ العاشقى جيىنعا شاقىرىلعان. سول كەزدە بىستروۆتىڭ دا ويىن تاجىريبەسى از ەدى. بىراق ول ۋەلس پەن ليحتەنشتەينمەن ماتچتا جاقسى ونەر كورسەتتى. ناتيجەلى پاس بەردى، قوزعالىسى جوعارى دەڭگەيدە بولدى. ءبىز رامازاننىڭ كورسەتكىشتەرىن دە جان-جاقتى تالدادىق – ستاتيستيكا دا، ويىنداعى ءىس-ارەكەتتەرى دە قارالدى.
– بىستروۆقا كوبىرەك ويىن تاجىريبەسى الۋ ءۇشىن باسقا كلۋبقا اۋىسۋعا كەڭەس بەرەر مە ەدىڭىز؟
– بۇل – تەك بىستروۆقا ەمەس، بارلىق ويىنشىعا قاتىستى كەڭەس. ءتىپتى 10 مينۋتتىق ويىن دا تونۋس ساقتايدى. قۇراماعا ۇزدىك فورمامەن كەلۋ كەرەك. ارينە، كەي جاعدايلاردا ەرەكشەلىك بولادى. مىسالى، بىستروۆتىڭ تاجىريبەسى بار، رپل-دە ويناعان، مىقتى جاتتىقتىرۋشىلارمەن جۇمىس ىستەگەن. بىراق جالپى العاندا، ءار ويىنشى كلۋبتاعى ورنىن ءوزى تابۋى كەرەك. بۇل – باسەكەلەستىك، شەشىمدى ويىنشىنىڭ ءوزى قابىلدايدى.
– بەلارۋسپەن ماتچ ءسىز ءۇشىن جاڭا مارتەبەدە العاشقى ويىن بولادى. قاي ساتتەن باستاپ ءوزىڭىزدى تولىققاندى باس جاتتىقتىرۋشى سەزىندىڭىز؟
– ونداي ناقتى ءسات بولمادى. بۇل ومىردە كىمنىڭ قانشا ۋاقىت بولاتىنىن ءبىر اللا بىلەدى. «ۋاقىتشا» دەگەن مارتەبە مەن ءۇشىن ماڭىزدى ەمەس. قىسىم سەزىنىپ وتىرعانىم جوق. مەنىڭ باستى مىندەتىم – قولدا بار مۇمكىندىكتى تولىق پايدالانۋ. قىسىم تەك ءبىر نارسەدەن بولۋ كەرەك – ناتيجە كورسەتۋ.
