SportPress.kz قازاقستان سپورت جاڭالىقتارى
قىتايدىڭ سيان قالاسىندا ارتىستىك جۇزۋدەن World Aquatics ۇيىمىنىڭ قولداۋىمەن وتكەن الەم كۋبوگىنىڭ فينالدىق كەزەڭى اياقتالدى، دەپ حابارلادى ۇلتتىق وليمپيادالىق كوميتەت.
بيىلعى ماۋسىمنىڭ سوڭعى جارىسىندا الەمنىڭ ۇزدىك سپورتشىلارىمەن بىرگە قازاقستان قۇراماسىنىڭ وكىلدەرى دە ونەر كورسەتتى. بۇل سىندا قىتاي سپولرتشىلارى سەنىمدى ونەر كورسەتىپ، التىن مەدالداردىڭ باسىم بولىگىن قالتالارىنا باستى.
جالپى بيىلعى جارىس كۇنتىزبەسىندە ءتورت الەم كۋبوگىنىڭ كەزەڭى بولدى. وسىنىڭ بارىندە قازاقستان قۇراماسى جاقسى ناتيجە كورسەتتى. سونىڭ ناتيجەسىندە وتانداستارىمىز ارتىستىك جۇزۋدەن كوشباسشى ەلدەردىڭ قاتارىنان قالىسپاي، الەم كۋبوگىن لايىقتى اياقتادى.
ناتيجەسىندە قازاقستان قۇراماسى توپتىق باعدارلامالاردا (بارلىق ديستسيپليناداعى ۇپايلار سانى بويىنشا) قولا جۇلدەگە يە بولدى. جۇلدەگەرلەر قاتارىندا نارگيزا بولاتوۆا، ۆيكتور درۋزين، ايگەرىم قۇرمانعاليەۆا، كسەنيا ماكاروۆا، ارينا مياسنيكوۆا، اننا پاۆلەتسوۆا، جاكلين ياكيموۆا، جانيا جيەنعازى، ياسمين تۋياكوۆا جانە ۆالەريا ستولبۋنوۆا بار.
قازاقستان قۇراماسىنان ونەر كورسەتكەن ايەلدەر جۇبى ەكىنشى ورىندى يەلەندى. تەحنيكالىق باعدارلامادا ەل نامىسىن ياسمين تۋياكوۆا مەن ارينا پۋشكينا قورعادى. ەركىن باعدارلامادا تۋياكوۆاعا ۇپاي جيناۋدا دايانا جامانچالوۆا سەرىك بولدى.
سونداي-اق، ارالاس جۇبىمىز دا الەم كۋبوگىن ءساتتى اياقتادى. جالپى ەسەپتە ۆيكتوريا ستولبۋنوۆا مەن ارتۋر مايدانوۆ ءۇشىنشى ورىندى ساقتاپ قالدى. بۇل ءبىزدىڭ سپورتشىلاردىڭ جوعارى دەڭگەيدە ونەر كورسەتۋگە دايىن ەكەنىن كورسەتتى. ەرلەر اراسىنداعى جەكەلەي باعدارلامادا ۆيكتور درۋزين ءتورتىنشى ورىنمەن شەكتەلىپ، جۇلدەگە ءبىر قادام جەتپەي قالدى، — دەلىنگەن حابارلامادا.
بيىلعى ماۋسىمدا سپورتشىلار بىرنەشە رەت جۇلدەلى ورىندارعا يە بولدى. اقپاندا فرانتسيانىڭ پاريج قالاسىندا ۆيكتور درۋزين التىن مەدال جەڭىپ السا، ەدۋارد كيم ەل قورجىنىنا كۇمىس مەدال سالدى. ال مىسىردىڭ حۋرگادا قالاسىندا ەدۋارد كيم قولا جۇلدەنى قاناعات تۇتتى.
بىلتىر ۆيكتور درۋزين World Aquatics تۇجىرىمى بويىنشا «جىل سپورتشىسى» اتاعىنا ۇسىنىلعان بولاتىن.
