TOP-3: Qazaqstan sportshylary ártistik júzýden úzdik úshtikke kirdi

Qytaıdyń Sıan qalasynda ártistik júzýden World Aquatics uıymynyń qoldaýymen ótken Álem kýbogynyń fınaldyq kezeńi aıaqtaldy, dep habarlady Ulttyq Olımpıadalyq komıtet.

Bıylǵy maýsymnyń sońǵy jarysynda álemniń úzdik sportshylarymen birge Qazaqstan quramasynyń ókilderi de óner kórsetti. Bul synda Qytaı spolrtshylary senimdi óner kórsetip, altyn medaldardyń basym bóligin qaltalaryna basty.

Jalpy bıylǵy jarys kúntizbesinde tórt Álem kýbogynyń kezeńi boldy. Osynyń bárinde Qazaqstan quramasy jaqsy nátıje kórsetti. Sonyń nátıjesinde otandastarymyz ártistik júzýden kóshbasshy elderdiń  qatarynan qalyspaı, Álem kýbogyn laıyqty aıaqtady.

Nátıjesinde Qazaqstan quramasy toptyq baǵdarlamalarda (barlyq dısıplınadaǵy upaılar sany boıynsha) qola júldege ıe boldy. Júldegerler qatarynda Nargıza Bolatova, Vıktor Drýzın, Áıgerim Qurmanǵalıeva, Ksenııa Makarova, Arına Mıasnıkova, Anna Pavleova, Jaklın Iakımova, Janııa Jıenǵazy, Iasmın Týıakova jáne Valerııa Stolbýnova bar.

Qazaqstan quramasynan óner kórsetken áıelder juby ekinshi oryndy ıelendi. Tehnıkalyq baǵdarlamada el namysyn Iasmın Týıakova men Arına Pýshkına qorǵady. Erkin baǵdarlamada Týıakovaǵa upaı jınaýda Daıana Jamanchalova serik boldy.

Sondaı-aq, aralas jubymyz da álem kýbogyn sátti aıaqtady. Jalpy esepte Vıktorııa Stolbýnova men Artýr Maıdanov úshinshi oryndy saqtap qaldy. Bul bizdiń sportshylardyń joǵary deńgeıde óner kórsetýge daıyn ekenin kórsetti. Erler arasyndaǵy jekeleı baǵdarlamada Vıktor Drýzın tórtinshi orynmen shektelip, júldege bir qadam jetpeı qaldy, — delingen habarlamada.

Bıylǵy maýsymda sportshylar birneshe ret júldeli oryndarǵa ıe boldy. Aqpanda Franııanyń Parıj qalasynda Vıktor Drýzın altyn medal jeńip alsa, Edýard Kım el qorjynyna kúmis medal saldy. Al Mysyrdyń Hýrgada qalasynda Edýard Kım qola júldeni qanaǵat tutty.

Byltyr Vıktor Drýzın World Aquatics tujyrymy boıynsha «Jyl sportshysy» ataǵyna usynylǵan bolatyn.