Almaty arnasy uıymdastyrǵan alaman

«Adamzat bóz bermeıdi sóz beredi», degen eken ata—babamyz. Qazirgi aqparat júıeleri toǵysyp, oqyrman qaýymǵa aǵyny tasqyndap jatqan zamanda BAQ ókilderiniń qyzmeti eseleı túsýde. Sóz tirshiliktiń quraly bolsa, sol sóz qudiretiniń tonyn teris aınaldyryp oqyrmannyń nazaryna jetkizip jatqan qalamgerlerdiń eńbegi adal dep bilemiz. Baspasóz ben teledıdardyń qazaq qoǵamyndaǵy roli erekshe. Ony kózi ashyq kórkiregi oıaý oqyrman jaqsy biledi. Ahmet Baıtursynovsha aıtqanda «Gazet halyqtyń kózi, qulaǵy hám tili» bolsa, aqparat quraldary qoǵamnyń aınasy. Sondyqtanda baspasóz ókilderiniń merekelik kúni de esten shyǵarylmaı óz deńgeıinde atalyp ótip jatsa nur ústine nur bolmaq.

Kezinde qazaq sport jýrnalıstıkasynyń atasy Seıdahmet Berdiqulov pen belgili sport qalamgeri Arystan Sarınniń atynda jýrnalıster arasynda dúbirli jarystar ótip turatyn. Ol jarysty tipti, qala turǵyndary toptasyp kelip tamashalaıtyn. Sol alaman jarystarda Altynbek Sársenbaev, Nurtóre Júsip, Dıas Omarov, Búrkit Aıaǵan sekildi elimizge belgili tanymal azamattar dop teýip, oıyn kórigin qyzdaratyn. Ásirese, Altynbek aǵamyzdyń ortadan túlki bulańmen salǵan fıntterine jankúıerler úlken qoshametpen qol soǵýshy edi. Jasyl alańnyń shetinde jaıǵasyp alyp, tartysty oıyndardy tamashalap otyratyn aqsamaıly aǵalardyń aıǵaıy qýat berip, oıynshylardyń rýhyn asqaqtatýshy edi. Sonda alań shetinen Dýalat Isabekov, Ǵazızbek Táshimbaı, Áshirbek Kóbish, Rabat Jánibek, Jumabek Kenjalın sekildi elge belgili jazýshy, jýrnalısterdi kórip rıza bolsaq, Tımýr Segizbaev, Quralbek Ordabaev, Seıilda Baıshaqov syndy qazaq fýtbolynda attary altyn áriptermen jazylyp qalǵan fýtbol ardagerleri jýrnalısterdiń arasynan topjarǵan jeńimpazdaryn óz qoldarymen marapattap jatatyn. Ol kúnder de kelmeske ketip, tarıh qoınaýyna enip ketti. Endi sol jýrnalıster arasyndaǵy Arystan Sarın atyndaǵy týrnır kóp jyldan beri ótpeıtin bolsa, Seıdaǵańnyń atyndaǵy jarys Astanaǵa aýyp ketkeli beri qyzyǵyn birge ala ketkendeı áser qaldyrady. Negizi Seıdaǵań bar shyǵarmashylyq ǵumyryn Almatyda ótkizgenin bilemiz. Onyń ústine Almaty ádebıet pen mádenıettiń ortalyǵy bolǵandyqtan, ońtústik qalada ótýdiń mańyzy zor edi. О́kinishke qaraı, almatylyqtar Seıdaǵańnyń týrnırin teledıdardan jylt etken jańalyq arqyly ǵana qyzyqtaýǵa májbúr bolyp otyr. Al, jýrnalıster úshin shaǵyn fýtboldan uıymdastyrylatyn jarystardyń mán-maǵynasy óte zor. О́ıtkeni, aqparat aıdynynda júrgen qalamgerlerdiń bir-birimen aralasyp, syrlasyp, sher tarqasyp qaıtýy úshin dúbirli óter jarystardyń orny aıyryqsha. Mine, osyndaı jarystardy ańsap júrgen qalamgerler úshin jýyrda Almaty qalasyndaǵy Áskerıler ortalyǵyndaǵy jasyl alańda ótken jarys qalamgerlerdi qaıta bir qaýyshtyrǵan qýanyshty kún boldy.

Qalamy men mıkrofonyn qolyna ustaǵan jýrnalıster qaýymynyń qoǵamdaǵy bolyp jatqan oqıǵalardy sııasyn sýytpaı jaryqqa shyǵaryp jatqan eńbekterin elemeý múmkin emes. Almaty qalasy ákimshiligi men Almaty telearnasy birigip, jýrnalıster merekesin nazardan tys qaldyrmaı jaqsy bir sporttyq is-sharany uıymdastyrýǵa uıytqy bolǵan eken. О́zderiniń kásibı merekesin umyt qaldyrmaı eskerip, úlken bir sporttyq jarysty ótkizýge muryndyq bolǵan aıtýly uıymdastyrýshylar alqasyna jarysqa kelgen qalamgerler dán rızashylyqtaryn  bildirip jatty.

Sonymen shaǵyn fýtboldan uıymdastyrylǵan jarysqa Almaty qalasyndaǵy barlyq buqaralyq aqparat quraldarynyń komandasy kelip qatysty. Tipti, sonaý Taldyqorǵannan jýrnalıster arasynda ótip turatyn jarystardan qalys qalmaı kelip qatysyp turatyn «Hareket» jýrnalıster komandasy da kelip baǵyn synady.

Jarystyń saltanatty ashylýyna Almaty qalasy ákiminiń orynbasary Azamat Beskempiruly Qaldybekov, qala ákiminiń kommýnıkaııalar jónindegi keńesshisi, baspasóz hatshy Ilzat Shuhratuly Akchýrın, Almaty telearnasynyń bas dırektory Tımýr Talǵatuly Bazarbaev, Almaty telearnasynyń bas prodıýseri Ralıda Meńdigereıqyzy Muqanova, Almaty qalasy qoǵamdyq damý basqarmasynyń basshysy Aıdar Rahymjanuly Esenbekov men basqa da azamattar qatysyp, jarysqa qatysýshy qalamgerlerdi tól merekesimen quttyqtap, jeńis tiledi. Saltanatty ashylýy rásimi aıaqtalǵannan keıin, eki topqa bólingen komandalar tóreshilerdiń ysqyryǵymen oıyndaryn bastap ketti.

Bul básekege bizde «Alataý» telearnasy men «Qazaq sporty» gazeti birigip bir komanda alyp baryp baǵymyzdy synap kórgen edik. О́z tobymyzdan eki jeńis bir teń oıynmen ekinshi orynmen shyqtyq. Degenmende «Haraeket» syndy azýly qarsylasqa jol berip, úshinshi orynǵa talasýǵa «Sentanta sport» komandasyna qarsy turýǵa múmkindik aldyq. Iá, «dop doǵalyq», demekshi, oıyn nátıjesi 3:3 esebimen teń aıaqtalyp, penaltıden múlt kettik.

Penaltı ol lotoreıa degen qanatty sóz bar emes pe. Degenmende osyndaı dúbirli alamanda 4-orynǵa jetýdiń ózi úlken nátıje shyǵar dep ózimizdiń ham kóńilimizdi jubatyp qoıdyq.

Uıymdastyrýshylar tipti jýranalıstterge arnap túski as qamyn da ázirlep qoıǵan eken. Oıyn alańynan terlep-tepship shyqqan oıynshylar sál dem alyp alǵannan keıin, dámi til úıirer ystyq palaýdan dám tatyp, júrek jalǵap alyp qaıta oıyn alańyna shapqylap shyǵyp jattty. Qalamgerlerdiń qamyn qarastyryp, jaǵdaı týǵyzyp berip otyrǵan osyndaı Almaty qalasy ákimshiligi men Almaty telarnasynyń ujymyna bul kúni qatysýshylardyń aıtar alǵysy sheksiz boldy. Hosh, sonymen aptap ystyqqa qaramaı kúni boıy jasyl alańda shúmektep ter tókken jýrnalısterdiń arasynan oza shyqqandary da belgili boldy. Syn alańyna shyqqan 9 komanda arasynan top jaryp shyqqan «Hareket» komandasy bas júldeni ıelense, «Aýyl» komandasy ekinshi oryndy, «Sentanta sport» komandasy júldeli úshinshi oryndy jeńip aldy. Týrnır jeńimpazdary men júldegerlerin Almaty qalasy ákiminiń orynbasary Azamat Beskempiruly Qaldybekov, qala ákiminiń kommýnıkaııalar jónindegi keńesshisi, baspasóz hatshy Ilzat Shuhratuly Akchýrın, Almaty telearnasynyń bas dırektory Tımýr Talǵatuly Bazarbaev men Almaty telearnasynyń bas prodıýseri Ralıda Meńdigereıqyzy Muqanova óz qoldarymen jeńis kýboktary men qarjylaı qomaqty júldelerdi tabys etip, quttyqtady.

Týrnırdiń «Úzdik oıynshy», «Úzdik shabýylshy» «Úzdik qaqpashy», «Úzdik qorǵaýshy» degen ataqtaryna laıyqty oıynshylar ortaǵa shyǵyp qurmetpen marapatattaldy. Osylaısha kún uzaq jasyl alańda tartysty ótken týrnır saltanatpen jabylyp, qalamgerler úıine kóńildi kúımen tarqasty.

BAQ ókilderiniń basyn qosyp sheksiz qýanysh syı etip, salaýyttylyqqa jeteleıtin mundaı jarys este qalary sózsiz.

Aqyn ORDABAIULY,

ALMATY