مۋايتايدان اچ: قازاقستان جەتى التىن جۇلدە الدى

ۆەتنامنىڭ تحاينگۋەن قالاسىندا مۋايتايدان بارلىق جاس ساناتىندا ازيا چەمپيوناتى اياقتالدى، دەپ حابارلادى تۋريزم جانە سپورت مينيسترلىگى سپورتتى دامىتۋ ديرەكتسياسىنىڭ ءباسپاسوز قىزمەتى.

بيىل كوماندا ساپىندا 24 وتانداسىمىز جۇلدەگە تالاستى. ناتيجەسىندە U23 جانە ەرەسەكتەر كىرەتىن ا ساناتىندا ۇلتتىق قۇراما جالپى ەسەپتە تايلاندتان كەيىن 2-ورىنعا تۇراقتادى.

قازاقستان سپورتشىلارى 7 التىن، 7 كۇمىس، 6 قولا مەدال جەڭىپ الدى. جۇلدەگەرلەر ءتىزىمىن سپورتتى دامىتۋ ديرەكتسياسىنىڭ رەسمي سايتىنان كورە الاسىزدار.

كوماندا كاپيتانى ءابىل عاليەۆ  تاي بوكسىنان 2 دۇركىن ازيا چەمپيونى اتاعىن جەڭىپ العان تۇڭعىش وتانداسىمىز اتاندى.

دايانا دۇيسەنعالي «ايەلدەر اراسىندا ۇزدىك سپورتشى» («Best female fighter») يەگەرى اتاعىن الدى.

قازاقستان قۇراماسى ازيا مۋايتاي فەدەراتسياسىنىڭ (FاMA) ارنايى سىيلىعىنا يە بولدى. ول  «Best fair play team» دەپ اتالادى.

بيىلعى چەمپيوناتقا ازيا مەن تىنىق مۇحيتى اۋماعىنداعى 20 ەلدەن 200-گە جۋىق سپورتشى قاتىستى.