ساۋدا ورىندارى كيبەرسپورتتان سايىسقا ءتۇستى

الماتى قالاسى جاستار ساياساتى باسقارماسىنىڭ «دۇيسەنبىلىك سپورت» جوباسى اياسىندا NEET ساناتىنداعى جاستار اراسىندا كيبەرسپورتتان وتكەن تۋرنير مارەسىنە جەتتى.

Social project management ورتالىعىنىڭ ۇيىمداستىرۋىمەن وتكەن جارىسقا «سالامات»، «قازىنا»، «التىن وردا»، «سارىارقا» «وجەت» جانە تاعى باسقا بازارلاردان 30-دان استام ويىنشى قاتىستى. Real كومپيۋتەرلىك كلۋبىندا وتكەن تۋرنيرگە كيبەرسپورتتان بىرنەشە دۇركىن چەمپيون بولعان ءبىرىم امانوۆ تورەلىك جاسادى.

كيبەرسپورتتىڭ ءتۇرى كوپ ەكەنى بەلگىلى. ۇيىمداستىرۋشىلار مەن قاتىسۋشىلاردىڭ ۇيعارىمىمەن تۋرنير ويىنى رەتىندە كيبەرسپورتتىڭ FIFA 25 نۇسقاسى تاڭدالدى. ويىنشىلار وزدەرىنە ۇنايتىن كوماندالاردى الىپ، سول ارقىلى كومپيۋتەر ەكرانىندا ويىن ورنەگىن كورسەتتى. قاتىسۋشىلار فۋتبول كوماندالارى رەتىندە «مانچەستەر سيتي»، «باۆاريا»، «گالاتاساراي»، «ينتەر مايامي»، «چەلسي»  سياقتى ۇزدىك كلۋبتاردى تاڭداپ، وزدەرى «تىزگىندەگەن» وسى كلۋبتار ارقىلى ءبىر بىرىمەن جارىستى.

جارىستىڭ تارتىستى بولعانى سونشالىق – تۇتقانى قوس قولدارىنا مىعىم ۇستاعان ويىنشىلار الدارىنداعى ەكراننان كوز المادى. گول سوققان ساتتە قۋانىپ سەرگىپ قالعان قاتىسۋشىلار دا، «قاپ اتتەگەن-اي» دەپ سان سوعىپ قالعاندار دا بولدى. ەڭ باستىسى جەڭىلگەندەر جەڭگەندەردى مويىنداپ، جەڭگەندەر جەڭىلگەندەردى ارقادان قاعىپ جۇباتىپ جاتتى.

جارىسقا قاتىسۋشىلاردىڭ ءبىرى نۇرحات سارمۋلدين تۋرنير كەزىندە بىلاي دەپ ءوز ويىن ءبىلدىردى.

ءبىر جىلدارى كيبەرسپورتتى قۇمار ويىندار قاتارىنا جاتقىزاتىنمىن. بۇل ويىم قاتە ەكەنىن كەيىن ءبىلدىم. كيبەرسپورتتىڭ وليمپيادالىق ويىندار تىزىمىندە ەكەنىن ەستىگەنىمدە العاشىندا سەنبەدىم. انىق كوزىم جەتكەن سوڭ وسى سپورتتىڭ ىزىنە ءتۇسىپ، ويىن داعدىمدى جەتىلدىرىپ كەلەمىن. كيبەرسپورت ادامدى شاپشاڭدىققا، اڭعارىمپازدىققا، العىرلىققا باۋليدى ەكەن. مۇقيات بولماساڭ اياق استىنان ءمۇلت كەتەسىڭ، — دەدى ول.

جارىس قورىتىندىسى بويىنشا 1-ورىندى «التىن وردا» بازارىنان كەلگەن ساماربەك جانىبەك يەلەنىپ، 250 مىڭ تەڭگەنىڭ سەرتيفيكاتىن قانجىعاسىنا بايلادى. 2-ورىن «التىن وردا» بازارىنىڭ تاعى ءبىر ويىنشىسى مۇستافا ابدىراسىلعا بۇيىرىپ، 150 مىڭ تەڭگەنىڭ سەرتيفيكاتىن ەنشىلەدى. «وجەت» بازارىنىڭ ويىنشىسى نۇرلان ءىلياس پەن «قازىنا» بازارىنىڭ نامىسىن قورعاعان رينات اليبەكوۆ 3-ورىندى ءوزارا ءبولىسىپ، ارقايسىسى 50 مىڭ تەڭگەدەن ولجالادى. جەڭىمپازدارعا سەرتيفيكاتتار مەن مەدال، كۋبوكتاردى ءتۋرنيردىڭ قۇرمەتتى قوناعى – «اتامەكەن» ۇلتتىق كاسىپكەرلەر پالاتاسىنىڭ تالعار اۋداندىق فيليالىنىڭ ديرەكتورى ايدوس قالجانوۆ تابىس ەتتى.

ايتا كەتەيىك، بۇعان دەيىن «دۇيسەنبىلىك سپورت» جوباسى اياسىندا الماتى قالاسىنداعى بازار جاستارى اراسىندا شاعىن فۋتبولدان، ۇستەل تەننيسىنەن تۋرنيرلەر وتكەن بولاتىن. بۇگىنگى كيبەرسپورت جارىسى وسى جوبا اياسىندا وتكەن ءۇشىنشى تۋرنير. الداعى ۋاقىتتا ۆولەيبولدان، باسكەتبولدان تۋرنيرلەر وتكىزۋ جوسپارلانىپ وتىر.

نازيرا بۋرحانوۆا،

الماتى