SportPress.kz Qazaqstan sport jańalyqtary
Almaty qalasy Jastar saıasaty basqarmasynyń «Dúısenbilik sport» jobasy aıasynda NEET sanatyndaǵy jastar arasynda kıbersporttan ótken týrnır máresine jetti.
Social project management ortalyǵynyń uıymdastyrýymen ótken jarysqa «Salamat», «Qazyna», «Altyn orda», «Saryarqa» «О́jet» jáne taǵy basqa bazarlardan 30-dan astam oıynshy qatysty. Real kompıýterlik klýbynda ótken týrnırge kıbersporttan birneshe dúrkin chempıon bolǵan Birim Amanov tórelik jasady.
Kıbersporttyń túri kóp ekeni belgili. Uıymdastyrýshylar men qatysýshylardyń uıǵarymymen týrnır oıyny retinde kıbersporttyń FIFA 25 nusqasy tańdaldy. Oıynshylar ózderine unaıtyn komandalardy alyp, sol arqyly kompıýter ekranynda oıyn órnegin kórsetti. Qatysýshylar fýtbol komandalary retinde «Manchester sıtı», «Bavarııa», «Galatasaraı», «Inter Maıamı», «Chelsı» sııaqty úzdik klýbtardy tańdap, ózderi «tizgindegen» osy klýbtar arqyly bir birimen jarysty.
Jarystyń tartysty bolǵany sonshalyq – tutqany qos qoldaryna myǵym ustaǵan oıynshylar aldaryndaǵy ekrannan kóz almady. Gol soqqan sátte qýanyp sergip qalǵan qatysýshylar da, «qap áttegen-aı» dep san soǵyp qalǵandar da boldy. Eń bastysy jeńilgender jeńgenderdi moıyndap, jeńgender jeńilgenderdi arqadan qaǵyp jubatyp jatty.
Jarysqa qatysýshylardyń biri Nurhat Sarmýldın týrnır kezinde bylaı dep óz oıyn bildirdi.
Bir jyldary kıbersportty qumar oıyndar qataryna jatqyzatynmyn. Bul oıym qate ekenin keıin bildim. Kıbersporttyń olımpıadalyq oıyndar tiziminde ekenin estigenimde alǵashynda senbedim. Anyq kózim jetken soń osy sporttyń izine túsip, oıyn daǵdymdy jetildirip kelemin. Kıbersport adamdy shapshańdyqqa, ańǵarympazdyqqa, alǵyrlyqqa baýlıdy eken. Muqııat bolmasań aıaq astynan múlt ketesiń, — dedi ol.
Jarys qorytyndysy boıynsha 1-oryndy «Altyn orda» bazarynan kelgen Samarbek Jánibek ıelenip, 250 myń teńgeniń sertıfıkatyn qanjyǵasyna baılady. 2-oryn «Altyn orda» bazarynyń taǵy bir oıynshysy Mustafa Ábdirasylǵa buıyryp, 150 myń teńgeniń sertıfıkatyn enshiledi. «О́jet» bazarynyń oıynshysy Nurlan Ilııas pen «Qazyna» bazarynyń namysyn qorǵaǵan Rınat Alıbekov 3-oryndy ózara bólisip, árqaısysy 50 myń teńgeden oljalady. Jeńimpazdarǵa sertıfıkattar men medal, kýboktardy týrnırdiń qurmetti qonaǵy – «Atameken» ulttyq kásipkerler palatasynyń Talǵar aýdandyq fılıalynyń dırektory Aıdos Qaljanov tabys etti.
Aıta keteıik, buǵan deıin «Dúısenbilik sport» jobasy aıasynda Almaty qalasyndaǵy bazar jastary arasynda shaǵyn fýtboldan, ústel tennısinen týrnırler ótken bolatyn. Búgingi kıbersport jarysy osy joba aıasynda ótken úshinshi týrnır. Aldaǵy ýaqytta voleıboldan, basketboldan týrnırler ótkizý josparlanyp otyr.
Nazıra BÝRHANOVA,
ALMATY
