«ۋيمبلدون»: رىباكينا ءۇشىنشى اينالىمعا شىقتى

قازاقستاننىڭ ءبىرىنشى، الەمنىڭ 11-راكەتكاسى، 26 جاستاعى ەلەنا رىباكينا ۋيمبلدون ءتۋرنيرىنىڭ ءۇشىنشى اينالىمىنا شىقتى، دەپ حابارلادى قازاقستان تەننيس فەدەراتسياسى.

تەننيسشى ەكىنشى ويىنىن الەمدىك رەيتينگىدە كەزىندە 3-ورىنعا دەيىن كوتەرىلگەن، قازىر 77-ساتىداعى گرەكيالىق، 29 جاستاعى ماريا ساككاريمەن وينادى.

قارسىلاستار وسىعان دەيىن بەس رەت ويناپ، سونىڭ تورتەۋىندە رىباكينا جەڭگەن ەدى. بۇل جولى رىباكينا ماتچتى ءساتتى باستادى. ءبىرىنشى سەتتە 6:3 ەسەبىمەن جەڭدى.

ەكىنشى سەتتى قارسىلاستار برەيك الماسۋمەن باستادى. بۇدان سوڭ ەلەنا رىباكينا دەس بەرمەدى. ەسەپ — 6:1.

ەندى رىباكينا ءتورتىنشى اينالىمعا شىعۋ ءۇشىن الەمنىڭ 22-راكەتكاسى، دانيالىق كلارا تاۋسون نەمەسە رەيتينگىدە 39-ورىنداعى رەسەيلىك اننا كالينسكايامەن وينايدى.