ەلىمىزدە اۋەسقويلار اراسىندا فۋتبولدان جاڭا چەمپيونات باستالدى

قازاقستان فۋتبول فەدەراتسياسى بۇقارالىق فۋتبول سالاسىنداعى ەڭ ءىرى ۇلتتىق جوبانى تانىستىردى. بۇگىننەن باستاپ ەلىمىزدىڭ بارلىق ايماعىن قامتيتىن 11ح11 فورماتىندا «قازاقستان اۋەسقوي ليگاسى» باستالدى، دەپ حابارلادى قازاقستان فۋتبول فەدەراتسياسى.

بۇل باستاما پرەزيدەنت قاسىم-جومارت توقاەۆتىڭ حالىققا جولداۋىندا ايتىلعان باسىم باعىتتارمەن ۇندەسەدى. جولداۋدا بۇقارالىق سپورتتى دامىتۋ مەن سالاۋاتتى ءومىر سالتىن ناسيحاتتاۋدىڭ ماڭىزى ەرەكشە اتاپ وتىلگەن.

بيىل العاش رەت ۇيىمداستىرىلعان ليگا ەندى جىل سايىن وتكىزىلەدى. وسى ماۋسىمعا ەلىمىزدىڭ 20 وڭىرىنەن 268-دەن استام كوماندا، 5000-نان استام ويىنشى قاتىسادى دەپ كۇتىلىپ وتىر. وعان قوسا 34 لوكاتسيادا 1500-دەن استام ويىن وتكىزۋ جوسپارلاندى.

«قازاقستان اۋەسقوي ليگاسىن» قۇرۋ – فەدەراتسياسىنىڭ ستراتەگيالىق ماقساتىنا ساي كەلەدى. بۇل باستاما ەلدەگى فۋتبولدىڭ دامۋىن ءبىرىزدى جۇيەگە تۇسىرۋگە باعىتتالعان: اۋەسقوي دەڭگەيدەن باستاپ كاسىپقوي فۋتبولعا دەيىنگى تولىق قۇرىلىم قالىپتاستىرۋ كوزدەلىپ وتىر. ليگانىڭ تاعى ءبىر ماڭىزدى مىندەتى – ايماقتارداعى فۋتبول ينفراقۇرىلىمىن نىعايتىپ، ونىڭ قوعامداعى بەدەلىن ارتتىرۋ.

ءبىز بۇرىن-سوڭدى بولماعان وسىنداي اۋقىمدى جوبانى تەك سايىس رەتىندە ەمەس، وتاندىق فۋتبولدىڭ جاڭا دامۋ ساتىسى دەپ قاراستىرامىز. سەبەبى بۇل دوداعا فۋتبولدى سۇيگەن ءار ادامنىڭ قاتىسا الادى. وسى باسەكەنىڭ ناتيجەسىندە  وڭىرلىك كوماندالاردىڭ سانى ارتىپ، جاستارعا جاڭا مۇمكىندىكتەر بەرىلەدى. ءبىزدىڭ ماقسات  فۋتبولدىڭ الەۋەتىن دامىتىپ، وڭىرلەردەگى سپورتتىق ءومىردى جانداندىرىپ، جانكۇيەر مەن ويىنشىلاردىڭ ارمانىنا جول اشۋ. وسىلايشا اتالعان جوبانىڭ جىل سايىن جوعارى دەڭگەيدە وتۋىنە قاجەتتى قولداۋدى كورسەتەمىز، – دەدى قفف باس حاتشىسى داۆيد لوريا.

جارىس ەكى كەزەڭنەن تۇرادى. ايماقتىق كەزەڭ مامىر مەن قىركۇيەك ارالىعىندا ەلىمىزدىڭ 20 وڭىرىندە وتەدى. ال ۇزدىك كوماندالار قازان ايىندا قازاقستان رەسپۋبليكاسى چەمپيونى اتاعىن ساراپقا سالادى.

تۋرنير جەڭىمپازى 2026 جىلعى ماۋسىمدا ەكىنشى ليگادا ويناۋعا مۇمكىندىك الادى. سونىمەن قاتار، كەلەسى جىلعى قازاقستان كۋبوگىنا قاتىسىپ، ەلىمىزدىڭ اتىنان ۋەفا ايماقتار كۋبوگىندا ونەر كورسەتەدى.

تۋرنير جىل سايىن تۇراقتى تۇردە وتەدى. الداعى ۋاقىتتا ونىڭ فورماتى كەڭەيىپ، قامتۋ اياسى ارتادى. بۇل قادام فۋتبول ەكوجۇيەسىنىڭ بارلىق دەڭگەيدە دامۋىنا سەرپىن بەرەدى.