مارات وماروۆ: «ءار اۋىلدا فۋتبول الاڭى بولۋى ءۇشىن جۇمىس ىستەپ جاتىرمىز»

قازاقستان فۋتبول فەدەراتسياسىنىڭ پرەزيدەنتى مارات وماروۆ Qazsport تەلەارناسىنا سۇحبات بەرىپ، قفف وڭىرلىك ينفراقۇرىلىمدى جۇيەلى تۇردە دامىتىپ جاتقانىن، قفف-نىڭ ەلىمىزدە كونفەرەنتسيالار ليگاسىنىڭ نەمەسە ۋەفا سۋپەركۋبوگىنىڭ فينالىن وتكىزۋگە دايىن ەكەنىن جانە سالانى تۇراقتى دامىتۋدا كلۋبتاردى جەكەشەلەندىرۋدىڭ ماڭىزدى ەكەنىن ايتتى. ياعني، ول فۋتبولدىڭ مەملەكەتتەن قارجىلاندىرىلماۋ كەرەكتىگىن اتاپ ءوتتى.

ەندى وسىلاردى رەت-رەتىمەن ايتسا كەتسەك، قفف باسشىسىنىڭ ايتۋىنشا، ەل تاريحىندا العاش رەت FIFA-نىڭ قولداۋىمەن مەكتەپتەردە 100 شاعىن فۋتبول الاڭىنىڭ قۇرىلىسى باستالدى. وعان قوسا FIFA Arena جانە KFF Arena جوبالارى اياسىندا جەكە ينۆەستورلارعا نەسيە جۇيەسى ازىرلەنۋدە.

– ءبىز ينفراقۇرىلىم ماسەلەسىنە جۇيەلى تۇردە قاراپ وتىرمىز. قازىر ءبىر مەزگىلدە ءۇش باعىتتا جۇمىس ىستەپ جاتىرمىز. قازاقستان تاريحىندا العاش رەت FIFA قارجىلاندىرۋىمەن قالا جانە اۋىل مەكتەپتەرىندە 100 شاعىن فۋتبول الاڭىن سالۋ جوباسى قولعا الىندى. قازىر ءبىز مەكتەپتەردى الەۋمەتتىك تاپشىلىعى، حالىق تىعىزدىعى جانە ينفراقۇرىلىمدىق جەتىسپەۋشىلىك كريتەريلەرى بويىنشا ىرىكتەۋدەمىز. بۇدان بولەك، «FIFA Arena» جانە «KFF Arena» جوبالارىمىز بار. ونى «بايتەرەك» حولدينگىمەن بىرگە دايىنداپ جاتىرمىز. جەكە كاسىپكەرلەرگە ءار قالا مەن اۋىلدا ارەنالار سالۋ ءۇشىن قانداي پايىزبەن نەسيە بەرەمىز. «دامۋ» بانكپەن قانداي جەڭىلدىكتەر بولادى سونى قۇرۋدامىز. FIFA Arena – ستراتەگيالىق ماڭىزدى جوبا. ونى FIFA قارجىلاندىرادى، جوباعا مەملەكەتتىڭ قارجىسى سالىنبايدى. بۇل – جەكە ينۆەستيتسيا. قازاقستاندا ينفراقۇرىلىم تاپشىلىعى قاتتى سەزىلەدى. ءبىز ءىرى قالالاردا عانا ەمەس، اۋىلدىق جەرلەردە دە فۋتبولدى دامىتۋدى ماقسات ەتتىك. فەدەراتسيا ينفراقۇرىلىم تاپشىلىعىن جويۋ، الاڭدار سانىن كوبەيتۋ جانە فۋتبولدى دامىتۋعا ارنالعان تەحنيكالىق ءارى ماتەريالدىق بازا قالىپتاستىرۋعا باسىمدىق بەرەدى، – دەدى م.وماروۆ.

«قفف قازاقستاندا كونفەرەنتسيالار ليگاسىنىڭ نەمەسە ۋەفا سۋپەركۋبوگىنىڭ فينالىن وتكىزۋگە دايىن»

مارات وماروۆ ۋەفا-عا ەلىمىزدە 2027 جىلى ۋەفا كونگرەسىن ۇيىمداستىرۋعا،  كونفەرەنتسيالار ليگاسىنىڭ فينالى نەمەسە ۋەفا سۋپەركۋبوگىن وتكىزۋگە  ۇسىنىس بەرگەنىن حابارلادى.

ونىڭ ايتۋىنشا، ۋەفا پرەزيدەنتى الەكساندەر چەفەريننىڭ قازاقستانعا جاساعان رەسمي ساپارى مەن ۋەفا-نىڭ قولداۋى ەلىمىزدە فۋتبول ينفراقۇرىلىمىن دامىتۋعا جانە ءىرى حالىقارالىق تۋرنيرلەردى وتكىزۋگە جاڭا مۇمكىندىك اشتى.

– بيىل الەكساندەر چەفەرين قازاقستانعا العاش رەت رەسمي ساپارمەن كەلىپ، مەملەكەت باسشىسى قاسىم-جومارت كەمەل ۇلى توقاەۆپەن كەزدەستى. ءبىز فۋتبولدى دامىتۋ ماسەلەلەرى بويىنشا مازمۇندى ءارى تەرەڭ پىكىر الماستىق. ۋەفا-مەن كۇن سايىن تىعىز جۇمىس ىستەيمىز. ولار ءبىزدىڭ ادىستەمەلىك سەرىكتەسىمىز، VAR جۇيەسى سىندى زاماناۋي جوبالاردى ەنگىزۋگە كومەكتەسەدى. فەدەراتسياعا جىل سايىن قارجىلاي قولداۋ كورسەتەدى. ءبىز 2027 جىلى ۋەفا كونگرەسىن قابىلداۋعا دايىنبىز. سونىمەن قاتار استانا مەن الماتى قالالارىندا كونفەرەنتسيالار ليگاسىنىڭ فينالى نەمەسە سۋپەركۋبوكتى وتكىزۋگە رەسمي ۇسىنىس بەردىك. وعان قازاقستان دايىن. قازىر ەلىمىزدە جاڭا ستاديونداردىڭ قۇرىلىسى ءجۇرىپ جاتىر. سونداي-اق، U-21 جانە U-19 جاسوسپىرىمدەر قۇرامالارى اراسىندا ەۋروپا چەمپيوناتتارىن وتكىزۋ جوسپارىمىزدا بار، – دەدى ول.

 «فۋتبول مەملەكەتتەن قارجىلاندىرىلماۋ كەرەك»

سونىمەن بىرگە قفف باسشىسى سالانى تۇراقتى دامىتۋدا كلۋبتاردى جەكەشەلەندىرۋدىڭ ماڭىزدى ەكەنىن ايتتى. جەكەشەلەندىرۋگە ۇسىنىلعان كلۋبتاردىڭ قاتارىندا «استانا»، «اقتوبە» جانە «اتىراۋ» فۋتبول كلۋبتارى بار. قازىر ينۆەستورلار ارىپتەستىكتىڭ جاڭا مۇمكىندىكتەرىن قاراستىرىپ جاتىر.

– قازىرگى  ۋاقىتتا كوپتەگەن فۋتبول كلۋبى بيۋدجەت ەسەبىنەن قارجىلاندىرىلادى. بىلەسىزدەر، بۇل تۋرالى ءار ءتۇرلى پىكىر بار. باس پروكۋراتۋرا مەن  باسقا دا قۇقىقتىق ورگاندار كلۋبتاردى تەكسەردى. ارينە، كوپ سۇراق بار. كلۋبتارعا جىل سايىن ورتاشا 3 ملرد تەڭگە بولىنەدى. بىراق ول اقشا لەگيونەرلەر مەن شەتەلدىك ماماندارعا جۇمسالدى. بىراق كلۋبتاردىڭ ينفراقۇرىلىمى، اكادەمياسى مەن ستاديونى جوق. بۇل دۇرىس ەمەس. جەكە ينۆەستور كەلسە، ونىڭ ءوز اكتيۆى پايدا بولادى.  بولاشاقتا باسقا دەمەۋشىلەر ارقىلى تاعى دا ينۆەستيتسيا تارتادى. ول الەمدىك تاجىريبە. قازىر ەڭ مىقتى كلۋب – جەكەمەنشىك كلۋبتار. بۇگىندە  فۋتبول بيزنەسكە اينالدى. تەلەۆيزيالىق باعدارلامالار، جارناما، ونلاين پلاتفورمالاردا دا ءبارى بار. كوپ ادام ونى قارايدى. سوندىقتان ءار كلۋب جەكەمەنشىك بولعانى دۇرىس. قازاقستان وسى جولمەن جۇرەدى. بىزدە جەكەشەلەندىرىلەتىن كلۋبتاردىڭ ءتىزىمى جاسالدى. قازاقستان فۋتبول فەدەراتسياسى ينۆەستور تارتۋعا كومەكتەسەتىن تاراپ رەتىندە جۇمىس ىستەيدى، – دەدى م.وماروۆ.