SportPress.kz Qazaqstan sport jańalyqtary
Fýtzaldan jańa maýsym Oral qalasynda ótetin Sýperkýbok matchymen resmı túrde bastalady, dep habarlady Batys Qazaqstan oblysy Dene shynyqtyrý jáne sport basqarmasy.
23 tamyzda el chempıony – Almatynyń «Qaırat» pen Qazaqstan Kýbogynyń ıegeri – «Semeı» komandalary ózara myqtyny anyqtaıdy. Match «Jaıyq arena» sport kesheninde bolady.
Bul oıynnyń ereksheligi – fýtzal tarıhynda alǵash ret Sýperkýbok oıyny Batys Qazaqstan oblysynda, sý jańa ári zamanaýı sport kesheninde uıymdastyrylady.
Match óńirdegi fýtzaldyń damýyna jańa serpin berip, jergilikti jankúıerler úshin aıtýly oqıǵaǵa aınalatyny sózsiz, — delingen habarlamada.
«Jaıyq arena» ashylǵannan beri bıyl sport kesheninde kóptegen jarys uıymdastyrylyp keledi. Bul jerde voleıboldan erlerdiń ulttyq lıga komandalary arasynda pleı-off básekesi ótip, Qazaqstan chempıony anyqtalǵan bolatyn.
