Bıyl elimizde 32 sport ordasy paıdalanýǵa berildi

Memleket basshysynyń tapsyrmasyna sáıkes, elimizde sport ınfraqurylymyn damytý baǵytynda aýqymdy jumystar júrgizilip keledi. Jyl basynan beri elimizdiń 14 óńirinde 32 sport nysany paıdalanýǵa berildi. Al jyl sońyna deıin taǵy 70 nysannyń qurylysy aıaqtalady dep josparlanǵan, dep habarlady Týrızm jáne sport mınıstrligi.

Jańa nysandarda boks, basketbol, voleıbol, fýtbol, kúres, ústel tennısi jáne basqa da sport túrlerimen aınalysýǵa múmkindik bar. Bıyl paıdalanýǵa berilgen iri nysannyń biri – Aqmola oblysyndaǵy sport kesheni. Bul – memleket menshigine qaıtarylǵan aktıvter esebinen tolyqtaı qarjylandyrylǵan elimizdegi alǵashqy sport nysany. Atalǵan sport kesheninde erkin kúres, qazaq kúresi, boks, aýyr atletıka, shańǵy sporty jáne jalpy dene daıyndyǵyna arnalǵan zaldar bar.

Taǵy bir mańyzdy nysan – Pavlodar oblysyndaǵy kópsalaly sport kesheni. Munda voleıbol, basketbol, boks, kúres, sadaq atý, toǵyzqumalaq, ústel tennısi jáne júzý sportymen shuǵyldanýǵa bolady. Keshende 4 jolaqty (25 metrlik) júzý basseıni jumys isteıdi, — delingen habarlamada.

Vedomstvonyń habarlaýynsha, bıyl paıdalanýǵa beriletin birqatar mańyzdy nysandar qatarynda úzdiksiz bilim beretin Ulttyq sport ýnıversıteti bar. Ýnıversıtet ınfraqurylymyna stadıon, jabyq jeńil atletıka maneji, olımpıadalyq basseın, sport kesheni, ǵylymı-zertteý jáne medıınalyq qalpyna keltirý ortalyqtary kiredi. Sondaı-aq Túrkistanda baıdarka men kanoede esý, para kanoe jáne akademııalyq eskek esý jarystaryn ótkizýge arnalǵan esý arnasynyń qurylysy aıaqtalady. Al Astanada Q. Muńaıtpasov atyndaǵy jańa stadıonnyń qurylysy bastaldy. Atalǵan nysandy 2026 jyly paıdalanýǵa berý josparlanyp otyr.

Jetisý oblysynyń Alakól aýdanynda 160 oryndyq dene shynyqtyrý-saýyqtyrý kesheni men 244 oryndyq jataqhananyń qurylysy júrip jatyr. Bul keshen óńir sportynyń damýyna serpin beredi. 2024 jylǵy mamyrda Oral qalasynda múmkindigi shekteýli jandarǵa arnalǵan sport kesheniniń qurylysy bastaldy. Keshende komandalyq sport túrlerine (voleıboldy otyryp oınaý, golbol, badmınton, bochcha), ústel tennısi men kúres túrlerine (grek-rım, erkin kúres, dzıýdo) arnalǵan zaldar salynady.

Sonymen qatar memleket basshysy buqaralyq sportty damytý máselesine erekshe nazar aýdaryp keledi. 2024 jylǵy derekterge sáıkes, el halqynyń 40%-dan astamy turaqty túrde sportpen shuǵyldanady. 1000 adamǵa shaqqanda sport ınfraqurylymymen qamtý deńgeıi 55%-dan asty. El turǵyndarynyń salaýatty ómir saltyn ustanýǵa, sportpen aınalysýǵa degen qyzyǵýshylyǵynyń, zamanaýı sport nysandaryna degen suranystyń artýyna baılanysty bul kórsetkishti 2029 jylǵa deıin 65%-ǵa jetkizý josparlanyp otyr, — dep habarlady mınıstrlik.

Týrızm jáne sport mınıstrligi bul baǵyttaǵy júıeli jumysty jalǵastyra beredi.