كونفەرەنتسيا ليگاسى: «استانا» ءۇشىنشى ىرىكتەۋ كەزەڭىنە شىقتى

«استانا» فۋتبول كلۋبى UEFA كونفەرەنتسيا ليگاسى ەكىنشى ىرىكتەۋ كەزەڭىندە سىرت الاڭدا مولدوۆانىڭ «زيمبرۋ» كومانداسىن جەڭىپ، كەلەسى اينالىمعا شىقتى.

ءبىرىنشى ماتچتا كوماندالار استانادا 1:1 ەسەبىمەن تەڭ تارقاسقان ەدى. سول سەبەپتى كيشينەۋدەگى ويىن اسا قىزىقتى جانە تارتىستى بولدى.  «استانا» ءبىرىنشى مينۋتتان باستاپ شابۋىلعا ءجيى شىعىپ، الاڭ يەلەرىنىڭ قاقپاسىنا قاۋىپتى جاعداي جاساپ وتىردى. سونىڭ ناتيجەسىندە دجەففري چينەدۋ 18-مينۋتتا قارسىلاستار قاقپاسىنىڭ كىلتى تاۋىپ، ءبىرىنشى دوپتى تورعا توعىتى.

ودان كەيىن دە قوناقتار شابۋىلدى ۇدەتىپ، ەكىنشى گولدى سالۋعا قۇلشىندى. ول گولدى ۋسمان كامارا 21-مينۋتتا سالدى.

ەكىنشى تايمدا مولدوۆانىڭ كلۋبى تارازى باسىن تەڭەستىرۋگە ۇمتىلدى. دەگەنمەن ماقساتىنا جەتە الماي، ويىندا 0:2 ەسەبىمەن جەڭىلىپ قالدى.

وسىلايشا «استانا» سىرت الاڭدا قارسىلاسىنان 2:0 ەسەبىمەن جەڭىپ، ءۇشىنشى ىرىكتەۋ كەزەڭىنە شىقتى.

ەندى «استانا» «ۆاردار» (سولتۇستىك ماكەدونيا) جانە «لوزاننا» (شۆەيتساريا) كوماندالارىنىڭ بىرەۋىمەن وينايدى. بۇل ويىندار 7 جانە 14 تامىزدا بولادى.

ەسكە سالا كەتسەك، «قايرات» UEFA چەمپيوندار ليگاسى ەكىنشى ىرىكتەۋ كەزەڭىندە فينليانديانىڭ كۋپس كومانداسىن جەڭىپ، جارىستىڭ ءۇشىنشى كەزەڭىنە جولداما الدى.

داستان كەنجالين،

استانا