قازاق كۇرەسى ۇلتتىق يدەولوگيانىڭ الاڭىنا اينالدى

سەمەي قالاسىنداعى «اباي ارەنا» سپورت كەشەنى ءتورت كۇن بويى ەلىمىزدىڭ تۇكپىر-تۇكپىرىنەن كەلگەن ءاپايتوس بالۋانداردىڭ ايقاسىنا كۋا بولدى، دەپ حابارلادى Qazaq Kuresi اسسوتسياتسياسىنىڭ ءباسپاسوز قىزمەتى.

قازاق كۇرەسىنەن ەرەسەكتەر اراسىنداعى قازاقستان كۋبوگى – بيىلعى ۇلتتىق سپورت كۇنتىزبەسىندەگى ەڭ تارتىستى جارىستاردىڭ ءبىرى بولدى. الاش ارىستارىنىڭ ءىزى قالعان، حاكىم ابايدىڭ قانى تامعان قاسيەتتى توپىراقتا ۇلتتىق كۇرەسىمىزدىڭ تۋى قايتا جەلبىرەدى.

بۇل دوداعا ەلىمىزدىڭ بارلىق وڭىرىنەن كەلگەن 20 كوماندا قاتىسىپ، ەرلەر مەن ايەلدەر 16 سالماق دارەجەسى بويىنشا بوزكىلەمگە شىقتى. سونىمەن قاتار، ءتورتىنشى كۇنى وتكەن ارالاس كوماندالىق جارىس ناعىز تارتىستىڭ شىڭىنا اينالعانى ءسوزسىز.

ءبىرىنشى جارىس كۇنى باستالعان بەلدەسۋلەردەن-اق بۇل جولعى كۋبوكتىڭ دەڭگەيى ايقىن بايقالىپ، جارىس بوزكىلەمدەگى ناعىز شەبەرلەردىڭ سايىسىنا اينالدى. ءار سالماق دارەجەسىندە تارتىس پەن تاكتيكا، جىگەر مەن ءتارتىپ قاتار ءوربىدى.

ەرلەر اراسىنداعى كۇرەستەر ەڭ جەڭىل سالماق – 55 كەلىدەن باستالدى. مۇندا اباي وبلىسىنىڭ ءۇمىتى قۋانىش ماقسۇتوۆ كىلەمدە كەزدەسكەن قارسىلاستارىنان باسىم ءتۇسىپ، تۋعان توپىراعىندا توپ جاردى.

60 كەلىدە جەتىسۋ وبلىسىنىڭ نامىسىن قورعاعان تاجىريبەلى بالۋان مارات نيگماتۋللاەۆ شيراق ءارى سالماقتى ونەر كورسەتىپ، ءوز سالماعىنىڭ ۇزدىگى اتاندى. ال 66 كەلىدە بوزكىلەمگە شىققان شىمكەنتتىك بالۋان يبراھيم نۇرماحان ۇلى قارسىلاستارىن سەنىمدى كۇرەسىمەن جەڭدى.

74 كەلىدە جامبىل وبلىسىنىڭ وكىلى ورىنباسار باقتىبەك ۇلى ۇتىمدى ءادىس پەن تاباندىلىق تانىتىپ، التىن مەدالدى جەڭىپ الدى.

82 كەلىدە سىنعا تۇسكەن اقتوبەلىك سپورتشى ازات قۋانوۆتىڭ شەبەرلىگىمەن تانىلا ءبىلىپ، جەڭىس تۇعىرىنان كورىندى. ال 90 كەلىدە اباي وبلىسىنىڭ نامىسىن قورعاعان قۋانىش راتاەۆ كۇرەس كوركىن قىزدىرىپ، جانكۇيەرلەرىن ەرەكشە قۋانتتى. ونىڭ جەڭىسى – تەك جەكە جەتىستىك ەمەس، وڭىرلىك كۇرەس مەكتەبىنىڭ ابىرويى دەسەك ارتىق بولماس.

100 كەلىدە اتوي سالىپ، ۇزدىك اتانعان – شىمكەنت قالاسىنىڭ تاعى ءبىر ساڭلاعى ەرسۇلتان مۇزاپپاروۆ. ءسويتىپ، ول جىل باسىندا ءۇندىستان ەلىندە وتكەن الەم چەمپيوناتىنداعى جەڭىستى جولىن جالعاستىردى. الىپتاردىڭ بەلدەسۋىندە، ياعني +100 كەلى سالماق دارەجەسىندە تۇركىستان وبلىسىنىڭ بالۋانى قايسار شامشيدينوۆ كىلەمدەگى كۇش پەن تاكتيكانى تاماشا ۇيلەستىرىپ، جەڭىسكە جەتتى. ال تۇيە بالۋان سىنىندا ماڭعىستاۋلىق بالۋان نۇرداۋلەت جارىلعاپوۆ وزگەلەردەن وق بويى وزىپ، ءوز سالماعىنىڭ حاس شەبەرى ەكەنىن تاعى ءبىر دالەلدەدى.

نازىك جاندار اراسىنداعى بەلدەسۋلەر دە اسا تارتىستى ءوتتى. اتاپ ايتقاندا، 48 كەلىدە بوزكىلەمگە شىققان ماڭعىستاۋ وبلىسىنىڭ بۇرىمدى بالۋانى ايدانا حاسەنقىزى كىلەمدەگى قارسىلاستارىن قاپى قالدىردى. 52 كەلىدە الماتى وبلىسىنىڭ وكىلى اراي دۇيسەباي تازا تەحنيكالىق باسىمدىقپەن جەڭىسكە جەتتى. ءوز ءوڭىرىنىڭ نامىسىن قولدان بەرمەگەن شىمكەنتتىك اسەمگۇل بالتاباي 56 كەلىدە جەڭىستىڭ بيىك تۇعىرىنان كورىنە ءبىلدى. سونداي-اق، 60 كەلىدە سىنعا تۇسكەن قكسك وكىلى نازەركە اسانحان، 65 كەلىدە تاعى ءبىر شىمكەنتتىك سابينا الىبەك ناعىز سپورتشىعا ءتان تاباندىلىقتىڭ ارقاسىندا كۋبوكتىڭ يەگەرى اتاندى.

70 كەلىدە ۇلىتاۋ وبلىسىنان كەلگەن اقەركە مىرزابەك، 77 كەلىدە اتىراۋ وبلىسىنىڭ ماقتانىشى ارۋجان جاندارباي، +77 كەلىدە اباي وبلىسىنىڭ ءۇمىتى زەرە بەكتاسقىزى قارسىلاس شاق كەلتىرمەي، بوزكىلەمدە وزىندىك مەكتەپ پەن شەبەرلىكتىڭ ۇلگىسىن كورسەتتى.

«سامۇرىق قازىنا» ۇلتتىق ءال-اۋقات قورى» اق جانە Sport Qory سپورتتى قولداۋ قورى دەمەۋشىلىك كورسەتكەن دودا بارىسىندا ءار سالماقتا توپ جارعان بۇل سپورتشىلار – ءوز وڭىرلەرىنىڭ ابىرويىن كوتەرىپ قانا قويماي، قازاق كۇرەسىنىڭ بۇگىنگى بيىك دەڭگەيىن پاش ەتكەن دارا تۇلعالار.

 

كوماندالىق ايقاس – بىرلىكتىڭ ايناسى

ءتورت كۇنگە سوزىلعان تارتىستى جارىستىڭ ەڭ قىزۋ كەزەڭى – ارالاس كوماندالىق بەلدەسۋ بولدى. بۇل كۇنى بوزكىلەمگە شىققان ءار ءوڭىردىڭ نامىسىن ارقالاعان بالۋاندار ءۇشىن تەك جەكەلەي ەمەس، ۇجىمدىق جاۋاپكەرشىلىك تە الدىڭعى قاتارعا شىقتى. ەرلەر – 66، 82، 100 جانە +100 كەلىدە، ال ايەلدەر – 60، 70 جانە +77 كەلى سالماق دارەجەلەرىندە سىنعا ءتۇستى.

كوماندالىق جارىستىڭ ناتيجەسى تەك شەبەرلىكتىڭ ەمەس، كوماندالىق رۋحتىڭ، وڭىرلىك سپورت مەكتەپتەرىنىڭ جۇيەلى ەڭبەگىنىڭ كورسەتكىشى بولدى. بۇل تۇرعىدا شىمكەنت قالاسىنىڭ قۇراماسى بارلىق كورسەتكىش بويىنشا وزگەلەردەن وزا شاۋىپ، قازاقستان كۋبوگىنىڭ ەڭ ۇزدىك كومانداسى اتاندى. ولاردىڭ جەڭىسىن تەك فيزيكالىق دايىندىقپەن ەمەس، بىرلىك پەن تاكتيكالىق ۇيلەسىمدىلىكپەن كەلگەن ناتيجە دەۋگە بولادى.

اباي وبلىسى قۇراماسى دا قارسىلاستارىنان قالىس قالماي، كۇمىس جۇلدەگە يە بولدى. ەرلەر مەن ايەلدەر قۇرامىنىڭ بىردەي بەلسەندىلىگى مەن ءساتتى تاكتيكاسى بۇل جەتىستىككە جول اشتى. ال استانا مەن الماتى قالالارى كوماندالىق جارىستا قولا جۇلدەنى ءبولىستى. بۇل ەكى ءىرى مەگاپوليستىڭ دە ۇلتتىق سپورتقا دەگەن كوزقاراسى مەن قولداۋى ايقىن كورىنىس تاپتى.

كوماندالىق جارىس – تەك بالۋان مەن بەلدەسۋ ەمەس، بۇل – سەنىم مەن سەرتتىڭ، دايىندىق پەن ءوزارا قولداۋدىڭ ناتيجەسى. بيىلعى كۋبوك كورسەتكەن باستى ساباق – بىرلىك بار جەردە جەڭىس بار.

 

مەدالدار ەسەبى: كىم كوش باستادى؟

قازاقستان كۋبوگىنىڭ قورىتىندىسى – بۇل تەك تورتكۇندىك بەلدەسۋدىڭ ناتيجەسى ەمەس، بۇل – وڭىرلىك سپورتتىڭ، باپكەرلەر ەڭبەگىنىڭ جانە سپورتشىلاردىڭ زالدا توككەن تەرىنىڭ ناتيجەسى. بيىلعى جارىستا بارلىعى 16 جەكەلەي سالماق دارەجەسى مەن 1 كوماندالىق سايىس بويىنشا جەڭىمپازدار انىقتالدى.

مەدالدار ەسەبىنە كوز سالساق، شىمكەنت قالاسىنىڭ بالۋاندارى ناعىز كوشباسشىلىق تانىتتى. قۇرامانىڭ قورجىنىندا 6 التىن، 2 كۇمىس جانە 7 قولا مەدال بار. بۇل – تەك سانى ەمەس، ساپاسى جاعىنان دا ۇزدىك كورسەتكىش. شىمكەنت بالۋاندارى جەكەلەي جارىستاردا دا، كوماندالىق باسەكەدە دە وزدەرىن مويىنداتا ءبىلدى.

قورجىنىندا 3 التىن، 3 كۇمىس جانە 4 قولا مەدالى بار اباي وبلىسى ەكىنشى ورىنعا جايعاسسا، ال ماڭعىستاۋ وبلىسى 2 التىن، 1 كۇمىس جانە 1 قولا كورسەتكىشىمەن ۇزدىك ۇشتىكتى تۇيىندەدى.

ۇلى ابايدىڭ 180 جىلدىعى اياسىندا اباي وبلىسىنىڭ ورتالىعى – سەمەي قالاسىندا وتكەن بۇل جارىس – جاي عانا قاتارداعى دودا ەمەس، ول ۇلتتىق يدەولوگيانىڭ، سپورت پەن تاربيەنىڭ توعىسقان الاڭى. قازاق كۇرەسى بۇگىندە تەك ەل ىشىندەگى ەمەس، حالىقارالىق ارەنادا دا مويىندالعان سپورت ءتۇرى. بۇل – ونىڭ دۇنيەجۇزىلىك كوشپەندىلەر ويىندارى مەن World Combat Games سياقتى كەشەندى ويىنداردىڭ باعدارلامالارىنا ەنۋىمەن دالەلدەنىپ وتىر.

وسى باعىتتا جۇيەلى جۇمىس ىستەپ كەلە جاتقان Qazaq Kuresi اسسوتسياتسياسى جىل سايىن 90-نان استام رەسپۋبليكالىق، ۇلتتىق جانە حالىقارالىق جارىستار وتكىزىپ، ۇلتتىق مۇرانى وسكەلەڭ ۇرپاقتىڭ بويىنا ءسىڭىرىپ جاتىر.