چەمپيوندار ليگاسى: داستان ساتپاەۆ «قايراتقا» جەڭىس اپەردى (ۆيدەو)

الماتىنىڭ «قايرات» كلۋبى فۋتبولدان UEFA چەمپيوندار ليگاسى ءۇشىنشى ىرىكتەۋ كەزەڭىندە سلوۆاكيانىڭ «سلوۆان» كومانداسىمەن ويناپ، جەڭىسكە جەتتى.

ماتچ باستالىسىمەن كوماندالار ءبىر-ءبىرىنىڭ قاقپاسىنا تەز گول سوعۋعا تىرىستى. اسىرەسە، الاڭ يەلەرى قوناقتاردىڭ قاقپاسىنا لاپ قويدى. «سلوۆاننىڭ» ويىنشىلارى دا قاراپ قالماي، «قايراتقا» شابۋىل جاساپ، ەسەپتى ءبىرىنشى اشقىسى كەلدى. الايدا، ونىسىنان ەشتەڭە شىقپادى. «قايراتتىڭ» دا شابۋىلدارى وڭبەدى.

ەكىنشى تايمدا الاڭ يەلەرى الاڭنىڭ بارلىق جەرىندە باسىمدىق تانىتىپ، ويىندى ءوز باقىلاۋىنا الدى. وسىعان قارسىلاستاردىڭ جۇيكەسى شىداي الماي، سىر بەرىپ، دورەكى مىنەزىمەن كوپشىلىكتىڭ كوزىنە ءتۇستى. وسىنداي ساتتەردىڭ بىرىندە «سلوۆان» ساپىنان راحيم يبراحيم 65-مينۋتتا قىزىل قاعازبەن الاڭنان قۋىلدى. باس تورەشى «سلوۆاننىڭ باس جاتتىقتىرۋشىسى ۆلاديمير ۆايسسقا دا قىزىل قاعاز كورسەتتى. ەندى ەكەۋى كەلەسى ويىنعا قاتىسپايدى. وسىدان كەيىن سلوۆاكيا كلۋبىنىڭ ويىنى جۇرمەي، جاسىل الاڭنان اياقتارىن اكەتۋگە تىرىستى. الايدا «قايرات» ءبىر گول سالماي، الاڭنان كەتۋدى ويلاعىسى كەلمەي، شابۋىلدى ودان سايىن جيىلەتىپ، اقىر سوڭىندا ويىننىڭ نەگىزگى ۋاقىتى اياقتالعاندا دوپتى تورعا توعىتۋعا تاماشا مۇمكىندىك الدى. «قايرات» ساپىنان داستان ساتپاەۆ 11 مەترلىك پەنالتيدەن ءمۇلت كەتكەن جوق.

95-مينۋتتا الاڭ يەلەرى تاعى ءبىر گول سالدى. داستان ساتپاەۆتىڭ بەرگەن پاسىن ارىپتەسى ريكاردينو پايدالانىپ، نىسانانى ءدال كوزدەگەن ەدى. بىراق ونى باس تورەشى VAR قاراعاننان كەيىن فۋتبولشى ويىننان تىس قالدى دەگەن جەلەۋمەن ەسەپتەمەي تاستادى.

ەندى كوماندالار 12 تامىزدا سلوۆاكيانىڭ استاناسى — براتيسلاۆا قالاسىندا ەكىنشى رەت وينايدى.

ەسكە سالساق، «قايرات» ءبىرىنشى جانە ەكىنشى ىرىكتەۋ كەزەڭىندە سلوۆەنيانىڭ «وليمپيا» (1:1، 2:0)، فينليانديانىڭ كۋپس كلۋبتارىن (0:2، 3:0) جەڭىپ، كەلەسى كەزەڭگە شىقتى. ال سلوۆاكيالىق كلۋب ەكىنشى ىرىكتەۋ كەزەڭىندە بوسنيا جانە گەرتسوگوۆينانىڭ «زرينسكي» كومانداسىن (4:0، 2:2) جەڭدى.

ەگەر «قايرات» ەكى ويىننىڭ ناتيجەسى بويىنشا «سلوۆاننان» ايلاسىن اسىرسا، پلەي-وففتا شوتلانديانىڭ «سەلتيك» كومانداسىمەن وينايدى. ال ەۋروپا ليگاسىنىڭ پلەي-وفف كەزەڭىنە تۇسكەن جاعدايدا شۆەيتساريانىڭ «يانگ بويز» كلۋبىمەن ويناۋى مۇمكىن.

«استانا» كلۋبىنا كەلسەك، ول كونفەرەنتسيا ليگاسى ءۇشىنشى ىرىكتەۋ كەزەڭىندە سىرت الاڭدا شۆەيتساريانىڭ «لوزاننا» كومانداسىمەن وينايدى.

داستان كەنجالين،

استانا