Chempıondar lıgasy: Dastan Sátpaev «Qaıratqa» jeńis áperdi (VIDEO)

Almatynyń «Qaırat» klýby fýtboldan UEFA Chempıondar lıgasy úshinshi irikteý kezeńinde Slovakııanyń «Slovan» komandasymen oınap, jeńiske jetti.

Match bastalysymen komandalar bir-biriniń qaqpasyna tez gol soǵýǵa tyrysty. Ásirese, alań ıeleri qonaqtardyń qaqpasyna lap qoıdy. «Slovannyń» oıynshylary da qarap qalmaı, «Qaıratqa» shabýyl jasap, esepti birinshi ashqysy keldi. Alaıda, onysynan eshteńe shyqpady. «Qaırattyń» da shabýyldary óńbedi.

Ekinshi taımda alań ıeleri alańnyń barlyq jerinde basymdyq tanytyp, oıyndy óz baqylaýyna aldy. Osyǵan qarsylastardyń júıkesi shydaı almaı, syr berip, dóreki minezimen kópshiliktiń kózine tústi. Osyndaı sátterdiń birinde «Slovan» sapynan Rahım Ibrahım 65-mınýtta qyzyl qaǵazben alańnan qýyldy. Bas tóreshi «Slovannyń bas jattyqtyrýshysy Vladımır Vaıssqa da qyzyl qaǵaz kórsetti. Endi ekeýi kelesi oıynǵa qatyspaıdy. Osydan keıin Slovakııa klýbynyń oıyny júrmeı, jasyl alańnan aıaqtaryn áketýge tyrysty. Alaıda «Qaırat» bir gol salmaı, alańnan ketýdi oılaǵysy kelmeı, shabýyldy odan saıyn jıiletip, aqyr sońynda oıynnyń negizgi ýaqyty aıaqtalǵanda dopty torǵa toǵytýǵa tamasha múmkindik aldy. «Qaırat» sapynan Dastan Sátpaev 11 metrlik penaltıden múlt ketken joq.

95-mınýtta alań ıeleri taǵy bir gol saldy. Dastan Sátpaevtyń bergen pasyn áriptesi Rıkardıno paıdalanyp, nysanany dál kózdegen edi. Biraq ony bas tóreshi VAR qaraǵannan keıin fýtbolshy oıynnan tys qaldy degen jeleýmen eseptemeı tastady.

Endi komandalar 12 tamyzda Slovakııanyń astanasy — Bratıslava qalasynda ekinshi ret oınaıdy.

Eske salsaq, «Qaırat» birinshi jáne ekinshi irikteý kezeńinde Slovenııanyń «Olımpııa» (1:1, 2:0), Fınlıandııanyń KýPS klýbtaryn (0:2, 3:0) jeńip, kelesi kezeńge shyqty. Al slovakııalyq klýb ekinshi irikteý kezeńinde Bosnııa jáne Gerogovınanyń «Zrınskı» komandasyn (4:0, 2:2) jeńdi.

Eger «Qaırat» eki oıynnyń nátıjesi boıynsha «Slovannan» aılasyn asyrsa, pleı-offta Shotlandııanyń «Seltık» komandasymen oınaıdy. Al Eýropa lıgasynyń pleı-off kezeńine túsken jaǵdaıda Shveıarııanyń «Iang Boız» klýbymen oınaýy múmkin.

«Astana» klýbyna kelsek, ol Konferenııa lıgasy úshinshi irikteý kezeńinde syrt alańda Shveıarııanyń «Lozanna» komandasymen oınaıdy.

Dastan KENJALIN,

ASTANA