ەلىمىزدە العاش رەت ازياداعى بەدەلدى سپورت ۇيىمىنىڭ باسقوسۋى باستالدى

بۇگىن استانادا تۋريزم جانە سپورت مينيسترلىگى، ازيا پاراليمپيادالىق كوميتەتى مەن قازاقستان ۇلتتىق پاراليمپيادالىق كوميتەتىنىڭ ۇيىمداستىرۋىمەن جانە  حالىقارالىق سپورت ۇيىمدارىنىڭ قولداۋىمەن ازيا پاراليمپيادالىق كوميتەتىنىڭ (اپك) كونفەرەنتسياسى مەن  VII باس اسسامبلەياسىنىڭ وتىرىسى باستالدى، دەپ حابارلادى تۋريزم جانە سپورت مينيسترلىگى.

مۇنداي اۋقىمدى ءىس-شارا العاش رەت ەلىمىزدە عانا ەمەس، ورتالىق ازيادا ۇيىمداستىرىلىپ وتىر. فورۋمعا 45 ەلدەن 190-نان استام دەلەگات قاتىسىپ جاتىر.

جيىننىڭ سالتاناتتى اشىلۋ راسىمىنە تۋريزم جانە سپورت ءمينيسترى ەربول مىرزابوسىنوۆ قاتىسىپ، ءىس-شارالاردىڭ استانادا وتكىزۋدىڭ ماڭىزدىلىعىنا توقتالىپ ءوتتى.

پاراليمپيادالىق قوزعالىستىڭ جانە نەگىزگى ۇيىمداردىڭ باسشىلارىن قابىلداۋ – قازاقستان ءۇشىن ۇلكەن مارتەبە ءارى زور جاۋاپكەرشىلىك. مەملەكەت باسشىسىنىڭ پاراليمپيادالىق سپورت پەن تەڭ مۇمكىندىك قاعيداتتارىن دامىتۋعا ايرىقشا نازار اۋدارىپ، جۇيەلى تۇردە قولداۋ كورسەتۋىنىڭ ارقاسىندا بۇگىنگىدەي اۋقىمدى حالىقارالىق ءىس-شارانى وتكىزىپ وتىرمىز. ءبىز قازاقستاندى ينكليۋزيۆتى سپورتتىڭ ايماقتىق ورتالىعىنا اينالدىرۋعا جانە ءار سپورتشىنىڭ ءوز الەۋەتىن تولىق اشۋىنا جاعداي جاساۋعا ۇمتىلامىز، — دەدى ول.

ونىڭ ايتۋىنشا، قازاقستان ۇلتتىق پاراليمپيادالىق كوميتەتى 2002 جىلى قۇرىلعان ساتتەن بەرى 19 پاراليمپيادالىق سپورت ءتۇرىن بەلسەندى دامىتىپ، جىل سايىن 800-دەن استام جارىس وتكىزەدى. سونداي-اق وتاندىق سپورتشىلاردىڭ 80-نەن استام حالىقارالىق تۋرنيرگە، سونىڭ ىشىندە ەڭ ءىرى الەمدىك دودالارعا قاتىسۋىن قامتاماسىز ەتىپ كەلەدى.

كونفەرەنتسيا مەن اسسامبلەيانىڭ قۇرمەتتى قوناقتارى قاتارىندا اپك پرەزيدەنتى مادجيد راشەد، حالىقارالىق پاراليمپيادالىق كوميتەتتىڭ (IPC) پرەزيدەنتى ەندريۋ پارسونس، ۇلتتىق پاراليمپيادالىق كوميتەتتەردىڭ باسشىلارى، حالىقارالىق فەدەراتسيالاردىڭ وكىلدەرى جانە ساراپشىلار بار.

فورۋمنىڭ ىسكەرلىك باعدارلاماسىنا ۇلتتىق پاراليمپيادالىق كوميتەتتەردە باسقارۋدى جەتىلدىرۋ، جاستار مەن ايەلدەردىڭ پارا سپورتقا قاتىسۋىن ارتتىرۋ، قولجەتىمدى سپورت جىكتەمەسى مەن تەحنولوگياسىنا يننوۆاتسيا ەنگىزۋ، سونداي-اق ازيا پارا ويىندارى سياقتى ءىرى حالىقارالىق جارىستارعا دايىندىق ماسەلەلەرى ەنگەن.

13 تامىزدا فورۋم اياسىندا استاناداعى كونگرەسس-ورتالىقتا Asian Awards ماراپاتتاۋ ءراسىمى بولادى. وندا ازياداعى پاراليمپيادالىق قوزعالىستى دامىتۋعا ەلەۋلى ۇلەس قوسقان سپورتشىلار، جاتتىقتىرۋشىلار مەن ۇيىمدار ارنايى سىيلىقتار الادى.