رىباكينا تسينتسينناتي ءتۋرنيرىنىڭ كەلەسى اينالىمىنا شىقتى

قازاقستاننىڭ ءبىرىنشى، الەمنىڭ 10-راكەتكاسى ەلەنا رىباكينا اقش-تىڭ تسينتسينناتي قالاسىندا ءوتىپ جاتقان WTA 1000 ءتۋرنيرىنىڭ ءتورتىنشى اينالىمىنا شىقتى، دەپ حابارلادى قازاقستان تەننيس فەدەراتسياسى.

ول ءۇشىنشى اينالىمدا الەمنىڭ 22-راكەتكاسى، بەلگيالىق ەليسە مەرتەنسپەن ويناپ، جەڭىسكە جەتتى. بۇعان دەيىن ەكەۋى ءبىر-بىرىمەن التى رەت ويناعان ەدى. سونىڭ بەسەۋىندە رىباكينانىڭ مەرەيى ۇستەم بولعان.

بۇل جولى ءبىرىنشى پارتيادا رىباكينا قارسىلاسىنان 4:6 ەسەبىمەن جەڭىلىپ، ەكىنشى سەتتە 6:3 ەسەبىمەن جەڭدى. ال ءۇشىنشى، شەشۋشى پارتيادا ەسەپ 5:5 بولعان كەزدە وتانداسىمىز برەيك جاساپ، 6:5 ەسەبىمەن العا شىقتى. سودان كەيىن ماتچقا دوپ بەرگەندە، مۇمكىندىگىن جىبەرگەن جوق. ەسەپ – 7:5.

ەكى ساعات 12 مينۋتقا سوزىلعان تارتىستى ويىندا رىباكينا 11 ەيسپەن بىرگە 8 برەيك-پوينتتىڭ ۇشەۋىن ءتيىمدى پايدالاندى.

ەندى ەلەنا رىباكينا شيرەك فينالعا شىعۋ ءۇشىن الەمنىڭ 6-راكەتكاسى، امەريكالىق مەديسون كيزبەن وينايدى.