چەمپيوندار ليگاسى: «قايرات» پلەي-وففقا شىقتى (ۆيدەو)

الماتىنىڭ «قايرات» فۋتبول كلۋبى UEFA چەمپيوندار ليگاسى ءۇشىنشى ىرىكتەۋ كەزەڭىندە سىرت الاڭدا سلوۆاكيانىڭ «سلوۆان» كومانداسىمەن ويناپ، ەكى ماتچتىڭ قورىتىندىسى بويىنشا پلەي-وففقا شىقتى.

كوماندالاردىڭ ەكىنشى ويىنى براتيسلاۆا قالاسىندا بولدى. ءبىرىنشى ماتچتا «قايرات» الماتىدا «سلوۆاندى» 1:0 ەسەبىمەن جەڭگەن بولاتىن. سوندىقتان كلۋبقا چەمپيوندار ليگاسىنىڭ پلەي-وفف ساتىسىنا شىعۋ ءۇشىن قارسىلاسپەن تەڭ ويناپ نەمەسە 0:1 ەسەبىمەن جەڭىلگەن جاعدايدا پەنالتي سەرياسىندا جەڭۋ كەرەك ەدى. سول سەبەپتەن «قايرات» ەكىنشى ماتچتا سىرت الاڭدا ويناسا دا الاڭ يەلەرىنە دەس بەرمەۋگە تىرىستى.

«سلوۆان» كلۋبى دا ءبىرىنشى بولىپ گول سالۋعا ۇمتىلدى. وسى ماقساتتا سلوۆاكيالىقتار قولدا بار مۇمكىندىكتىڭ ءبارىن جاساپ، اقىر سوڭىندا «قايرات» ويىنشىسىنىڭ ورەسكەل قاتەلىگىن پايدالانىپ، 30-مينۋتتا روبەرت ماك دوپتى تورعا توعىتتى.

ەكىنشى تايمدا دا ويىن قىزا ءتۇسىپ، كوماندالار ءبىر-بىرىنە قاۋىپتى جاعداي جاساپ وتىردى. ويىننىڭ نەگىزگى ۋاقىتى بىتكەن سوڭ بەرىلگەن قوسىمشا 30 مينۋتتا دا تابلوداعى ەسەپ وزگەرگەن جوق. ءسويتىپ، كوماندالار پەنالتي سەرياسىن باستاپ، بۇل مۇمكىندىكتى «قايراتتىڭ» ويىنشىلارى تاماشا پايدالانا الدى. قوناقتار الاڭ يەلەرىنىڭ قاقپاسىن ءتورت رەت ءدال كوزدەپ، كوماندانى پلەي-وفف كەزەڭىنە شىعاردى. ال «سلوۆاننىڭ» ساپىندا ەكى ويىنشى دوپتى قاقپاعا سوعا المادى.

ەندى «قايرات» UEFA چەمپيوندار ليگاسى پلەي-وفف كەزەڭىندە شوتلانديانىڭ «سەلتيك» كومانداسىمەن وينايدى.

الماتىنىڭ كلۋبى بۇعان دەيىن  چەمپيوندار ليگاسىنىڭ ءبىرىنشى جانە ەكىنشى ىرىكتەۋ كەزەڭىندە سلوۆەنيانىڭ «وليمپيا» (1:1، 2:0)، فينليانديانىڭ كۋپس كلۋبتارىن (0:2، 3:0) جەڭگەن بولاتىن.

تاعى ءبىر اتاپ وتەتىن نارسە، 14 تامىزدا «استانا» كلۋبى كونفەرەنتسيا ليگاسى ءۇشىنشى ىرىكتەۋ كەزەڭىندە ءوز الاڭىندا شۆەيتساريانىڭ «لوزاننا» كومانداسىمەن وينايدى. ءبىرىنشى ماتچتا «استانا» قارسىلاسىنان 1:3 ەسەبىمەن جەڭىلگەن ەدى.

داستان كەنجالين،

استانا