Chempıondar lıgasy: «Qaırat» pleı-offqa shyqty (VIDEO)

Almatynyń «Qaırat» fýtbol klýby UEFA Chempıondar lıgasy úshinshi irikteý kezeńinde syrt alańda Slovakııanyń «Slovan» komandasymen oınap, eki matchtyń qorytyndysy boıynsha pleı-offqa shyqty.

Komandalardyń ekinshi oıyny Bratıslava qalasynda boldy. Birinshi matchta «Qaırat» Almatyda «Slovandy» 1:0 esebimen jeńgen bolatyn. Sondyqtan klýbqa Chempıondar lıgasynyń pleı-off satysyna shyǵý úshin qarsylaspen teń oınap nemese 0:1 esebimen jeńilgen jaǵdaıda penaltı serııasynda jeńý kerek edi. Sol sebepten «Qaırat» ekinshi matchta syrt alańda oınasa da alań ıelerine des bermeýge tyrysty.

«Slovan» klýby da birinshi bolyp gol salýǵa umtyldy. Osy maqsatta slovakııalyqtar qolda bar múmkindiktiń bárin jasap, aqyr sońynda «Qaırat» oıynshysynyń óreskel qateligin paıdalanyp, 30-mınýtta Robert Mak dopty torǵa toǵytty.

Ekinshi taımda da oıyn qyza túsip, komandalar bir-birine qaýipti jaǵdaı jasap otyrdy. Oıynnyń negizgi ýaqyty bitken soń berilgen qosymsha 30 mınýtta da tablodaǵy esep ózgergen joq. Sóıtip, komandalar penaltı serııasyn bastap, bul múmkindikti «Qaırattyń» oıynshylary tamasha paıdalana aldy. Qonaqtar alań ıeleriniń qaqpasyn tórt ret dál kózdep, komandany pleı-off kezeńine shyǵardy. Al «Slovannyń» sapynda eki oıynshy dopty qaqpaǵa soǵa almady.

Endi «Qaırat» UEFA Chempıondar lıgasy pleı-off kezeńinde Shotlandııanyń «Seltık» komandasymen oınaıdy.

Almatynyń klýby buǵan deıin  Chempıondar lıgasynyń birinshi jáne ekinshi irikteý kezeńinde Slovenııanyń «Olımpııa» (1:1, 2:0), Fınlıandııanyń KýPS klýbtaryn (0:2, 3:0) jeńgen bolatyn.

Taǵy bir atap ótetin nárse, 14 tamyzda «Astana» klýby Konferenııa lıgasy úshinshi irikteý kezeńinde óz alańynda Shveıarııanyń «Lozanna» komandasymen oınaıdy. Birinshi matchta «Astana» qarsylasynan 1:3 esebimen jeńilgen edi.

Dastan KENJALIN,

ASTANA