«قاراپايىم بولعانىمەن قيىن سۇراق ەكەن». ۇلتتىق قۇرامانىڭ ويىنشىسىنا ءجۋرناليستتىڭ ويى ۇناماي قالدى

بۇگىن استاناداعى «استانا ارەنا» ستاديونىندا فۋتبولدان 2026 جىلى وتەتىن الەم چەمپيوناتىنىڭ ىرىكتەۋ تۋرنيرىنە قاتىسىپ جاتقان قازاقستان مەن ۋەلس ۇلتتىق قۇراما كوماندالارىنىڭ ماتچى الدىندا باق وكىلدەرىنە ارنالعان ءباسپاسوز ءماسليحاتى بولدى.

وسى جيىندا ۇلتتىق قۇرامانىڭ باس جاتتىقتىرۋشىسى ءالي اليەۆ پەن كوماندانىڭ قورعاۋشىسى ءنۇرالى ءالىپ جۋرناليستەردىڭ ەرتەڭگى ويىنعا قاتىستى سۇراقتارىنا جاۋاپ بەردى. اۋەلى باس باپكەر ۇلتتىق قۇرامانىڭ ماتچقا دايىندىعى تۋرالى ايتتى. ول ويىن الدىندا فۋتبولشىلاردىڭ وينايتىن كلۋبتارىنا بارىپ، ولاردىڭ جاعدايىن باقىلاپ قايتقانىن، كومانداعا ىرىكتەۋ كەزىندە ويىنشىلاردىڭ دايىندىعىنا باسا نازار اۋدارعانىن اتاپ ءوتتى.  سونىمەن بىرگە ول قۇراماعا ناعىز كەرەك ادامداردىڭ جاراقاتى بار ەكەنىن جاسىرمادى.

— وكىنىشكە قاراي، باحتيور زاينۋتدينوۆ جاراقات الىپ قالدى. ول ۋەلسپەن ماتچقا كەرەك ەدى. باحتيور كەرەك بولسا، قازىر دە ويناعىسى كەلىپ تۇر. بىراق دارىگەرلەر وعان رۇقسات بەرمەي جاتىر. ەركىن تاپالوۆ شەمىرشەگىنەن جاراقات الىپ، ويىنعا قاتىسا المايدى. يسلام چەسنوكوۆتىڭ دا پروبلەماسى شىقتى. سولاي دەسەك تە باسقا ويىنشىلارىمىز الداعى ويىندارعا جاقسى دايىندىقپەن كەلىپ وتىر. سول ءۇشىن مەن كلۋب باسشىلىعى مەن جاتتىقتىرۋشىلارعا العىسىمدى ايتامىن، — دەدى ول.

كەزدەسۋدە كوماندانىڭ دايىندىعىنا قاتىستى باسقا دا سۇراقتار بولدى. ولارعا باس جاتتىقتىرۋشى مەن ويىنشى ناقتى جاۋاپ بەردى. ال سودان كەيىن جۋرناليست داستان كەنجاليننىڭ كوماندانىڭ ويىنىنا قاتىستى ءبىر سۇراعىنا ۇلتتىق قۇرامانىڭ قورعاۋشىسى لايىقتى جاۋاپ بەرە المادى دەسەك بولادى.

— ستاديوننان، تەلەۆيزوردان قاراپ وتىرساق ۇلتتىق قۇراما كوماندانىڭ، كلۋبتاردىڭ ءبىر كەمشىلىگى ويىنشىلار ءبىر-بىرىنە پاستى دۇرىس بەرە المايدى. سونىڭ كەسىرىنەن كوپ جاعدايدا قاقپاعا گول سوعىلىپ جاتادى. الاڭدا ويناپ جۇرگەندە سىزدەرگە 5 مەتر بولسىن، 10 مەتر بولسىن ءدال پاس بەرۋگە نە جەتپەيدى؟! ماندراج بولا ما؟! مىسالى، اسحاتتىڭ (تاعىبەرگەن) كەسىرىنەن ءبىزدىڭ قاقپاعا گول سوعىلدى. سونداي مينۋستار بار. وسى مينۋستارمەن قالاي جۇمىس ىستەيسىزدەر؟ وسىنداي جاعداي قايتالانباۋى ءۇشىن سىزدەرگە نە ىستەۋ كەرەك؟، — دەگەن سۇراعىنا، فۋتبولشى لايىقتى جاۋاپ بەرە المادى.

-ءار ادامدا، تەك ول بىزدە عانا ەمەس، ۇلكەن چەمپيوناتتى قاراساڭىز كەشە «قايراتتىڭ قاقپاسىنا بىرگە ءبىر كەلە جاتىپ، قاقپادان قيسىق تەپتى.  «سەلتيكتىڭ» ويىنشىلارى دەيتىن 100 ميلليوننان اسىپ جاتىر مىسالعا. سونىڭ وزىندە دە قاتەلىكتەر ىستەيدى. پەنالتي سەرياسىندا مىسالى، تەمىرلاننىڭ ارقاسىندا باسقا ويىنشى بولسا سالۋ مۇمكىن ەدى. بىراق سول جەردە تەمىرلان جاقسى پوزيتسيا تاۋىپ، قايتاردى. كەز كەلگەن ادامدا جۇمىستان دا ماماندىقتان دا قاتەلىكتەر بولادى. سوڭعى ماتچتا اسحاتتىڭ پاسىنا مەنىڭ اياعىم تيمەي قالدى. 10 سەكۋندتان كەيىن گول كىرىپ كەتتى، — دەپ جاۋاپ بەردى.

بۇل جاۋاپقا جۋرناليست قاناعاتتانباعان سياقتى. ويتكەنى، ماسەلە «سەلتيكتىڭ» ويىنشىسىنىڭ «قايراتتىڭ» قاقپاشىسىمەن بىرگە ءبىر شىققاندا گول سالا الماۋى، تەمىرلان اناربەكوۆتىڭ پەنالتيلەردى قايتارعانى جايىندا ەمەس، فۋتبولدان قازاقستان ۇلتتىق قۇراما كومانداسىنا لايىق دەپ تانىلعان، جۇزدەگەن دەمەسەك تە ونداعان فۋتبولشىنىڭ اراسىنان ىرىكتەلىپ الىنعان ادامداردىڭ الاڭدا ءبىر-بىرىنە دۇرىس پاس بەرە المايتىنىندا، ويىنشىلاردىڭ سوڭعى مينۋتتاردا قاتەلەسىپ، قارسىلاسقا پاس بەرە سالاتىنىندا ەدى.

قازىر الەۋمەتتىك جەلىدە جۋرناليست پەن فۋتبولشى تۇسىرىلگەن ۆيدەو «قاراپايىم بولعانىمەن قيىن سۇراق ەكەن» دەگەن ماعىنادا كەڭ تارالىپ، جانكۇيەرلەر اراسىندا قىزۋ پىكىر تالاسقا ۇلاسىپ جاتىر. تيك-توك، ينستاگرام الەۋمەتتىك جەلىسىنە شىققان ۆيدەوعا قاراعاندا فۋتبولشىنىڭ سۇراققا ناقتى جاۋاپ بەرمەگەنى كورىنىپ تۇر. ەندى قالاي دەسەكتە ەرتەڭگى ماتچ ءبارىن كورسەتەدى. قازاقستان ۇلتتىق قۇراماسى ۋەلس كومانداسىنا قارسى ويىندا مىڭداعان جانكۇيەر الدىندا وزدەرىن جاقسى قىرىنان كورسەتەدى دەگەن سەنىمدەمىز!

رۇستەم جۇمان،

فوتو: ۆيكتور فەديۋنين

استانا