FIFA elimizde 2027 jylǵa deıin 100 shaǵyn fýtbol alańyn salady

Qazaqstan halyqaralyq FIFA Arena jobasyn iske asyrý týraly kelisimge alǵashqylardyń biri bolyp qol qoıdy, dep habarlady Týrızm jáne sport mınıstrligi.

Bul bastama balalar men jasóspirimder fýtbolyn damytýǵa jáne mektep oqýshylaryna zamanaýı sport ınfraqurylymyna teń qoljetimdilik jasaýǵa baǵyttalǵan.

Joba aıasynda elimizdegi jalpy bilim beretin mektepterdiń aýmaǵynda 100 shaǵyn fýtbol alańy salynady.

Bul – jobaǵa qatysýshy elder arasyndaǵy eń joǵary kórsetkish. Alǵashqy alańdar bıyl Hromtaý men Kókshetaý qalalarynda paıdalanýǵa beriledi. Baǵdarlamany tolyq aıaqtaý 2027 jylǵa josparlanǵan. Jobany Qazaqstan fýtbol federaııasy Týrızm jáne sport mınıstrliginiń qoldaýymen júzege asyrýda, — dep habarlady vedomstvo.

Mınıstrliktiń málimetine qaraǵanda, ár alań FIFA standartyna sáıkes salynady. Alańnyń kólemi 20×40 metr bolady. Oǵan jańa býyndaǵy jasandy shóp jabyny tóseledi (non-infill turf), kiriktirilgen qaqpa, qorshaý panelderi men qaýipsizdik torlary ornatylady. Ámbebap qurylym alańdardy qoldanystaǵy mektep aýlalary men sport aımaqtaryna yńǵaıly túrde salýǵa múmkindik beredi.

Joba eń aldymen shaǵyn qalalar men aýyl mektepterin qamtıdy. Qarjylandyrýdy FIFA qamtamasyz etse, Týrızm jáne sport mınıstrligi, Oqý-aǵartý mınıstrligi men jergilikti atqarýshy organdar uıymdastyrýshylyq qoldaý kórsetedi.

Búginde fýtbol elimizdiń barlyq óńirinde damyp, eń tanymal buqaralyq sport túrleriniń biri sanalady. Qazirgi tańda fýtbolmen 1,1 mıllıonnan astam adam júıeli túrde aınalysady. Odan bólek 7 378 jattyqtyrýshy jumys isteıdi. Elimizde 280 stadıon, 148 fýtbol maneji, 7 myńnan astam mektep alańy jáne 400-den asa dene shynyqtyrý-saýyqtyrý kesheni bar. Premer-lıgada 14 kásibı klýb óner kórsetse, 242 balalar-jasóspirimder sport mektebinde 40 myńnan astam jas fýtbolshy daıyndalýda, — delingen habarlamada.

Keıingi jyldary elimizde FIFA jáne ÝEFA-nyń qoldaýymen Talǵarda ulttyq quramalarǵa arnalǵan oqý-jattyǵý bazasy, Astanadaǵy Fýtbol úıi men manej, Shymkenttegi jeke «BIIK» bazasy jáne Qostanaıdaǵy «Tobol» klýbyna arnalǵan tolyqqandy manej salyndy.