ۋسمان دەمبەلە مەن ايتانا بونماتي — «التىن دوپ» سىيلىعىنىڭ يەگەرلەرى!

فۋتبولدان فرانتسيا ۇلتتىق قۇراماسى مەن «پاري سەن-جەرمەن» كلۋبىنىڭ شابۋىلشىسى ۋسمان دەمبەلە،  ال ايەلدەر اراسىندا يسپانيانىڭ «بارسەلونا» كومانداسىنىڭ جارتىلاي قورعاۋشىسى ايتانا بونماتي ءۇشىنشى جىل قاتارىنان «التىن دوپ» سىيلىعىنىڭ يەگەرى اتاندى.

بۇل ماراپات بيىل ءتورتىنشى رەت جىل قورىتىندىسىنا بايلانىستى ەمەس، فۋتبول ماۋسىمىنىڭ ناتيجەسى بويىنشا بەرىلدى. وندا 2024 جىلدىڭ 1 تامىزى مەن 2025 جىلدىڭ 25 شىلدەسى ارالىعىنداعى فۋتبولشىلاردىڭ كورسەتكىشى ەسەپكە الىندى.

وعان سپورت جۋرناليستەرى داۋىس بەردى. ولار 10 فۋتبولشىنى تاڭدادى. ەڭ كوپ ۇپاي جيناعان ويىنشى «التىن دوپ» سىيلىعىنىڭ يەگەرى بولدى. بيىلعى اتاققا دجۋد بەللينگەم، ۆيردجيل ۆان دەيك، ۆينيسيۋس جۋنيور، فلوريان ۆيرتس مەن ۆيتينيا ۇسىنىلدى.

بيىل «التىن دوپ» سىيلىعىن تابىس ەتۋ ءراسىمى 68-ءشى رەت وتكىزىلدى. ول 1956 جىلدان بەرى France Football جۋرنالىنىڭ قولداۋىمەن تۇراقتى تۇردە ۇيىمداستىرىلىپ كەلەدى.

ەرەجە ويىنشا ەرلەر مەن ايەلدەر اراسىندا «التىن دوپ» يەگەرى انىقتالىپ، 21 جاسقا دەيىنگى فۋتبولشىلار اراسىندا «كوپا تروفەيى»، ۇزدىك قاقپاشىعا «ياشين تروفەيى» بەرىلدى. سونداي-اق ۇزدىك ەرلەر جانە ايەلدەر كوماندالارى انىقتالدى. ال وتكەن ماۋسىمداعى ۇزدىك سۇرمەرگەنگە گەرد ميۋللەر تروفەيى تابىس ەتىلدى.

بىلتىر ولاردىڭ قاتارىنا تاعى ەكى جاڭا ماراپات قوسىلدى. ەندى ەرلەر جانە ايەلدەر كوماندالارى اراسىندا ۇزدىك جاتتىقتىرۋشىلاردىڭ ەسىمى بەلگىلى بولدى.

كوپا تروفەيى: لامين يامال («بارسەلونا»، يسپانيا قۇراماسى).

ياشين تروفەيى (ەرلەر) — دجانلۋيدجي دوننارۋمما (يتاليا، «مانچەستەر سيتي»)، (ايەلدەر) — حاننا حەمپتون (انگليا، «چەلسي»)

ۇزدىك كلۋب (ەرلەر) – «پاري سەن-جەرمەن» (فرانتسيا).

ۇزدىك كلۋب (ايەلدەر) – «ارسەنال» (انگليا).

ۇزدىك جاتتىقتىرۋشى (ەرلەر) – لۋيس ەنريكە («پاري سەن-جەرمەن»، فرانتسيا)

ۇزدىك جاتتىقتىرۋشى (ايەلدەر) – سارينا ۆيگمان (انگليا قۇراماسى)

بىلتىر انگليانىڭ «مانچەستەر سيتي» كلۋبىندا وينايتىن يسپانيا ۇلتتىق قۇراما كومانداسىنىڭ شابۋىلشى رودري (رودريگو ەرناندەس) 2024 جىلعى «التىن دوپ» يەگەرى بولدى.

داستان كەنجالين،

استانا

فوتو: www.rfi.fr