جاسوسپىرىمدەردىڭ دەنساۋلىعى — باستى نازاردا

بۇۇ بالالار قورىنىڭ (يۋنيسەف) قازاقستانداعى وكىلدىگى الماتىدا العاشقى «شەكسىز ارماندار» اتتى قايىرىمدىلىق UNICEF Gala كەشىنىڭ باعدارلاماسى مەن تۇجىرىمداماسىن رەسمي تۇردە تانىستىردى.

الداعى ۋاقىتتا وتەتىن بۇل كەش جاسوسپىرىمدەردىڭ مەنتالدى (پسيحيكالىق) دەنساۋلىعىن نىعايتۋعا ارنالعان ۇلتتىق باعدارلامانى قارجىلاندىرۋ ءۇشىن بيزنەس، مادەنيەت جانە مەديا كوشباسشىلارىنىڭ باسىن قوسادى.

كەشتىڭ نەگىزگى ماقساتى — جاسوسپىرىمدەردى قولداۋدىڭ كەشەندى جۇيەسىنىڭ اۋقىمىن كەڭەيتۋدى قامتاماسىز ەتۋ: تولىق ىسكە قوسىلعان كەزدە باعدارلاما 50 500 ماماندى وقىتىپ، بۇكىل ەل بويىنشا 140 000 ءجاسوسپىرىمدى قامتۋعا ەسەپتەلگەن; كۇردەلى قاجەتتىلىكتەرى بار 10 000-عا دەيىنگى ءجاسوسپىرىم جەدەل مامانداندىرىلعان قولداۋ الادى.

گالا-فورمات ءوز تيىمدىلىگىن دالەلدەدى. بىلتىر استانادا وتكەن يۋنيسەف-ءتىڭ قايىرىمدىلىق كەشىندە 92 ملن تەڭگەدەن استام قاراجات جينالدى. بۇل قاراجات تسيفرلىق ينكليۋزيا باعدارلاماسىنا باعىتتالىپ، ناقتى جابدىقتاردى جەتكىزۋگە جانە مامانداردى وقىتۋعا جۇمسالدى. وسى قاراجاتقا يۋنيسەف اقمولا، قاراعاندى، شىعىس قازاقستان جانە جامبىل وبلىستارىنداعى مەكتەپتەرگە پلانشەتتەر، نوۋتبۋكتەر، بەيىمدەلگىش فۋنكتسيالارى بار سمارتفوندار، برايل ديسپلەيلەرى، ارنايى پەرنەتاقتالار، بالامالى كوممۋنيكاتسيا قوسىمشالارىنا ليتسەنزيالار جانە باسقا دا قۇرىلعىلار جەتكىزدى، سونداي-اق مىڭنان استام پەداگوگ پەن اسسيستەنتتى دايارلاۋدان وتكىزدى.

2025 جىلى گالا-كەشتىڭ نەگىزگى نازارىندا مەنتالدى دەنساۋلىقتى قولداۋدىڭ جۇيەلى باعدارلاماسى بولدى. بۇل باعدارلاما مەكتەپتەردە ەرتە انىقتاۋ مەن الەۋمەتتىك-ەموتسيونالدىق داعدىلارعا ۇيرەتۋدەن باستاپ، پسيحولوگيالىق قيىندىقتارعا تاپ بولعان جاسوسپىرىمدەرگە ارنالعان وڭىرلەردەگى جەكە جانە توپتىق تەراپيا سەسسيالارىنا دەيىنگى شارالاردى قامتيدى. يۋنيسەف مۇنى ەلدىڭ ادامي كاپيتالىنا سالىنعان ۇزاق مەرزىمدى ينۆەستيتسيا رەتىندە قاراستىرادى: جاسوسپىرىمدەردىڭ دەنساۋلىعىنا قامقورلىق جاساۋ جانە الدىن الۋ شارالارى ءبىلىم بەرۋ، دەنساۋلىق ساقتاۋ جانە الەۋمەتتىك تۇراقتىلىق كورسەتكىشتەرىنە تىكەلەي اسەر ەتەدى.

الماتىدا وتكەن تۇساۋكەسەردە ۇيىمداستىرۋشىلار كەشتىڭ باعدارلاماسىن، اۋكتسيون فورماتىن جانە مادەني بولىگىن تانىستىردى. بيىل گالا-كەشكە وڭىردەگى ەڭ تانىمال ستەنداپ-كوميكتەردىڭ ءبىرى، حالىقارالىق فەستيۆالدەردىڭ قاتىسۋشىسى نۇرلان سابۋروۆ جانە جۋرناليست، قوعام قايراتكەرى ءارى fashion-كاسىپكەر دينارا ءساتجان قايتادان تەگىن نەگىزدە قولداۋ كورسەتەدى.

كەشتىڭ مۋزىكالىق حەدلاينەرى – ۇلتتىق سارىن مەن زاماناۋي ءۇندى ۇيلەستىرگەن حيتتەردىڭ اۆتورى، جاڭا قازاقستاندىق ساحنانىڭ ەڭ جارقىن ارتىستەرىنىڭ ءبىرى ALEM بولادى. سونىمەن قاتار، بىرەگەي ۆوكالدىق تەمبرىنىڭ يەسى، ءانشى جانە حالىقارالىق بايقاۋلاردىڭ لاۋرەاتى الەكساندر ليم ارنايى ونەر كورسەتەدى.

ۇيىمداستىرۋشىلار مادەني باعدارلاما مۇنىمەن شەكتەلمەيتىنىن اتاپ ءوتتى: باسقا دا جۇلدىزدى قوناقتار كۇتىلۋدە، بىراق توسىنسىي رەتىندە ولاردىڭ ەسىمدەرى ازىرگە قۇپيا ساقتالادى.

يۋنيسەف پەن The Ritz-Carlton، Almaty اراسىنداعى سەرىكتەستىك تۋرالى كەلىسىم ەرەكشە اتاپ ءوتىلدى: تاراپتار ىنتىماقتاستىق تۋرالى مەموراندۋمعا قول قويىپ، قوناقۇيدىڭ باستامانى قابىلداۋشى تاراپ جانە رەسمي سەرىكتەس رەتىندەگى قولداۋىن بەكىتتى. راستالعان سەرىكتەستەر مەن قاتىسۋشىلاردىڭ قاتارىندا نۇرلان سماعۇلوۆ قورى، باۋىرجان ساگيەۆ، سونداي-اق قايىرىمدىلىق اۋكتسيونىنا لوتتار ۇسىنۋعا دايىن قوعام قايراتكەرلەرى بار.

-الماتى بۇگىن يۋنيسەف-ءتىڭ گالا-كەشتەرىن وتكىزۋدىڭ جاھاندىق داستۇرىنە رەسمي تۇردە قوسىلىپ وتىر. بۇل — قاۋىمداستىقتىڭ قولداۋعا مۇقتاج جاندار ءۇشىن باس قوساتىن «جىلۋ جيناۋ» ءداستۇرىنىڭ زاماناۋي كورىنىسى. ءبىزدىڭ ماقساتىمىز — ەشبىر بالانىڭ نەمەسە ءجاسوسپىرىمنىڭ ارمانى جالعىزدىق پەن قولداۋدىڭ جوقتىعىنان ۇزىلمەۋى، – دەپ مالىمدەدى يۋنيسەف-ءتىڭ قازاقستانداعى وكىلى د-ر راشەد مۋستافا.

سالتانات قاجىكەن،

الماتى