SportPress.kz Qazaqstan sport jańalyqtary
Talas Áshirhanov — Sarysý aýdany, Jańatas qalasynyń týmasy. 2001 jyly dúnıege kelgen jas sportshy grek-rım kúresimen 10 jasynan beri aınalysyp keledi.
2025 jyly 77 kg salmaq dárejesinde eresekter arasynda Qazaqstan kýbogynyń ıegeri atanyp, el sportynyń úmitin aqtaǵan balýan.
Osy jyly Germanııanyń Dortmýnd qalasynda ótken halyqaralyq irikteý týrnırinde jartylaı fınalǵa deıin jetip, nemis balýany Robert Frıke upaı sanymen ese jiberip, besinshi oryndy ıelendi. О́kinishke qaraı, bul jeńilis oǵan Horvatııanyń Zagreb qalasynda ótetin álem chempıonatyna joldama ákelmedi.
Degenmen Talas bul sátsizdikten sabaq alyp, 2025 jyldyń jeltoqsan aıynda ótetin Qazaqstan birinshiliginde top jaryp, el quramasyna qaıta iligýdi jáne álem chempıonatyna joldama alýdy basty maqsat etip otyr.
Buǵan deıin ol eresekter arasyndaǵy el birinshilikterinde 2 jáne 3-oryndy ıelenip, óziniń turaqty nátıjesin kórsetip júrgen tájirıbeli sportshy. Sondaı-aq halyqaralyq týrnırlerde de júldeli oryndardan kórinip keledi.
Qazirgi tańda Qazaqstan Respýblıkasynyń sport sheberi ataǵyna ıe.
Jeke bapkeri Rınat Ismaılov — Talasty bala kezinen baýlyp kele jatqan tájirıbeli jattyqtyrýshy. Onyń eńbegi men shákirtke degen senimi búginde naqty nátıjesin berip otyr.
Búginde Talas Áshirhanov 2028 jyly Los-Andjeleste ótetin Olımpıada oıyndaryna daıyndyqty bastap ketken.
Onyń basty armany — Jaqsylyq Úshkempirovtan keıingi qazaqqa Olımpıadanyń altyn medalin syılaý.
Jigeri men namysy bir boıyna sińgen jas sportshynyń bul maqsatyna jetetinine barsha jankúıer senedi.
Nurshahrızada SALIMOVA,
TARAZ
