«Almaty Resort» شيپاجايىندا الما فەستيۆالى ءوتتى

پرەزيدەنت ءىس باسقارماسى مەديتسينالىق ورتالىعىنىڭ «Almaty Resort» شيپاجايىندا حالىقارالىق الما كۇنىنە وراي «الما فەستيۆالى» ءوتتى.

كۇزگى ماۋسىمنىڭ جارقىن وقيعاسىنا اينالعان بۇل شارا مىڭنان استام قوناقتىڭ باسىن قوسىپ، سالاۋاتتى ءومىر سالتىن جانە الماتىنىڭ يگى داستۇرلەرىن بەينەلەيتىن مەرەكەگە اينالدى. قالا تۇرعىندارى مەن قوناقتارى ءۇشىن كونتسەرتتەر، شەبەرلىك ساعاتتارى، بايقاۋلار، كورمەلەر مەن ءدام تاتۋلاردى قامتيتىن مازمۇندى باعدارلاما ۇسىنىلدى.

ساحنادا بالالار مەن ەرەسەكتەردىڭ شىعارماشىلىق ۇجىمدارى، حالىق مۋزىكاسى انسامبلدەرى جانە بي توپتارى ونەر كورسەتتى. قوناقتار قولونەر بۇيىمدارىنىڭ جارمەڭكەسىن ارالاپ، ارنايى فوتوزونالاردا سۋرەتكە ءتۇسىپ، المادان دايىندالعان تاعامداردان ءدام تاتتى.

كەشتىڭ باستى كورىنىستەرىنىڭ ءبىرى – قالانىڭ سيمۆولى سانالاتىن المادان جاسالعان ينستاللياتسيا بولدى. مەرەكە سوڭىندا قوناقتارعا ءبىر توننادان استام حوش ءيىستى، پىسكەن الما تاراتىلدى.

-«Almaty Resort»-تا الما فەستيۆالى ءۇشىنشى جىل قاتارىنان ءوتىپ كەلەدى جانە جىل سايىن اۋقىمى كەڭەيىپ وتىر. ءبىز حالىقارالىق الما كۇنىن اتاپ قانا قويماي، ادامدارعا قۋانىش سىيلاپ، داستۇرلەرىمىزدى نىعايتۋدى ءارى سالاۋاتتى ءومىر سالتىنىڭ ماڭىزدىلىعىن ەسكە سالۋدى ماقسات ەتەمىز»، — دەدى Almaty Resort ديرەكتورى گۇلجانات بۋگۋباەۆا.

«Almaty Resort»-تا الما فەستيۆالى 2023 جىلدان بەرى جىل سايىن وتكىزىلىپ كەلەدى. شارانىڭ ماقساتى — وتباسىلىق جانە مادەني قۇندىلىقتاردى نىعايتۋ، دۇرىس تاماقتانۋدى ناسيحاتتاۋ جانە المانىڭ وتانى سانالاتىن ءوڭىردىڭ تابيعي مۇراسىن ساقتاۋ.

سالتانات قاجىكەن،

الماتى