تۇركىستاندا ءتول كۇرەسىمىزدىڭ تۋى كوتەرىلدى

بۇگىن تۇركىستان قالاسىندا قازاق كۇرەسىنەن ازيا چەمپيوناتىنىڭ جالاۋى كوتەرىلەدى.

وسى دۇرمەكتى دودا باستالار الدىندا Qazaq Kuresi اسسوتسياتسياسى اتقارۋشى كوميتەتىنىڭ جينالىسى بولىپ، وندا بىرنەشە ماسەلە قارالدى. اتاپ ايتقاندا، قاۋىمداستىقتىڭ جۇمىسىنىڭ قىسقاشا ەسەبى بەرىلىپ، ستراتەگيالىق باعدارىن ايقىنداپ، شەتەلدىك جانە وبلىستىق فەدەراتسيالارعا تاپسىرمالار جانە ەسەپ بەرۋ مەرزىمدەرى انىقتالدى.

جينالىستا Qazaq Kuresi اسسوتسياتسياسىنىڭ باس ديرەكتورى دامير بەكبوسىنوۆ ءسوز سويلەپ، قاۋىمداستىقتىڭ قىزمەتىنە ەسەپ بەردى. ول ءسوز الماس بۇرىن جيىنعا ەلىمىز تاۋەلسىزدىگىنىڭ تاڭى ارايلاپ اتقان كەزدەن بەرى ءتول كۇرەسىمىزدى دامىتۋعا قولدا بار مۇمكىندىكتىڭ ءبارىن جاساۋعا اتسالىسقان مارات جاقيت، سەرىك تۇكەەۆ، سونىمەن بىرگە قازاق كۇرەسىن دامۋىنا قىزمەت ەتىپ كەلە جاتقان مامان جەڭىس بيتكوزوۆتىڭ قاتىسىپ وتىرعانىنان حاباردار ەتتى.

-بۇگىن ءبىز ءتول سپورتىمىز – قازاق كۇرەسىنىڭ دامۋ جولىنداعى جاڭا كەزەڭىندە تۇرمىز.

اسسوتسياتسيانىڭ باستاماسىمەن الەم جانە ازيا چەمپيوناتتارى، الەم كۋبوكتارى مەن حالىقارالىق تۋرنيرلەر تۇراقتى تۇردە ۇيىمداستىرىلىپ كەلەدى. اتاپ ايتقاندا، بۇگىنگى تاڭدا قازاق كۇرەسىنەن 11 الەم چەمپيوناتى، 13 ازيا چەمپيوناتى، 6 الەم كۋبوگى، سونداي-اق 6 ەۋروپا چەمپيوناتى مەن 2 افريكا چەمپيوناتى ۇيىمداستىرىلدى. سونىمەن قاتار تورەشىلەر مەن جاتتىقتىرۋشىلارعا ارنالعان بىرىڭعاي اتتەستاتسيالاۋ مەن بىلىكتىلىكتى ارتتىرۋ كۋرستارى ءوتتى، — دەدى ول.

سونىمەن بىرگە ول UWW جانە وزگە دە حالىقارالىق فەدەراتسيالارمەن جاسالعان سەرىكتەستىك ارقاسىندا جارىستاردى ۇيىمداستىرۋدىڭ ەلەكتروندىق زاماناۋي Arena جانە Athena ەلەكتروندىق جۇيەلەرى تولىق قولدانىسقا بەرىلگەنىن، وسىنىڭ بارلىعى اسسوتسياتسيانىڭ كاسىبي دەڭگەيدە جانە حالىقارالىق ستاندارتتارعا ساي قىزمەت ەتۋىنە مۇمكىندىك بەرگەنىن اتاپ ءوتتى.

-قازاق كۇرەسىن ازيا ويىندارى باعدارلاماسىنا  ەنگىزۋ كريتەريلەرى اسسوتسياتسيانىڭ ۇزاق مەرزىمدى ستراتەگيالىق ماقساتى – قازاق كۇرەسىن ازيا جانە وليمپيادا ويىندارىنىڭ باعدارلامالارىنا قوسۋ. بۇل باعىتتاعى جۇمىستار وليمپيادالىق كەڭەستىڭ (OCA) تالاپتارىنا ساي جۇرگىزۋدەمىز.

قازاق كۇرەسىن ازيا ويىندارىنا ەنگىزۋ ءۇشىن كەلەسى نەگىزگى شارتتار ورىندالۋى ءتيىس، — دەدى قاۋىمداستىقتىڭ باس ديرەكتورى.

ول ازيالىق وليمپيادالىق كەڭەسپەن تانىلعان ازيالىق قازاق كۇرەسى اسسوتسياتسياسىن اشۋ، ازيانىڭ كەمىندە 25 ەلىندە قازاق كۇرەسىنىڭ دامۋى جانە كەمى 12 ەلدىڭ ازيا چەمپيوناتتارىنا قاتىسۋى ماسەلەسى نەگىزگى شارتتار بولىپ وتىرعانىن ايتتى.

سونداي-اق، ول قۇرلىقتىق فەدەراتسيانىڭ بەلسەندى قىزمەتىنە، بىرىڭعاي تورەلىك جانە جارىس ەرەجەلەرىنە، مەديتسينالىق جانە دوپينگكە قارسى ساياساتتىڭ ساقتالۋىنا، ەرلەر مەن ايەلدەر اراسىنداعى تەڭ مۇمكىندىكتەرگە بارىنشا كوڭىل اۋدارىلاتىنىن ەسكەرتتى.

-قۋانتارلىعى، بۇگىندە قازاق كۇرەسى وسى تالاپتاردىڭ باسىم بولىگىن ءساتتى ورىنداپ وتىر. قازاق كۇرەسى ازيانىڭ 15-تەن استام ەلىندە دامىپ كەلەدى. تورەشىلەر UWW جۇيەسى بويىنشا ليتسەنزيالانادى، ال قازاق كۇرەسىنىڭ جاڭارتىلعان ەرەجەسى حالىقارالىق ستاندارتتارعا تولىق سايكەستەندىرىلگەن.

سونىمەن قاتار ەلەكتروندىق تىركەۋ، مەديتسينالىق باقىلاۋ جانە قاۋىپسىزدىكتى قامتاماسىز ەتۋ جۇيەسى ەنگىزىلدى. بۇل ناتيجەلەر ءبىزدىڭ سپورتتىڭ حالىقارالىق ارەناداعى ورنىن ايقىندايدى، — دەدى ول.

باسقوسۋدا اسسوتسياتسيانىڭ اتقارۋشى كوميتەتتىڭ قۇرىلعانى حابارلاندى.

جيىندا بەلگىلى بولعانداي، قازاق كۇرەسىنىڭ تۇراقتى دامۋى مەن ستراتەگيالىق شەشىمدەردىڭ ءتيىمدى جۇزەگە اسۋى ءۇشىن قاۋىمداستىقتا اتقارۋشى كوميتەت قۇرىلدى. بۇل ورگان اسسوتسياتسيانىڭ ۇزاق مەرزىمدى دامۋ ستراتەگياسىن ىسكە اسىرىپ، قابىلدانعان شەشىمدەردىڭ ورىندالۋىن ۇيلەستىرىپ وتىرادى.

اتقارۋشى كوميتەتتىڭ قۇرامىنا تۋريزم جانە سپورت ءمينيسترى، اسسوتسياتسيانىڭ پرەزيدەنتى ەربول مىرزابوسىنوۆ، مادەنيەت جانە اقپارات مينيسترلىگىنىڭ اپپارات باسشىسى، قاۋىمداستىقتىڭ ۆيتسە-پرەزيدەنتى رينات مۇحامەدقالي، مينيسترلىكتىڭ سپورتتى دامىتۋ ديرەكتسياسىنىڭ ديرەكتورى، ۆيتسە-پرەزيدەنت ەرلان ەستەك، ۇلتتىق جانە ات سپورتى تۇرلەرى ورتالىعىنىڭ ديرەكتورى، ۆيتسە-پرەزيدەنت قايرات پازىلبەك، Qazaq Kuresi قاۋىمداستىعىنىڭ باس ديرەكتورى، حاتشى دامير بەكبوسىنوۆ، ستراتەگيالىق جوسپارلاۋ جانە رەفورمالار اگەنتتىگى اپپاراتىنىڭ باسشىسى باتىربەك ءابدىلدين، شىمكەنت قالاسى كوكپار فەدەراتسياسىنىڭ پرەزيدەنتى بالتاباي اسان كىردى.

-اتقارۋشى كوميتەتتىڭ قۇرامىنا سپورت سالاسىنىڭ تاجىريبەلى باسشىلارى مەن ماماندارى ەندى. ولار ۇلتتىق جانە حالىقارالىق دەڭگەيدە ۇيىمداستىرۋشىلىق، ادىستەمەلىك جانە اكىمشىلىك پروتسەستەردىڭ بارلىعىن ۇيلەستىرىپ، اسسوتسياتسيا جۇمىسىنىڭ اشىقتىعى مەن تيىمدىلىگىن قامتاماسىز ەتپەك. وسىلايشا، Qazaq Kuresi اسسوتسياتسياسىنىڭ باسقارۋ جۇيەسى قازىرگى زامان تالابىنا ساي ينستيتۋتسيونالدى دەڭگەيگە كوتەرىلدى.

سونىمەن قاتار باسقارۋ تيىمدىلىگىن قامتاماسىز ەتۋ ماقساتىندا اسسوتسياتسيامىزدا 8 كوميتەت پەن 3 دەپارتامەنت قۇرىلعان بولاتىن. ولار تورەلىك، مەديتسينا، حالىقارالىق ىنتىماقتاستىق، ماركەتينگ، دامۋ جانە كادر ساياساتى سياقتى باعىتتارداعى ناقتى مىندەتتەردى جۇزەگە اسىرۋدا، — دەدى دامير بەكبوسىنوۆ.

وسىدان كەيىن ول ازيالىق Qazaq Kuresi اسسوتسياتسياسىنىڭ قۇرىلعانىنان حاباردار ەتتى.

-وسى ورايدا ازيالىق Qazaq Kuresi اسسوتسياتسياسىنىڭ قۇرىلعانى تۋرالى جاعىمدى جاڭالىقپەن بولىسۋگە رۇقسات ەتىڭىزدەر. بۇل قازاق كۇرەسىن ازيالىق جانە وليمپيادالىق كەڭىستىككە شىعارۋ جولىنداعى كەلەسى تاريحي قادامداردىڭ ءبىرى ەكەنى ءسوزسىز.

بۇل جاڭا قۇرىلىم ازيا قۇرلىعىنداعى بارلىق ۇلتتىق فەدەراتسيالاردىڭ جۇمىسىن بىرىكتىرىپ، بىرىڭعاي دامۋ ستراتەگياسى مەن جارىس كۇنتىزبەسىن ايقىندايدى.

سونداي-اق سپورتشىلار مەن جاتتىقتىرۋشىلاردىڭ حالىقارالىق دەڭگەيدە اتتەستاتسيادان ءوتۋىن قامتاماسىز ەتەدى جانە United World Wrestling (UWW) جانە وليمپيادالىق كەڭەس (OCA) ستاندارتتارىنا تولىق سايكەس دامۋ ستراتەگياسىن قالىپتاستىرادى.

ەندىگى كەزەكتە سىزدەردى جاڭادان قۇرىلعان اسسوتسياتسيانىڭ باسشىلىق قۇرامىمەن تانىس بولىڭىزدار: حاريش تياگي – پرەزيدەنت، پارۆين تياگي – باس حاتشى لاۋازىمىنا تاعايىندالدى.

وسى ورايدا، الدا ازيالىق Qazaq Kuresi اسسوتسياتسياسىنىڭ اتقارۋشى كوميتەتىنىڭ قۇرامى جاساقتالادى دەگەن ۇمىتتەمىن.

Qazaq Kuresi اسسوتسياتسياسىنىڭ باس ديرەكتورى رەتىندە مەن 2026 جىلدان باستاپ ءبىزدىڭ بارلىق شەتەلدىك فەدەراتسيالار مىندەتتى تۇردە ەرەسەكتەر اراسىنداعى ەل چەمپيوناتىن جىلىنا 1 رەت وتكىزۋدى، ءار توقسان سايىن ZOOM پلاتفورماسى ارقىلى جينالىسقا قاتىسۋدى تاپسىرامىن.

ءبىزدىڭ ستراتەگيالىق باعىتىمىزداعى باستى ماقساتىمىز – ءار شەتەلدىك فەدەراتسيانىڭ ءوزىنىڭ ۇلتتىق وليمپيادالىق كوميتەتىمەن مويىندالۋى جانە دە مەملەكەتتىك سپورت تۇرلەرى رەەسترىنە قازاق كۇرەسىن ەنگىزۋ. وسى جولدا سىزدەردى تابىستى جۇمىستى اتقاراسىزدار دەگەن سەنىمدەمىن. United World Wrestling-ءتىڭ مۇشەلىگىندە بولۋ دا ءبىز ءۇشىن ماڭىزدى. سەبەبى، ءبىز حالىقارالىق جارىستارىمىزدى وسى ۇيىمنىڭ اياسىندا وتكىزەمىز. الداعى ۋاقىتتا قازاق كۇرەسىنىڭ ادىستەمەلىك بازاسىن، قاۋىپسىزدىك نۇسقاۋلىعىن جانە قازاق كۇرەسىنىڭ جاڭارتىلعان ەرەجەسىن رەسمي سايتىمىزدا جاريالايمىز. سونداي-اق قازاق كۇرەسىنىڭ 100 جاتتىعۋ ۆيدەو نۇسقاۋلىعىن دايىنداۋدى جوسپارلادىق. اسسوتسياتسيا تاراپىنان ۇنەمى جان-جاقتى قولداۋ بىلدىرۋگە دايىنبىز، — دەدى ول.

ءسوز سوڭىندا بايانداماشى كەلەسى جىلى ازەربايجاننىڭ استاناسى باكۋ قالاسىندا قازاق كۇرەسىنەن الەم چەمپيوناتىنىڭ ۇيىمداستىرالاتىنىن ايتتى.

داستان كەنجالين،

تۇركىستان